Ikhaab al‑chaʼab al‑baʼʼado min Allah
9
1 Ya Bani Israaʼiil,
ma tafraho wa tinbastu
misil al‑chuʼuub al‑aakhariin.
Achaan intu baʼʼadtu min Ilaahku wa achcharmattu
wa habbeetu ujrat al‑charmata
al‑ligiituuha fi kulla madaggaat al‑gameh.
2 Laakin al‑madagg wa l‑assaara ma yirabbuuku
wa kan tukhuttu achamku fi l‑khamar kula,
ma talgooh.
3 Naas Afraayim ma yaskunu battaan
fi balad Allah.
Humman yigabbulu Masir
wa fi balad Achuur kula,
yaakulu akil nijis.
4 Battaan ma yigaddumu khamar hadiiyat charaab le Allah
wa hu ma yakhbal dahaayaahum.
Wa da yabga leehum misil akil hana hizin
wa l‑yaakuluuh,
kulluhum yabgo nijsiin.
Akilhum yamla butuunhum bas
wa laakin ma yagdaro yigaddumuuh fi beet Allah.
5 Wa yisawwu chunu
fi l‑yoom al‑muhaddad,
fi yoom iid Allah ?
6 Hatta kan arrado min al‑damaar kula,
balad Masir tajmaʼhum
wa hillit Mamfiis tadfinhum.
Al‑chook yisidd kanzuhum hana l‑fudda
wa l‑haskaniit yugumm fi khiyamhum.
7 Yoom al‑ikhaab ja
wa yoom al‑Hisaab wassal.
Khalli Bani Israaʼiil yaʼarfuuh !
Humman gaalo :
« Al‑nabi munaafikh
wa l‑naadum al‑nazal foogah Ruuh Allah da,
muchootin. »
Khataayaahum bigo katiiriin
wa adaawithum bigat chadiide.
8 Al‑nabi al‑gaaʼid maʼa Ilaahi,
hu misil muraakhib fi naas Afraayim.
Wa laakin yukujju leyah charak fi kulla duruubah
wa yiwajjuhuuh be l‑adaawa fi beet Ilaahah.
9 Wa humman sawwo al‑fasaad
misil zamaan naas Gibeeʼa* sawwooh.
Wa Allah yizzakkar khataahum
wa yiʼaakhibhum be sabab zunuubhum.
Allah dahar al‑waaluuda le chaʼabah
10 « Zamaan,
ana ligiit Bani Israaʼiil
misil inab laziiz fi l‑sahara.
Wa chift juduudhum haluwiin
misil fawaakih al‑awwal fi chadarat al‑tiin.
Wa laakin wakit humman wislo fi Baʼal Faʼuur,*
abado al‑sanam al‑yijiib al‑eeb.
Wa bigo makruuhiin
misil al‑sanam al‑muharram al‑abadooh.
11 Wa charaf Afraayim
yabga misil teer wa yitiir.
Ma fi battaan waaluuda
wa la khalaba wa la himil.
12 Wa kan rabbo iyaal kula,
ana naktulhum gabul ma yabgo kubaar.
Aywa,
al‑azaab leehum
wakit nibaʼʼid minhum !
13 Zamaan wakit chift gabiilat Afraayim,
hi tichaabih nakhalaay al‑magganooha fi marʼa akhdar.
Wa laakin hassaʼ,
gabiilat Afraayim tamrug iyaalha le l‑katil. »
14 Ya Allah,
tantiihum chunu ?
Antiihum rihim al‑ma yakrub
wa duyuud al‑ma yiradduʼu !
15 « Kulla fasaalithum baanat fi hillit Gilgaal
wa fi l‑bakaan da bas,
ana kirihtuhum.
Wa be sabab amalhum al‑fasil,
ana natrudhum min beeti.
Wa battaan ma nihibbuhum
achaan kulla kubaaraathum haraamiyiin.
16 Naas Afraayim kataloohum
wa uruughum yibso khalaas
wa battaan ma yijiibu iyaal.
Wa kan wildo kula,
ana naktul iyaalhum al‑khaaliyiin leehum. »
17 Ilaahi yarfudhum
achaan humman ma simʼooh
wa yiʼiiru fi ust al‑umam.