Asmaʼ kalaam al‑malik
8
1 Yaatu hakiim ?
Wa yaatu al‑yagdar yifassir al‑kalaam da ?
Al‑hikma tidawwi wijh al‑insaan
wa khalaas,
yatlig wijhah al‑karabah.
2 Kan leyi ana,
nuguul :
Asmaʼ kalaam al‑malik
fi chaan al‑haliife al‑inta sawweetha giddaam al‑Rabb.
3 Ma tissaʼjal wa taaba sultitah
wa la tagiif didd kalaamah
hatta kan hawaan kula.
Achaan al‑malik yisawwi kulla cheyy
al‑hu yidoorah.
4 Kan hu yuguul chunu kula,
hu bas al‑malik !
Wa kan misil da,
yaatu yagdar yuguul leyah :
« Inta tisawwi chunu ? »
5 Al‑yitabbig amur al‑malik
ma yichiif minnah ayyi fasaala.
Wa l‑hakiim yaʼarif al‑wakit al‑munaasib
wa kikkeef tukuun al‑chariiʼa.
6 Achaan le kulla cheyy fi wakit munaasib
wa fi wakit le l‑chariiʼa.
Aywa,
fasaalit al‑insaan
tabga khatiire leyah hu.
7 Achaan hu ma yaʼarif
al‑cheyy al‑yukuun.
Wa yaatu yagdar yuguul leyah
yabga misil da walla da ?
8 Ma fi ayyi insaan yagdar yakrub ruuhah
wa la insaan al‑indah gudra fi yoom mootah.
Ma fi insaan indah hagg yamrug min al‑harib
wa l‑fasaala ma yinajji siidha.
9 Wa kulla l‑cheyy da,
ana chiftah
wakit fakkart fi kulla l‑khidme
al‑gaaʼide tukuun fi l‑ard.
Fi wakit al‑foogah al‑insaan yamluk fi l‑insaan
le yisawwi leyah al‑fasaala.
10 Wa misil da,
ana chift
al‑fasliin dafanoohum fi l‑khubuur be charaf.
Wa awwal humman yamchu wa yaju
min al‑bakaan al‑mukhaddas.
Laakin fi l‑madiina di,
al‑naas nisoohum.
Wa da kula zaayil saakit.
Ikhaab fi l‑amal al‑fasil
11 Al‑ikhaab ma yinnaffaz ajala
fi l‑amal al‑fasil.
Wa be da,
galb al‑insaan fi daakhilah
malaan be niiye hana sawwiyiin al‑fasaala.
12 Al‑muznib yagdar yisawwi al‑amal al‑fasil alif marra
wa yiʼiich yitawwil.
Wa laakin be da kula,
ana naʼarif
kadar al‑insaan al‑yakhaaf min al‑Rabb
yalga al‑kheer
achaan hu khaayif giddaamah.
13 Laakin al‑fasil ma yalga kheer
wa ayyaam hayaatah
yufuutu misil al‑dull
achaan hu ma khaayif giddaam al‑Rabb.
14 Fi l‑ard,
fiyah cheyy al‑zaayil saakit
wa daahu al‑cheyy da.
Fi naas saalihiin,
yiʼaamuluuhum
misil yiʼaamulu al‑fasliin.
Wa fi naas fasliin,
yiʼaamuluuhum
misil yiʼaamulu al‑saalihiin.
Wa ana gult battaan :
« Da kula zaayil saakit. »
15 Khalli al‑naas yiʼiichu be farah
achaan akheer le l‑insaan
yalga al‑akil wa l‑charaab wa l‑farah.
Wa da yukuun maʼaayah fi khidimtah
fi kulla ayyaam hayaatah fi l‑ard
al‑antaaha leyah al‑Rabb.
16 Ana chilt niiye le naʼarif al‑hikma
wa nichiif al‑chakhala
al‑gaaʼide tukuun fi l‑ard.
Achaan een al‑insaan ma tunuum
wa la leel wa la nahaar.
17 Wa ana chift kulla amal al‑Rabb.
Wa l‑insaan ma yagdar yaʼarif
al‑amal al‑gaaʼid yukuun fi l‑ard.
Wa kan al‑insaan yifattichah be taʼab kula,
ma yalgaah.
Hatta kan al‑hakiim yuguul yaʼarfah kula,
hu ma yagdar yaʼarif cheyy !