Al‑azaab le l‑yidooru fazaʼ min Masir
31
1 Al‑azaab le l‑naas al‑yanzulu fi Masir le l‑fazaʼ
wa yintaklu ale l‑kheel
wa yitwakkalo ale arabaat al‑harib
achaan humman katiiriin
wa yitwakkalo ale siyaad al‑kheel
achaan humman induhum gudra.
Wa laakin al‑naas dool ma induhum fikir fi Khudduus Israaʼiil
wa humman ma yifattuchu Allah.
2 Akiid,
hu hakiim !
Yagdar yijiib al‑charr
wa ma yangud kalaamah.
Wa hu yugumm didd al‑yisawwu al‑fasaala
wa didd al‑fazaʼo wa l‑zulum.
3 Al‑Masriyiin humman insaan,
ma ilaah
wa kheelhum laham,
ma ruuh.
Wakit Allah yarfaʼ iidah,
al‑Masriyiin al‑yaju fazaʼ,
yittartaʼo
wa l‑dawwaro fazaʼhum,
yagaʼo
wa kulluhum yiddammaro sawa.
Allah yahmi Madiinat al‑Khudus
4 Wa daahu Allah gaal leyi :
« Wakit al‑duud aw farkh al‑duud yikirr fi rimmitah,
hatta kan naado ruʼyaan katiiriin diddah kula,
hu ma yibarjil min korooraakhum
wa la yakhaaf min katarathum.
Wa be misil da,
Allah al‑Gaadir yanzil
fi jabal Sahyuun,
fi hajarah le yihaarib.
5 Wa misil al‑tuyuur yimattutu janaaheehum,
Allah al‑Gaadir kula yahmi Madiinat al‑Khudus.
Aywa,
hu yahmiiha wa yinajjiiha
wa yafzaʼha wa yikhallisha.
6 Ya Bani Israaʼiil,
gabbulu ale l‑abeetuuh marra waahid !
7 Wa fi l‑yoom da,
ayyi waahid yaaba ilaahaatah hana l‑fudda
wa ilaahaatah hana l‑dahab.
Aywa,
dool al‑sawwoohum leeku
iideeku al‑muznibiin.
8 « Wa balad Achuur tagaʼ tihit seef al‑ma hana naadum
wa da ma seef insaan al‑yaktulha.
Hi tajri giddaam al‑seef da
wa subyaanha yikhaddumuuhum misil abiid.
9 Wa askarha al‑fahaliin yajru min al‑khoof
wa kubaaraatha yinbahtu giddaam al‑raaye. »
Wa da kalaam Allah al‑indah naar fi jabal Sahyuun wa indah furun fi Madiinat al‑Khudus.