Mazmuur le Dawuud, wakit hu gaaʼid fi saharat Yahuuza*
63
1 Ya Rabb !
Inta Ilaahi,
ana nifattichak.
Wa nafsi atchaane leek
wa jismi muchtaag leek
misil ard jafaaf atchaane le l‑almi.
2 Ana fattachtak fi l‑beet al‑mukhaddas
le nichiif gudurtak wa majdak.
3 Aywa,
kheerak adiil ziyaada min al‑haya
wa lisaani yimajjidak !
4 Be da,
ana nachkurak tuul hayaati
wa narfaʼ iideeni wa ninaadi usmak.
5 Nafsi chibʼat misil be laham samiin wa mukhkh
wa lisaani yafrah wa khachmi yachkurak be khine.
6 Kan fi sariiri ana nifakkir foogak,
nahmudak tuul al‑leel.
7 Achaan inta bigiit leyi fazaʼ
wa tihit janaaheek,
ana niragrig min al‑farah.
8 Nafsi mutamassike be mutaabaʼatak
wa iidak al‑zeene karabatni.
9 Laakin al‑yidooru mooti,
khalli yahlako
wa yadkhulu fi l‑khubuur fi tihit al‑ard !
10 Khalli yagtaʼo ruuseehum be l‑seef
wa yabgo akil le l‑baʼaachiim !
11 Al‑malik yafrah be l‑Rabb
wa ayyi naadum al‑yahlif be usum al‑Rabb,
yachkuruuh
achaan khuchuum al‑kaddaabiin yinsaddo.