Ichaʼya yikallim le l‑malik Ahaaz
7
1 Wa Rasiin malik balad Araam wa Fagah wileed Ramalya malik mamlakat Israaʼiil* gammo didd Madiinat al‑Khudus le yihaarubuuha wa laakin ma gidro yahjumuuha.
Wa da fi ayyaam hukum Ahaaz wileed Yuutaam wileed Uzziiya malik mamlakat Yahuuza.
2 Wa gaalo le l‑malik Ahaaz al‑min zurriiyit Dawuud :
« Daahu malik Araam khatta muʼaskarah fi turaab gabiilat Afraayim.
» Khalaas fi l‑bakaan da,
al‑malik wa chaʼabah barjalo bigo misil chadar al‑khaaba al‑hazzatah al‑riih.
3 Wa Allah gaal le Ichaʼya :
« Amrug inta wa wileedak Chaar Yachuub (maʼanaatah al‑faddulu yigabbulu).
Wa gaabulu al‑malik Ahaaz.
Talgooh fi taraf majra al‑birke al‑aali ale derib zereʼ al‑khassaaliin.
4 Wa guul leyah :
‹ Agood saakit ma takhaaf !
Wa khalli galbak ma yibarjil
fi chaan al‑zaʼal al‑chadiid
hana Rasiin malik Araam wa wileed Ramalya.
Achaan humman misil machaahiib itneen
al‑gaaʼidiin yidakhkhunu.
5 Achaan balad Araam
wa turaab gabiilat Afraayim wa wileed Ramalya
dawwaro yisawwu leek al‑fasaala wa gaalo :
6 “Yalla nugummu didd balad Yahuuza
wa nadkhulu al‑madiina.
Wa nikhawwufuuha wa nichiiluuha
wa nukhuttu foogha wileed Tabiil misil malik.”
› »
7 Wa daahu Allah al‑Rabb gaal :
« Da ma yukuun wa da ma yabga.
8 Achaan madiinat Dimachkh,
hi raas balad Araam
wa malik Rasiin,
hu raas Dimachkh bas.
Wa baʼad 65 sana,
turaab gabiilat Afraayim yiddammar
wa chaʼabha yabgo ma fiihum.
9 Wa madiinat al‑Saamira,
hi raas turaab gabiilat Afraayim
wa wileed Ramalya,
hu raas al‑Saamira bas.
Kan ma tiʼaamunu be kalaami ana al‑Rabb,
abadan ma tasbutu. »
Alaamat Immaanuwiil
10 Wa battaan Allah hajja le Ahaaz wa gaal leyah :
11 « Atlub alaama min Allah Ilaahak kan min tihit al‑ard walla min foog fi l‑sama. »
12 Wa Ahaaz radda leyah wa gaal :
« Ana ma natlub cheyy wa la nijarrib Allah. »
13 Wa khalaas,
Ichaʼya gaal :
« Asmaʼo,
ya zurriiyit Dawuud.
Gallaltu sabur al‑naas da chiyya leeku walla ?
Hal tagdaro tigallulu sabur Ilaahi ?
14 Wa fi chaan da,
al‑Rabb hu zaatah yantiiku alaama.
Daahu al‑bineeye khalbaane
wa talda wileed
wa tisammiih Immaanuwiil
(maʼanaatah Allah maʼaana).
15 Hu yachrab laban raayib wa yaakul asal
lahaddi yakbur
wa yaʼarif al‑zeen wa l‑fasil.
16 Wa laakin gubbaal al‑wileed da
ma yaʼarif al‑zeen wa l‑fasil,
turaab al‑muluuk al‑itneen dool yabga khala.
17 Wa Allah yijiib foogak inta,
ya l‑malik Ahaaz,
wa fi chaʼabak wa aayiltak
ayyaam al‑abadan ma jo
min yoom turaab Afraayim anfarag
min turaab Yahuuza.
Wa l‑ayyaam al‑fasliin dool yaju leek
be sabab malik balad Achuur. »
18 Fi l‑yoom da,
Allah yisaffir le yinaadi askar Masir
wa humman yaju katiiriin misil dubbaan
min kulla majaari Masir.
Wa yinaadi askar min balad Achuur
wa humman yaju katiiriin misil nahale.
19 Wa humman yaju kulluhum
wa yanzulu fi karkaw al‑wudyaan
wa fi chuguug al‑jibaal
wa fi kulla l‑chadar al‑induhum chook
wa fi kulla l‑maraaʼi.
20 Wa fi l‑yoom da,
al‑Rabb yiʼajjir muus
wa hu malik balad Achuur.
Wa yijiibah
min khaadi le bahar al‑Furaat.
Wa beyah al‑Rabb yizayyin al‑raas
wa kulla suuf al‑jilid
wa l‑digin kula yisillaha.
21 Wa fi l‑yoom da,
ayyi naadum yirabbi ijle min al‑door
wa khanam itneen.
22 Wa min katarat al‑laban,
al‑naas yacharbo al‑laban al‑raayib.
Aywa,
al‑naas al‑faddalo fi l‑balad
yiʼiichu be l‑laban al‑raayib wa l‑asal bas.
23 Wa fi l‑yoom da,
al‑bakaan al‑awwal indah 1 000 chadara hana inab
al‑tamanah 1 000 hajar fudda,
yikhalluuh fi l‑chook wa l‑haskaniit.
24 Wa yadkhulu foogah be huraab
wa nubbaal
achaan kulla l‑balad tabga kadaade,
malaane be l‑chook wa l‑haskaniit.
25 Kan le l‑jibaal al‑awwal haratoohum be jarraay,
battaan ma yahartuuhum
min katarat al‑chook wa l‑haskaniit
wa illa l‑bagar wa l‑khanam bas
yasraho fooghum.