Wasiiye le kabiir al‑khannaayiin : Mazmuur le Dawuud
64
1 Ya Rabb !
Asmaʼ hiss chakwiti.
Ana khaayif min udwaani,
ahfad hayaati.
2 Labbidni baʼiid min muʼaamarat al‑fasliin
wa baʼʼidni min niiyit al‑zaalimiin.
3 Humman yitarrugu lisneehum misil al‑seef
wa kalaamhum murr misil al‑nuchchaab.
4 Humman yakursu wa yazurgu al‑tamaamiin
wa be khafla,
yazurguuh bala khoof.
5 Yilhaaracho ambeenaathum le yisawwu al‑fasaala
wa yikhattutu le yukujju amkajjaamaat
wa yuguulu :
« Yaatu yichiifna ? »
6 Yanwu al‑jariime wa yuguulu :
« Aniina jahhazna le nihaggugu niiyitna.
Al‑fi galb al‑insaan ma binʼarif ! »
7 Laakin be khafla,
al‑Rabb zaragaahum be nuchchaab
wa daahu al‑nuchchaab da darabaahum !
8 Kalaamhum gabbal fooghum
wa wakit yichiifhum,
ayyi naadum yihizz raasah.
9 Kulla l‑naas yakhaafo wa yikhabburu be amal al‑Rabb
wa yafhamo khidimtah.
10 Khalli al‑saalih yafrah be Allah wa yaljaʼ leyah
wa kulla l‑naas al‑guluubhum adiiliin yachkuruuh.