Masir maljaʼ al‑ma madmuun
30
1 Daahu kalaam Allah.
« Al‑azaab le l‑iyaal al‑haraamiyiin !
Humman sawwo choora
al‑ma jaaye minni.
Wa sawwo alaakha al‑ana ma amart beeha
wa be da,
zaado zanib fi zanib.
2 Wa humman nazalo fi Masir
bala ma yasʼalooni.
Wa da le yifattuchu himaaye min Firʼoon,
aywa,
le yalgo maljaʼ fi Masir.
3 Wa laakin himaayat Firʼoon
tijiib leeku al‑eeb.
Wa l‑maljaʼ fi Masir
yijiib leeku al‑ihaana.
4 Wa masaaʼiilku macho hillit Suʼaan
wa sufaraaku wassalo lahaddi madiinat Haaniis.
5 Wa laakin al‑eeb yaji le kulla l‑naas
fi chaan al‑chaʼab al‑ma yisaaʼidhum.
Al‑Masriyiin ma jiibu
wa la fazaʼ wa la musaaʼada
wa laakin yijiibu leehum
al‑eeb wa l‑ihaana. »
6 Muhaakamat bahaayim balad al‑Nagab.
« Al‑murassaliin chaggo balad al‑diige wa l‑taʼab
fi ust al‑diidaan dukuur wa anaati
wa ambeen amchideegaat wa l‑daabi al‑yitiir.
Humman yangulu khunaahum
fi duhuur al‑hamiir
wa yichiddu maalhum
fi duhuur al‑jumaal.
Wa yiwadduuhum le chaʼab
al‑ma yisaaʼuduuhum.
7 Achaan fazaʼ Masir
misil al‑riih al‑ma indaha faayde
wa fi chaan da,
ana naadeetha
Rahab al‑Khuul al‑ma Khatiir. »
Al‑chaʼab abo wasaaya Allah
8 Wa Allah gaal leyi :
« Hassaʼ amchi
wa aktib al‑kalaam da giddaamhum fi looh
wa sajjilah fi kitaab.
Achaan yabga chaahid daayim
fi l‑mustakhbal.
9 Achaan al‑chaʼab dool aasiyiin
wa iyaal khachchaachiin !
Aywa,
ma yidooru yasmaʼooni,
ma yasmaʼo churuut Tawraat Allah.
10 Humman yuguulu le l‑anbiya :
‹ Ma titnabbaʼo ! ›
Wa yuguulu le l‑yichiifu ruʼya :
‹ Ma tihajju leena be ruʼya sahiihe !
Kallumu leena be kidib
wa atnabbaʼo be khachch.
11 Baʼʼudu min al‑derib
wa amchu taraf min al‑tariig !
Wa Khudduus Israaʼiil,
baʼʼuduuh minnina !
› »
12 Wa fi chaan da,
daahu kalaam Khudduus Israaʼiil :
« Intu abeetu al‑kalaam da
wa atwakkaltu ale l‑mudaayig wa l‑mufsid
wa arrakkaztu foogah.
13 Wa khalaas,
al‑khata da yabga leeku
misil khurma fi durdur tawiil al‑tisawwiih aʼwaj
wa fi ramchit een,
yagaʼ !
14 Wa yilkassar marra waahid
misil kassiriin al‑jarr al‑ma bilʼaddal.
Ma tifaddil minnah chigfe
al‑yagdaro yichiilu foogha naar
wa la yijiibu beeha almi min al‑rahad. »
Al‑iimaan be Allah yanti gudra
15 Achaan daahu Allah al‑Rabb Khudduus Israaʼiil gaal :
« Kan tubtu wa anjammeetu,
talgo al‑naja
wa kan gaʼadtu be hudu wa aamantu,
talgo al‑gudra.
Wa laakin intu abeetu
16 wa gultu :
‹ La !
Aniina niʼarrudu be kheel. ›
Khalaas,
arrudu !
Wa gultu battaan :
‹ Fi l‑jarraayiin,
narkabo. ›
Khalaas,
al‑yitaaruduuku kula
yabgo jarraayiin !
17 Alif naas yiʼarrudu min adu waahid
wa min khamsa,
kulluku tiʼarrudu
lahaddi tinhazmu wa tabgo chiyya
misil alaama fi raas al‑hajar
wa misil raaye fi raas al‑jabal. »
Allah yihinn fi chaʼabah wa yafzaʼhum
18 Wa fi chaan da,
Allah yarja al‑wakit al‑munaasib
le yihinn foogku wa yarhamku
achaan Allah al‑Rabb hu aadil.
Mabruuk le kulla l‑naas
al‑yukhuttu achamhum foogah !
19 Aywa,
ya chaʼab Sahyuun
al‑saakniin fi Madiinat al‑Khudus,
intu abadan ma tabku battaan.
Wa wakit tasrakho,
hu yihinn foogku !
Wa min yasmaʼku,
tawwaali yurudd leeku.
20 Wa kan hu yantiiku al‑diige misil akil
wa l‑taʼab misil almi kula,
hu bas sayyidku ma yitarrif minku
wa be uyuunku tichiifuuh.
21 Wakit tamchu ale zeene aw isra,
udneeku yasmaʼo hiss waraaku
al‑yuguul leeku :
« Daahu al‑derib al‑waajib tichiiluuh ! »
22 Wa tajʼalo misil nijis
al‑fudda al‑masahtu beeha asnaamku
wa l‑dahab al‑masahtu beyah tamaasiilku al‑masbuubiin.
Wa tidaffuguuhum misil najaasa wa tuguulu :
« Yalla !
Barra min hini ! »
23 Wa hu yinazzil matara
fi l‑habb al‑intu titeerubuuh.
Wa l‑maʼaach al‑tantijah al‑ard
yabga katiir wa halu.
Wa fi l‑yoom da,
bahaayimku yasraho fi marʼa wasiiʼ.
24 Wa l‑tiiraan wa l‑hamiir
al‑yahartu al‑ard
yaakulu alfa al‑indaha mileh
al‑yichattutuuha be asa aw be chiʼbe.
25 Wa fi yoom al‑moot al‑katiir
wakit al‑khanaadig yagaʼo,
wudyaan almi yajru be katara
fi ayyi jabal aali wa ayyi hajar tawiil.
26 Wa nuur al‑gamar
yabga misil nuur al‑harraay.
Wa nuur al‑harraay
yabga sabʼa marraat ziyaada
misil nuur hana sabʼa yoom.
Wa da l‑yoom al‑foogah
Allah yiʼaalij juruuh chaʼabah
wa yidaawi awaawiir daribiinhum.
Naar Allah taakul balad Achuur
27 Daahu Allah jaayi min baʼiid
wa khadabah yahrig
wa da tagiil ma binhamil.
Wa khachmah yihajji be khadab
wa lisaanah misil naar al‑tahrig.
28 Wa nafkhatah misil seel al‑chadiid
al‑yatlaʼ lahaddi yalhag al‑ragaba.
Wa hu yikharbil
al‑umam kharbiliin al‑damaar
wa yilajjim
al‑chuʼuub le yiwaddirhum.
29 Ya sukkaan Madiinat al‑Khudus,
intu tikhannu
misil fi leele khaassa le l‑iid.
Wa l‑farah yamla guluubku
misil al‑yamchi maʼa hiss al‑suffaara
ale jabal Allah,
aleyah hu,
hajar Bani Israaʼiil.
30 Wa Allah yisammiʼ hissah al‑majiid
wa yiwassif duraaʼah al‑marfuuʼ
be chiddit zaʼalah
wa ambalbaala al‑tahrig
wa matar chadiid wa barad.
31 Wa balad Achuur tarjif min hiss Allah
al‑yadrubha be asa.
32 Wa ayyi darbe al‑yiʼaakhibha beeha Allah
yinsamiʼ maʼaaha hiss hana tanaabil wa jigindiiye
wakit yarfaʼ iidah le yihaaribha.
33 Wa min wakit tawiil,
nugrat al‑naar jaahize
aywa,
hi jaahize le malik Achuur !
Wa l‑nugra di tawiile wa wasiiʼe
wa daffago foogha hatab katiir.
Wa be nafkhat Allah
al‑misil seel chadiid hana kibriit,
hu yigabbidha naar.