Allah rassal Yuunus le naas Niinawa
3
1 Wa Allah hajja le Yuunus taani marra wa gaal :
2 « Gumm amchi fi Niinawa,
al‑madiina al‑kabiire.
Wa khabbir naasha be l‑kalaam al‑nuguulah leek. »
3 Wa fi l‑bakaan da,
khalaas Yuunus gamma macha Niinawa misil Allah amarah beyah.
Wa Niinawa hi madiina kabiire bilheen wa naadum ma yagdar yuchuggaha illa fi talaata yoom.
4 Wa Yuunus wassal fi Niinawa wa indah yoom tamaam raayikh wa yuguul :
« Baʼad arbaʼiin yoom,
Niinawa tiddammar ! »
5 Wa khalaas,
naas Niinawa aamano be kalaam al‑Rabb al‑gaalah leehum Yuunus.
Wa kharraro ayyaam hana siyaam wa libso khulgaan al‑tooba min al‑khani lahaddi l‑fagri.
6 Wa l‑malik,
min simiʼ al‑khabar da,
tawwaali gamma min kursi haggah wa salla khalagah hana l‑muluuk wa libis khalag al‑tooba wa gaʼad fi l‑rumaad.
7 Wa fi l‑bakaan da,
al‑malik marag kharaar fi Niinawa al‑buguul :
« Be izni ana al‑malik wa wuzaraayi,
mamnuuʼ le l‑naas wa l‑bahaayim kan bagar walla khanam kula ma yaakulu wa la yasraho wa la yacharbo cheyy.
8 Wa waajib al‑naas yalbaso khulgaan al‑tooba wa yilabbusu al‑bahaayim kula.
Wa ayyi waahid yachhad al‑Rabb be chidde wa yikhalli minnah amalah al‑fasil wa l‑unuf al‑gaaʼid yisawwiih.
9 Wa be da,
akuun al‑Rabb yikhalli khadabah wa yarfaʼah minnina wa khalaas,
ma numuutu. »
10 Wa l‑Rabb chaaf naas Niinawa gammo yisawwu misil ke wa khallo minhum amalhum al‑fasil.
Wa khalaas,
hu kula khalla khadabah al‑awwal kharrar yinazzilah fooghum.