41
1 Wa l‑raajil waddaani daakhal fi l‑beet al‑kabiir hana l‑beet al‑mukhaddas.
Wa hu kaal tukhun amad al‑baab wa ligiih 6 duraaʼ be l‑nuss al‑waahid wa 6 duraaʼ be l‑nuss al‑aakhar.
Wa daahu urd al‑beet al‑mukhaddas.
2 Urd baab al‑madkhal 10 duraaʼ wa daraadirah jaay wa jaay leyah,
ayyi waahid indah 5 duraaʼ.
Wa l‑raajil kaal al‑beet al‑kabiir hana l‑beet al‑mukhaddas wa ligi tuulah 40 duraaʼ wa urdah 20 duraaʼ.
3 Wa baʼad da,
hu dakhal daakhal fi l‑beet al‑mukhaddas.
Wa hu kaal tukhun amad al‑baab wa ligiihum 2 duraaʼ.
Wa urd al‑baab 6 duraaʼ wa daraadirah jaay wa jaay leyah,
ayyi waahid indah 7 duraaʼ.
4 Wa hu kaal al‑beet al‑daakhal fi l‑beet al‑mukhaddas wa ligi tuulah 20 duraaʼ wa urdah 20 duraaʼ.
Wa gaal leyi :
« Da l‑bakaan al‑mukhaddas marra waahid. »
Al‑khuraf al‑jaanibiyiin hana l‑beet
5 Wa baʼad da,
maragna barra.
Wa l‑raajil kaal tukhun al‑durdur hana l‑beet al‑mukhaddas wa ligiih 6 duraaʼ.
Wa fiyah khuraf jaanibiyiin al‑muhawwigiin al‑beet wa ayyi khurfa urdaha 4 duraaʼ.
6 Wa l‑khuraf al‑jaanibiyiin le l‑beet gaaʼidiin fi gasir al‑indah talaata darajaat wa ayyi daraja indaha 30 khurfa.
Wa l‑khuraf dool mabniyiin maʼa tuul al‑durdur al‑barraani hana l‑beet wa laakin ma mulassagiin fi l‑durdur hana l‑beet zaatah.
7 Wa fi ayyi daraja hana l‑gasir,
al‑khuraf chaalo bakaan ziyaada wa da muhawwig kulla l‑beet.
Wa yatlaʼo fi l‑gasir da be ataba min al‑daraja al‑tihit ale l‑daraja al‑usut lahaddi l‑daraja al‑foog.
8 Wa ana dangart wa chift al‑beet al‑mukhaddas indah asaas hawaaleeyah al‑yisaawi 6 duraaʼ kubaar.
Wa da,
asaas al‑khuraf al‑jaanibiyiin kula.
9 Wa l‑durdur al‑barraani hana l‑khuraf al‑jaanibiyiin,
tukhnah 5 duraaʼ.
Wa fiyah faraga been al‑khuraf al‑jaanibiyiin
10 wa khuraf al‑beet.
Wa urd al‑faraga di 20 duraaʼ fi kulli jiihe min al‑beet al‑mukhaddas.
11 Wa biibaan al‑khuraf al‑jaanibiyiin muwajjihiin ale l‑faraga di.
Wa fiyah madkhal waahid muwajjih munchaakh wa aakhar muwajjih wati.
Wa l‑durdur al‑yihawwig al‑faraga di,
tukhnah 5 duraaʼ fi ayyi jiihe.
12 Wa fiyah beet kabiir gaaʼid be l‑nuss al‑kharbaani hana l‑fadaay al‑dakhlaaniiye.
Wa tuulah 90 duraaʼ wa urdah 70 duraaʼ wa tukhun al‑durdur hana l‑beet da 5 duraaʼ fi kulli jiihe.
13 Wa l‑raajil kaal tuul al‑beet al‑mukhaddas wa ligiih 100 duraaʼ.
Wa l‑beet al‑kabiir al‑fi l‑kharib wa daraadirah wa faragatah kula urduhum 100 duraaʼ.
14 Wa sabaah le l‑beet al‑mukhaddas,
urd al‑fadaay al‑dakhlaaniiye indah 100 duraaʼ.
15 Wa l‑raajil kaal tuul al‑beet al‑kabiir al‑fi l‑kharib wa hu wa duruubah,
tuulhum 100 duraaʼ.
Fi lubb al‑beet al‑mukhaddas
Wa l‑beet al‑kabiir al‑usut hana l‑beet al‑mukhaddas wa khurfit al‑madkhal,
16 daraadirhum mukhattayiin be khachab.
Wa l‑iidaan al‑yarkabo fooghum al‑biibaan wa l‑chabaabiik al‑induhum hadiid madfuur wa l‑duruub al‑yihawwugu al‑gusuur hana talaata darajaat,
kulluhum mukhattayiin be khachab min al‑ard lahaddi l‑chabaabiik.
Wa kulla l‑chabaabiik mukhattayiin.
17 Wa min khurfit al‑madkhal lahaddi l‑beet al‑daakhal,
al‑beet wa kulla daraadirah mujammal fi ayyi bakaan,
be barra wa daakhal kula.
18 Rasamo foogah suwar hana makhluugiin samaawiyiin wa chadar nakhal.
Wa ambeen ayyi makhluugiin samaawiyiin itneen,
fiyah nakhalaay.
Wa ayyi makhluug samaawi indah wujuuh itneen.
19 Wijhah al‑waahid hana insaan muwajjih ale l‑nakhalaay be nuss waahid.
Wa wijhah al‑aakhar hana duud muwajjih ale l‑nakhalaay be l‑nuss al‑aakhar.
Wa be l‑rasim da,
hawwago kulla l‑beet al‑mukhaddas.
20 Rasamo al‑makhluugiin al‑samaawiyiin wa l‑nakhal fi l‑daraadir min tihit lahaddi foog min al‑biibaan.
21 Wa iidaan al‑baab hana l‑beet al‑kabiir al‑usut hana l‑beet al‑mukhaddas da,
murabbaʼiin.
Wa giddaam al‑bakaan al‑mukhaddas marra waahid,
binchaaf cheyy misil
22 madbah hana hatab.
Urdah 2 duraaʼ wa tuulah foog 3 duraaʼ.
Wa koonyaatah wa gaʼarah wa jawaanibah kula min hatab.
Wa l‑raajil gaal leyi :
« Di l‑tarabeeza al‑gaaʼide giddaam Allah. »
23 Al‑bakaan al‑mukhaddas marra waahid wa l‑beet al‑kabiir al‑usut hana l‑beet al‑mukhaddas,
kulluhum induhum biibaan abdalfiteen.
24 Wa ayyi baab min al‑biibaan al‑itneen dool indah dalfiteen al‑yiliffu.
25 Wa rasamo makhluugiin samaawiyiin wa nakhal fi l‑biibaan dool misil rasamoohum fi l‑daraadir.
Wa fiyah khachaba tidallil giddaam khurfit al‑madkhal barra.
26 Wa fi daraadir khurfit al‑madkhal,
fiyah chabaabiik al‑induhum hadiid madfuur wa rasamo nakhal fi ayyi bakaan.
Wa rasamo nakhal fi l‑khuraf al‑jaanibiyiin hana l‑beet wa fi l‑khachaba al‑tidallil giddaamhum kula.