Al‑tahziir le Madiinat al‑Khudus
22
1 Muhaakama fi waadi al‑Ruʼya.
Ya Madiinat al‑Khudus,
maala kulla chaʼabki
talaʼo fi ruuse al‑buyuut ?
2 Maala kulla l‑awwa wa l‑haraka,
ya inti hillit al‑farah ?
Maytiinki ma kataloohum be l‑seef
wa ma maato fi l‑harib.
3 Kulla khuyyaadki arrado
wa siyaad al‑nuchchaab karaboohum masaajiin.
Wa kulla sukkaanki karaboohum masaajiin
hatta kan humman arrado baʼiid kula.
4 Wa fi chaan da,
ana gult :
« Ma tichiifuuni !
Khalluuni nabki be hurga.
Wa ma tihaawulu tihannusuuni
achaan ummati al‑misil bitt ammi addammarat. »
5 Achaan da yoom hana barjaal
wa damaar wa chakk.
Wa da jaayi min Allah al‑Rabb al‑Gaadir
fi waadi al‑Ruʼya.
Al‑durdur wagaʼ
wa l‑korooraak ansamaʼ ale l‑jabal.
6 Naas balad Ilaam chaayliin kalootaathum
wa arabaat al‑harib wa siyaad al‑kheel jaayiin
wa naas hillit Khiir jahhazo duruuʼhum.
7 Ya Madiinat al‑Khudus !
Wudyaanki al‑samhiin
anmalo be arabaat al‑harib.
Wa siyaad al‑kheel jo wagafo
fi khuchuum biibaanki
8 wa daahu balad Yahuuza
ma indaha difaaʼ battaan.
Wa fi l‑yoom da,
intu wajjahtu ale beet al‑Khaaba*
al‑foogah silaahku.
9 Wa chiftu kadar
khuram madiinat Dawuud katiiriin.
Wa waradtu almi
wa sabbeetuuh fi l‑khazzaan al‑tihit.
10 Wa hasabtu adad buyuut Madiinat al‑Khudus
wa haddamtu buyuut waahidiin le tigawwu al‑durdur.
11 Wa sawweetu khazzaan
ambeenaat al‑daraadir al‑itneen
le l‑almi hana l‑birke al‑gadiime.
Wa laakin ma wajjahtu le Allah
hu al‑jaab al‑masiibe di.
Wa ma chiftuuh aleyah,
hu al‑jahhazaaha min zaman baʼiid.
12 Wa da l‑yoom al‑foogah Allah al‑Rabb al‑Gaadir
naadaaku le tabku wa tunuuhu
wa le tizayyunu ruuseeku
wa talbaso khulgaan al‑tooba.
13 Wa laakin daahu be farah wa suruur,
intu dabahtu bagar wa khanam.
Wa akaltu laham
wa chiribtu khamar wa gultu :
« Yalla !
Naakulu wa nacharbo
achaan ambaakir,
khalaas numuutu ! »
14 Wa Allah al‑Gaadir bayyan leyi wa gaal :
« Khataaku da,
abadan ma indah kaffaara
lahaddi tumuutu. »
Wa da,
Allah al‑Rabb al‑Gaadir bas gaalah.
Tahziir le Chabna al‑masʼuul
15 Wa daahu Allah al‑Rabb al‑Gaadir gaal :
« Amchi algaah le Chabna
al‑masʼuul fi gasir al‑malik
wa guul leyah :
16 ‹ Indak chunu hini ?
Wa indak yaatu hini ?
Maala tankut leek khabur
fi l‑bakaan da ?
Wa maala tahfir khabur fi l‑aali
wa tiʼaddil leek khabur fi l‑jabal le tinjamma foogah ?
17 Ya l‑raajil al‑chadiid,
daahu Allah yarmiik baʼiid
wa yakurbak be chidde wa yatwiik.
18 Wa yidakrimak misil kuuraay
wa yazgulak fi balad wasiiʼe.
Wa hinaak tumuut maʼa arabaat charafak,
inta al‑jibt al‑eeb le beet siidak.
19 « ‹ Aywa !
Ana narmiik min bakaanak
wa naturdak min masʼuuliiytak.
20 Wa fi l‑yoom da,
ninaadi abdi
Aliyaakhim wileed Hilkhiiya.
21 Ana nilabbisah khalagak
wa narbut sulbah be hizaamak
wa masʼuuliiytak,
nantiiha leyah fi iideenah.
Wa hu yabga abu
le sukkaan Madiinat al‑Khudus
wa le Bani Yahuuza.
22 Wa masʼuuliiyit muftaah gasir al‑malik Dawuud,
nukhuttaha tihit sultitah.
Wa kan hu yaftah al‑baab,
ma fi al‑yagdar yisiddah
wa kan hu yisiddah,
ma fi al‑yagdar yaftahah.
23 Wa ana nimakkinah
misil witid fi bakaan gawi
wa hu yijiib al‑charaf le beet abuuh.
24 Wa kulla tagalat charaf beet abuuh,
al‑kubaar wa l‑sukhaar kula,
yukhuttuuha foogah.
Wa hu yabga misil chiʼbe
al‑yiʼallugu foogha
kulla l‑muʼiddaat al‑sukhaar
min al‑kharaariif lahaddi l‑girab.
› »
25 Wa daahu kalaam Allah al‑Gaadir :
« Fi l‑yoom da,
al‑witid al‑mumakkan fi l‑bakaan al‑gawi
yintani wa yinkasir wa yagaʼ
wa l‑tagala al‑chaayilha tiddammar. »
Wa da kalaam Allah al‑hu gaalah.