Usum wileed Ichaʼya
8
1 Wa Allah gaal leyi :
« Chiil looh kabiir wa aktib foogah be huruuf waadhe al‑usum Mahiir Chalaal Haach Baz. »
2 Wa ana wassaft al‑looh da le chuhuud amiiniin wa humman Uriiya raajil al‑diin wa Zakariiya wileed Yabarkiya.
3 Wa ana garrabt le marti al‑nabiiye wa hi bigat khalbaane wa wildat wileed.
Wa Allah gaal leyi :
« Sammi wileedak Mahiir Chalaal Haach Baz (maʼanaatah ajri le l‑khaniime wa amchi ajala le l‑nahib).
4 Achaan gubbaal al‑wileed ma yaʼarif yuguul :
‹ ammi wa abuuyi ›,
yijiibu giddaam malik balad Achuur khuna Dimachkh wa khaniimit al‑Saamira. »
Malik Achuur yufuur misil al‑bahar
5 Wa Allah hajja leyi battaan wa gaal :
6 « Al‑chaʼab da aba
almi hillit Chiilooh
al‑yajri be bicheech
wa firho be l‑malik Rasiin
wa be wileed Ramalya.
7 Wa fi chaan da,
al‑Rabb yigawwim didduhum
almi bahar al‑Furaat al‑chadiid wa katiir.
Wa da,
malik balad Achuur
wa kulla azamatah.
Hu yatlaʼ foog min bakaan margadah
wa yufuut huduudah al‑awwal.
8 Wa yaakul balad Yahuuza
wa yisiil wa yinayyil
wa yalhag lahaddi l‑ragaba.
Wa rujuulah yamlo urd baladak,
ya Immaanuwiil. »
Al‑Rabb maʼa l‑chaʼab
9 Ya chaʼab Achuur,
arjufu wa akhaafo !
Ya kulla l‑naas al‑baʼiidiin fi l‑ard,
asmaʼo !
Jahhuzu le l‑harib wa akhaafo.
Aywa,
jahhuzu le l‑harib wa akhaafo.
10 Sawwu chooritku
wa laakin chooritku di tafchul.
Guulu kalaamku misil tidooruuh
wa laakin kalaamku da ma yilhaggag
achaan Immaanuwiil,
Allah maʼaana.
Waajib takhaafo min Allah
11 Wa daahu kalaam Allah leyi wakit iidah karabatni wa hazzarni ma nichiil derib al‑chaʼab da.
Hu gaal :
12 « Ma tuguulu muʼaamara le ayyi cheyy
al‑yinaadi al‑chaʼab da muʼaamara.
Ma takhaafo min ayyi cheyy
al‑humman yakhaafo minnah
wa ma tarjufu.
13 Wa le Allah al‑Gaadir bas,
tikhaddusuuh
wa minnah hu bas takhaafo
wa minnah hu bas tarjufu.
14 Wa hu yabga bakaan mukhaddas
le l‑mamaalik al‑itneen hana Bani Israaʼiil.
Yabga leehum hajar
al‑yintaggo foogah wa yittartaʼo
wa yabga chabaka wa charak
le sukkaan Madiinat al‑Khudus.
15 Wa katiiriin yittartaʼo fi l‑hajar
wa yagaʼo wa yilkassaro
wa yagaʼo fi l‑charak wa yakurbuuhum. »
Al‑sukuut wa l‑acham
16 Ahfad al‑chahaada di
wa akhtim al‑taʼliim fi guluub talaamiizi.
17 Ana nukhutt achami fi Allah
al‑aba ma yiwajjih ale zurriiyit Yaakhuub
wa ana nitwakkal aleyah.
18 Ana wa l‑iyaal al‑antaahum leyi Allah,
aniina misil alaamaat wa masal
le Bani Israaʼiil.
Allah al‑Gaadir bas jaabaahum,
hu al‑saakin fi jabal Sahyuun.
19 Akuun yuguulu leeku :
« Amchu le l‑naas al‑yikallumu
maʼa l‑maytiin
wa le l‑jannaaniyiin
al‑humman yilkhaalo
wa yihajju tihit tihit.
Al‑chaʼab ma yasʼalo ilaahaathum walla ?
Wa l‑naas ma yikallumu maʼa l‑maytiin
fi chaan al‑hayyiin walla ? »
20 Khalaas,
ruddu leehum wa guulu :
« Al‑naas al‑ma yitaabuʼu
al‑taʼliim wa l‑chahaada
ma yichiifu nuur al‑sabaah. »
Al‑machi fi l‑dalaam
21 Al‑naas yuchuggu al‑balad
taʼbaaniin wa jiiʼaaniin.
Wakit yujuuʼu,
yakhdabo
wa yalʼano malikhum wa Ilaahhum
wa yisanguʼu ale l‑sama.
22 Wa baʼad da,
yichiifu al‑ard
wa daahu taʼab wa dalaam.
Wa dalaam al‑diige yilizzuhum
fi dalaam azrag kurum.