Bani Israaʼiil kattaro madaabihhum
10
1 Bani Israaʼiil wildo ziyaada
misil chadarat inab al‑talda katiir.
Wa laakin wakit iyaalhum kitro,
humman kattaro madaabih le ilaahaathum.
Wa wakit arduhum bigat jamiile,
jammalo al‑hujaar al‑khazzoohum le l‑ibaada.
2 Guluubhum bigo itneen itneen
wa hassaʼ yikaffu taman khataahum.
Allah zaatah yihaddim madaabihhum
wa yarmi hujaarhum al‑khazzoohum le l‑ibaada.
3 Wa hassaʼ humman yuguulu :
« Aniina ma indina malik
achaan ma khufna min Allah.
Wa kan indina malik kula,
yisawwi leena chunu ? »
4 Humman yuguulu kalaam saakit
wa yahalfu be kidib
wa yisawwu alaakhaat ma induhum faayde.
Wa yajʼalo al‑adaala
misil bizre al‑musammama
fi l‑zereʼ al‑mahruut.
5 Wa sukkaan al‑Saamira yarjufu
fi chaan sanamhum hana l‑ijil
fi hillit Beet Iil al‑fasle.
Chaʼabha yahzano be sabab ijilhum
wa rujaal diinhum kula yarjufu
achaan yiwaddu majd sanamhum fi l‑khurba.
6 Wa sanamhum hana l‑ijil da,
yiwadduuh balad Achuur
hadiiye le l‑malik al‑kabiir.
Wa gabiilat Afraayim talga al‑ihaana,
aywa,
Bani Israaʼiil yalgo al‑eeb
fi chaan achamhum fi l‑sanam da.
7 Madiinat al‑Saamira tiddammar
wa malikha yabga misil gechchaay aayme fi l‑bahar.
8 Wa l‑bakaanaat al‑aaliyiin hana l‑fasaala
al‑yaznubu fooghum Bani Israaʼiil yiddammaro.
Al‑haskaniit wa l‑chook
yugummu fi madaabihhum.
Wa l‑naas yuguulu :
« Khalli al‑jibaal yagaʼo foogna
wa khalli al‑hujaar yadfunuuna. »
9 « Wa min ayyaam Gibeeʼa,
Bani Israaʼiil aznabo
wa humman ma khayyaro haalhum.
Fi Gibeeʼa,
waajib al‑harib yalhag al‑mujrimiin
10 wa ana niʼaakhibhum misil nidoorah.
Wa chuʼuub katiiriin yugummu didduhum
wa yijanzuruuhum fi chaan khataahum al‑itneen.
11 Gabiilat Afraayim misil bagara muʼaddaba
al‑tihibb tifajjikh al‑maʼaach
fi l‑madagg le tuduggah.
Wa wakit naji,
nukhutt uud al‑harraata
fi ragabatha al‑jamiile.
Wa gabiilat Afraayim tukurr al‑harraata
wa Bani Yahuuza yahartu
wa zurriiyit Yaakhuub yichaglubu al‑ard.
12 Azraʼo al‑adaala wa agtaʼo al‑mahabba
wa addulu leeku zereʼ jadiid.
Hassaʼ waajib titaabuʼu Allah
lahaddi hu yijiib foogku al‑adaala
misil al‑matara.
13 Laakin intu zaraʼtu al‑charr
wa gataʼtu al‑fasaala
wa akaltu min natiijat al‑kidib.
Intu atwakkaltu ale gudritku
wa ale katarat askarku.
14 Wa khalaas,
yinsamiʼ korooraak harib fi lubb chaʼabku
wa kulla mudunku al‑gawiyiin yakhrabo
misil yoom al‑khaayid Chalmaan
kharab hillit Beet Arbiil
wa rihik al‑ammahaat wa iyaalhin.
15 Wa da bas al‑yisawwuuh leeku intu naas Beet Iil
achaan intu sawweetu al‑fasaala al‑ma indaha hadd.
Wa yoom waahid fi wakt al‑chagaag,
malik Israaʼiil yiddammar marra waahid. »