Yoom al‑taar wa fida al‑chaʼab
63
1 Da yaatu al‑jaayi min balad Adoom,
min madiinat Busra
be khulgaanah induhum nugat humur ?
Da yaatu al‑jaayi
be khulgaan al‑yichiilu al‑een
wa aziim be katarat gudurtah ?
Allah gaal :
« Da ana !
Wa ana bas al‑nihajji be adaala
wa indi al‑gudra le ninajji. »
2 Maala khalagak ahmar ?
Maala khulgaanak
misil khulgaan hana naadum al‑yakhdim fi assaarat al‑inab ?
3 « Ana gaaʼid nakhdim wiheedi fi l‑assaara
wa ma fi naadum min al‑chuʼuub maʼaayi.
Ana fajjakhtuhum fi zaʼali
wa asartuhum fi khadabi.
Wa dammuhum rachcha fi khulgaani
wa lattakh kulla lubaasi.
4 Achaan fi galbi,
da yoom hana taar
wa l‑sana al‑nafda fiiha,
hi jaat.
5 Ana fattacht wa ma ligiit al‑yisaaʼidni
wa hizint wakit ma chift al‑yiʼaawinni.
Khalaas,
duraaʼi jaab nasri
wa khadabi aawanni.
6 Fi zaʼali,
ana fajjakht chuʼuub
wa fi khadabi,
sawweethum sakraaniin
wa daffagt dammuhum fi l‑turaab. »
Rahmat Allah wa taʼab iyaalah
7 Ana nizzakkar rahmat Allah
wa amalah al‑waajib leyah al‑chukur
hasab kulla cheyy al‑sawwaah leena Allah.
Aywa,
kheerah al‑kabiir le Bani Israaʼiil,
adaaltah al‑sawwaaha hasab kheerah al‑ma indah hadd.
8 Wa hu gaal :
« Akiid,
humman chaʼabi
wa iyaal al‑ma yukhuchchuuni. »
Wa khalaas,
Allah bigi leehum munajji.
9 Allah chaaf diigithum di,
hintah hu.
Wa hu ma rassal mursaal wa la malak
laakin Allah hu zaatah bas najjaahum.
Wa be mahabbitah wa mahannitah,
hu bas fadaahum.
Wa rafaʼaahum wa hamalaahum
fi muddit kulla l‑zaman daak.
10 Laakin humman iso Allah
wa khaddabo Ruuhah al‑mukhaddas.
Khalaas,
gabbal wa bigi leehum adu
wa hu zaatah gamma haarabaahum.
11 Baʼad da,
chaʼabah azzakkaro al‑wakit al‑faat,
al‑wakit hana Muusa.
Wa gaalo :
« Ween hu al‑marag chaʼabah min al‑bahar
maʼa ruʼyaan khanamah ?
Wa ween hu al‑khatta fooghum
Ruuhah al‑mukhaddas ?
12 Ween hu al‑saaʼad Muusa be iidah al‑majiide
wa chagga al‑bahar itneen giddaamhum
le yiʼalli usmah ila l‑abad ?
13 Ween hu al‑waddaahum fi l‑bahar al‑khariig
wa misil juwaad fi l‑sahara ?
Wa humman ma attartaʼo.
14 Wa misil bahiime al‑tanzil fi l‑waadi,
Ruuh Allah waddaahum le l‑raaha. »
Misil da,
ya Allah,
inta gudt chaʼabak
le tiʼalli usmak al‑majiid.
Al‑chaʼab yachhado Allah
15 Ya Allah !
Chiif min al‑samaawaat
wa anzur min maskanak al‑mukhaddas al‑aziim.
Ween mahabbitak al‑chadiide ?
Wa ween gudurtak ?
Aniina ma nihissu be mahannitak
wa la be kheerak leena.
16 Inta bas abuuna
hatta kan Ibraahiim ma yaʼarifna
wa Israaʼiil kula ma indah beena khabar.
Inta bas Allah abuuna,
inta bas faadiina
wa da usmak min zamaan.
17 Wa maala,
ya Allah,
waddartina
baʼiid min duruubak
wa gawweet guluubna
lahaddi ma nakhaafo minnak ?
Gabbil !
Taʼaal fi chaan abiidak
wa fi chaan gabaayil warasatak.
18 Wa chaʼabak al‑mukhassas
chaalo al‑balad di le mudda gisayre bas.
Wa baʼad da,
khusmaanna jo
wa fajjakho beetak al‑mukhaddas.
19 Min mudda tawiile,
aniina bigiina
misil naas al‑inta ma hakamt foogna
wa misil naas al‑ma naadoona be usmak.