Allah hanna fi sukkaan Niinawa
4
1 Wa wakit Yuunus irif kadar Allah khalla khadabah da,
ziʼil zaʼal chadiid.
2 Wa salla le Allah wa gaal :
« Ajab,
ya Allah.
Da ma al‑cheyy al‑ana gultah wakit ana lissaaʼni fi baladi walla ?
Achaan da bas ana arradt le namchi Tarchiich.
Ya Allah,
naʼarif kadar inta al‑Rahmaan al‑Rahiim wa l‑Sabuur wa l‑Muhibb ziyaada wa tikhalli al‑khadab al‑awwal kharrart tinazzilah fi l‑naas.
3 Ya Allah,
hassaʼ da khalaas.
Chiil ruuhi.
Al‑moot akheer leyi min al‑haya. »
4 Wa Allah gaal leyah :
« Inta da !
Indak hagg tazʼal walla ? »
5 Wa Yuunus marag min Niinawa wa macha gaʼad sabaah min al‑madiina.
Wa sawwa leyah ligdaabe wa gaʼad foogha fi l‑dull achaan yichiif al‑cheyy al‑yabga fi l‑madiina di.
6 Wa Allah al‑Rabb gawwam chideere achaan tisawwi dull le Yuunus wa tifarrihah min zaʼalah.
Wa khalaas,
Yuunus firih farha chadiide be l‑chideere di.
7 Wa laakin ambaakir be fajur badri,
al‑Rabb rassal duudaay akalat al‑chideere di wa hi yibsat.
8 Wa wakit al‑harraay talaʼat,
al‑Rabb rassal riih haamiye min al‑sabaah.
Wa l‑harraay taggat Yuunus fi raasah lahaddi yidoor yakhmar.
Wa dawwar yumuut wa gaal :
« Al‑moot akheer leyi min al‑haya. »
9 Wa l‑Rabb gaal le Yuunus :
« Inta indak hagg tazʼal fi chaan al‑chideere di walla ?
» Wa Yuunus radda leyah wa gaal :
« Aywa,
indi hagg nazʼal lahaddi nidoor al‑moot. »
10 Wa laakin Allah gaal leyah :
« Asmaʼ.
Inta hanneet fi l‑chideere al‑ma maggantaha wa la tiʼibt foogha.
Hi gammat fi yoom waahid wa maatat fi l‑yoom al‑taani.
11 Chiif naas hana Niinawa,
al‑madiina al‑kabiire,
al‑indaha ziyaada min 120 000 naas al‑ma yaʼarfu zeen wa la fasil.
Wa indaha bahaayim katiiriin kula.
Kikkeef ana ma nihinn fooghum ? »