64
1 *Ya Allah !
Aftah al‑samaawaat wa anzil
achaan al‑jibaal yinhazzo giddaamak !
2 Misil be surʼa al‑naar taakul al‑gechch
wa tifawwir al‑almi,
inta kula tiʼarrif usmak le khusmaanak
wa tirajjif al‑umam giddaamak !
3 Zamaan,
inta sawweet achya al‑bikhawwufu
al‑aniina ma khatteena fooghum achamna.
Khalaas,
inta nazalt
wa l‑jibaal anhazzo giddaamak.
4 Abadan ma fi naadum simiʼ
wa la fakko adaanah
wa la chaaf ilaah mislak inta,
al‑yisawwi amal ajiib
le l‑gaaʼidiin yarjooh be acham.
5 Inta tilaagi al‑yafraho be sawwiyiin al‑adaala
wa l‑yizzakkaro duruubak.
Wa inta khidibt leena
achaan aniina aznabna.
Laakin daayman be duruubak dool,
aniina nalgo al‑naja.
6 Wa kullina bigiina ma taahiriin
wa kulla cheyy al‑nisawwuuh adiil
bigi misil khalag munajjas be damm al‑heed.
Wa aniina kullina yibisna
misil warag al‑chadar al‑daffag
wa khataayaana chaaloona
misil al‑riih.
7 Ma fi naadum al‑yinaadi usmak
wa ma fi naadum al‑yugumm wa yinrabit maʼaak.
Aywa,
inta ma wajjaht aleena
wa khalleetna wagaʼna
be tihit tagalat khataana.
8 Ya Allah !
Inta bas abuuna.
Aniina misil al‑tiine
wa inta bas daggaagna
wa aniina kullina,
inta bas khaaligna.
9 Ya Allah !
Ma takhdab foogna !
Ma tizzakkar daayman fi khataana !
Chiif !
Aniina kullina chaʼabak.
10 Mudunak al‑mukhaddasiin fido
wa jabal Sahyuun bigat sahara
wa Madiinat al‑Khudus bigat bakaan kharaab.
11 Beetna al‑mukhaddas al‑jamiil
al‑foogah juduudna chakarook,
bigi lugma al‑akalatha al‑naar
wa kulla cheyy khaali al‑indina addammar !
12 Ya Allah !
Giddaam kulla l‑damaar da,
inta ma tisawwi cheyy walla ?
Walla taskut wa tiziid taʼabna ?