Kitaab Irmiya
min Kutub al‑Anbiya
1
1 Daahu kalaam Irmiya wileed Hilkhiiya waahid min rujaal al‑diin al‑saakniin fi hillit Anatuut,
fi ard gabiilat Banyaamiin.
2 Wa Allah bada yihajji le Irmiya fi sanit 13 hana hukum Yuuchiiya wileed Aamuun malik mamlakat Yahuuza.
3 Wa gaaʼid yihajji leyah kula fi ayyaam hukum Yahuuyakhim wileed Yuuchiiya malik mamlakat Yahuuza.
Wa hajja leyah lahaddi l‑chahar al‑khaamis hana sanit 11 hana hukum Sidkhiiya wileed Yuuchiiya malik mamlakat Yahuuza.
Wa da l‑wakit al‑waddo foogah sukkaan Madiinat al‑Khudus fi l‑khurba.*
Allah naada Irmiya wa darrajah nabi
4 Wa Allah hajja leyi ana Irmiya wa gaal :
5 « Gabul ma nikawwinak
fi batun ammak,
ana naʼarfak.
Wa gabul ma tamrug min rihim ammak,
ana khassastak
achaan nirassilak nabi le l‑umam. »
6 Wa ana gult :
« Ya Allah al‑Rabb !
Ana sakhayyar,
ma naʼarif nihajji. »
7 Wa Allah gaal leyi :
« Ma tuguul inta sakhayyar.
Amchi fi ayyi bakaan al‑nirassilak foogah
wa kulla cheyy al‑nuguulah leek,
guulah.
8 Ma takhaaf min naadum
achaan ana gaaʼid maʼaak le nahmiik. »
Wa da kalaam Allah.
9 Wa khalaas,
Allah madda iidah wa gaal leyi :
« Daahu ana nukhutt kalaami
fi khachmak.
10 Wa aʼarif kadar al‑yoom nantiik sulta
fi l‑umam wa l‑mamaalik.
Wa da le tamrug wa tarmi
wa tidammir wa takhrib waahidiin.
Wa laakin tabni wa tisabbit aakhariin. »
Irmiya yichiif ruʼya tineen
11 Wa Allah hajja leyi wa gaal :
« Ya Irmiya,
gaaʼid tichiif chunu ?
» Wa ana gult :
« Al‑gaaʼid nichiifah da,
firiʼ chadarat al‑looz al‑nawwar bala taʼkhiir. »
12 Wa Allah gaal leyi :
« Inta chift adiil.
Ruʼyat al‑looz di tiwassif kadar ana kula nihaggig kalaami bala taʼkhiir. »
13 Wa battaan Allah hajja leyi wa gaal :
« Inta gaaʼid tichiif chunu ?
» Wa ana gult :
« Al‑gaaʼid nichiifah da,
waahid kalool gaaʼid yufuur wa min munchaakh mayyal aleena. »
14 Wa Allah gaal leyi :
« Min munchaakh bas timayyil al‑fasaala fi kulla sukkaan al‑balad di.
15 Wa daahu ana ninaadi kulla gabaayil mamaalik al‑munchaakh.
Wa humman yaju wa ayyi waahid yukhutt kursiih giddaam khachum baab Madiinat al‑Khudus.
Yihawwugu daraadirha wa yahjumu kulla hillaal balad Yahuuza.
Wa da kalaam Allah.
16 Wa be da,
ana nihaakim chaʼabi fi chaan fasaalithum.
Wa fasaalithum di,
humman abooni ana wa harrago bakhuur le ilaahaat aakhariin wa sajado le l‑asnaam al‑sawwoohum be iideehum.
17 « Wa laakin inta,
ya Irmiya !
Arbut sulbak !
Gumm wa ballikh leehum be kulla cheyy al‑naamurak beyah.
Wa ma takhaaf minhum.
Kan khuft,
ana nikhawwifak ziyaada giddaamhum.
18 Wa l‑yoom,
ana nisawwiik gawi misil madiina gawiiye al‑indaha amad hana hadiid wa daraadir hana nahaas.
Wa da le tabga gawi giddaam kulla balad Yahuuza be muluukha wa kubaaraatha wa rujaal diinha wa chaʼabha.
19 Humman yihaarubuuk wa laakin ma yisawwu leek cheyy achaan ana nukuun maʼaak wa nahmiik.
» Wa da kalaam Allah.