Al‑kalaam didd Suur wa Seeda
23
1 Muhaakamat balad Suur.
Nuuhu,
ya l‑musaafiriin be sufun Tarchiich !
Achaan madiinat Suur addammarat !
Ma fi buyuut wa la madkhal !
Wa da khabar min jaziirat Khubrus.
2 Askutu min al‑khoof,
ya sukkaan khachum al‑bahar.
Ya tujjaar Seeda !
Tujjaarku chaggo al‑bahar be katara.
3 Maʼaach waadi Masir
wa darat al‑Niil wa intaajah
saafaro fi l‑bahar
wa bigo tijaara le l‑umam.
4 Ya Seeda,
akhjale !
Ya l‑madiina al‑gawiiye al‑jamb al‑bahar !
Achaan al‑bahar gaal :
« Ana ma taalagt wa la wilidt
wa la kabbart wulaad
wa la rabbeet banaat. »
5 Wakit sukkaan Masir yasmaʼo
be l‑khabar da,
yarjufu
misil rajafo wakit simʼo khabar Suur.
6 Ya sukkaan khachum al‑bahar,
nuuhu
wa agtaʼo al‑bahar lahaddi Tarchiich !
7 Hal di bas madiinitku Suur
al‑awwal farhaane walla ?
Hal di bas hi al‑gadiime
al‑gaaʼide min zamaan
wa assasat hillaal aakhariin walla ?
8 Yaatu al‑kharrar al‑cheyy da didd Suur,
hi al‑tidarrij muluuk ?
Hi charrafat tujjaarha misil masaaʼiil
wa tujjaarha mucharrafiin fi kulla l‑ard.
9 Allah al‑Gaadir bas kharrarah
le yidammir istikbaar al‑naas al‑mucharrafiin
wa yahgir kulla l‑naas al‑induhum charaf
al‑gaaʼidiin fi l‑ard.
10 Ya chaʼab Tarchiich !
Chittu fi arduku
misil al‑Niil yamla ardah
achaan ma fi cheyy al‑yadharku.
11 Achaan Allah rafaʼ iidah didd al‑bahar
wa rajjaf al‑mamaalik.
Wa kharrar yidammir
mudun Kanʼaan al‑gawiyiin.
12 Wa Allah gaal :
« Ya chaʼab madiinat Seeda !
Waggufu farahku,
ya intu al‑misil bineeye udriiye al‑azzabooha.
Gummu wa amchu jaziirat Khubrus !
Wa laakin hinaak kula,
ma talgo jumma.
13 Chiifu naas balad Baabil,
humman dool bigo ma fiihum.
Achaan al‑Achuuriyiin antoohum
le haywaanaat al‑kadaade.
Al‑Achuuriyiin sawwo khanaadig
le yihaasuru al‑hille
wa haddamo gusuur madiinat Suur
wa sawwoohum koom hana turaab. »
14 Ya l‑musaafiriin be sufun Tarchiich,
nuuhu achaan maljaʼku al‑gawi khirib !
15 Wa fi l‑yoom da,
Suur yansooha le muddit 70 sana misil adad ayyaam malik waahid.
Wa fi nihaayat al‑siniin dool,
Suur tabga misil charmuuta al‑khanno beeha.
Wa gaalo :
16 « Ya l‑charmuuta al‑nisooki !
Chiili jigindiiye
wa hawwigi al‑madiina.
Duggi al‑jigindiiye adiil
wa khanni katiir
achaan yizzakkarooki. »
17 Wa baʼad 70 sana,
Allah yifakkir le Suur wa hi tigabbil le ribaaha al‑awwal.
Wa hi tichcharmat battaan maʼa kulla mamaalik al‑ard.
18 Laakin ribaaha wa ujritha yabgo mukhassasiin le Allah.
Wa la yudummuuhum wa la yakhzunuuhum.
Achaan be ribaaha yiʼakkulu wa yichabbuʼu wa yilabbusu adiil al‑naas al‑yaskunu giddaam Allah.