Ayyuub yibarri nafsah aakhir marra
31
1 Ana sawweet ahad maʼa nafsi
ma nichiif be chahwa le bineeye.
2 Kan sawweetah,
chunu al‑gisim al‑nalgaah
min al‑Rabb fi l‑aali ?
Wa chunu al‑warasa al‑yantiiha leyi
al‑Gaadir min foog ?
3 Al‑damaar ma waajib
le l‑naadum al‑mujrim walla ?
Wa l‑masiibe ma tagaʼ
fi l‑yisawwi al‑charr walla ?
4 Al‑Rabb ma yichiif duruubi walla ?
Wa ma yahsib kulla khatwaati walla ?
5 Kan ana macheet be kidib
aw jareet be surʼa le l‑khachch,
6 khalli al‑Rabb yawzinni
fi l‑miizaan al‑aadil
wa yaʼarif kamaali.
7 Kan ana gabbalt min al‑derib al‑adiil
wa chahwat galbi taabaʼat uyuuni
wa iideeni allattakho be l‑najaasa,
8 khalaas,
naas aakhariin yaakulu al‑teerabtah
wa yidammuru zurriiyti !
9 Kan galbi mayyal le mara
wa harastaha fi khachum baab jaari,
10 khalaas,
khalli marti kula
yichiilha raajil aakhar
wa naas katiiriin yaznooha.
11 Achaan zinaayi da yabga fiʼil cheen.
Aywa,
da khata al‑yijiib ikhaab min al‑gaadi.
12 Wa di naar al‑taakul lahaddi l‑aakhira
wa tidammir kulla intaaji.
13 Ana ma rafadt huguug abdi aw khaadmi
wakit yiwadduuni fi l‑chariiʼa.
14 Kan awwal ana sawweetah,
nisawwi chunu wakit al‑Rabb yihaasibni ?
Wa nuguul chunu wakit yasʼalni ?
15 Al‑khalagaani ana fi batun ammi
khalagaahum humman kula.
Hu nafs al‑Ilaah
al‑khattaana fi butuun ammahaatna.
16 Ana ma dahart al‑miskiin
min al‑cheyy al‑yidoorah
wa ma jarreet dumuuʼ
uyuun al‑armala.
17 Ana ma akalt akli wiheedi
wa ma dahart al‑atiim ma yuduukhah.
18 La !
Achaan min subaayi,
hu kibir maʼaayi misil maʼa abuuh
wa daayman ana daafaʼt le l‑armala.
19 Wakit ana chift naadum fagri ma indah khalag
wa miskiin ma indah khita,
20 hatta kan ma chakarooni
be kulla galibhum kula,
ana khatteethum be khattaay daafiye
min suuf khanami.
21 Hatta kan ana muhimm fi khachum baab al‑hille kula,
ana ma rafaʼt iidi le nikhawwif atiim.
22 Kan awwal ana sawweetah,
khalli iidi tingatiʼ min kitfi
wa duraaʼi yingatiʼ min kuuʼi.
23 Achaan al‑damaar al‑jaayi min al‑Rabb
yisabbib leyi ruʼub
wa fi chaan azamatah,
ma indi gudra.
24 Ana ma khatteet amaani fi l‑dahab
wa ma gult leyah :
« Nitwakkal aleek ».
25 Wa ma firiht be katarat khunaayi
wa la be khumaami al‑lammatah iidi.
26 Wa ma chift nuur al‑harraay wakit talaʼt
wa l‑gamar wakit gaaʼid yazhaf be kulla jamaalah,
27 wa galbi ma mayyal leehum be achiir
wa ana ma jaʼaltuhum misil ilaahaat le naʼabudhum.
28 Kan awwal ana sawweetah,
da khata waajib leyi al‑ikhaab,
achaan ana khunt al‑Rabb fi l‑aali.
29 Ana ma firiht be damaar
al‑adu al‑yakrahni
wa ma natteet min al‑farha
wakit al‑charr wagaʼ foogah.
30 La !
Achaan ma waajib lisaani yisawwi zanib
wa la natlub mootah be laʼana.
31 Laakin al‑naas al‑gaaʼidiin fi kheemti buguulu :
« Yaatu al‑ma chibiʼ min al‑laham fi beet Ayyuub ? »
32 Abadan,
ana ma raggadt al‑deef barra
wa baabi daayman faatih le l‑musaafiriin.
33 Ana ma misil kulla l‑naas,
nilabbid isyaani
wa khataayi kula ma dasseetah tihti
wa gaʼadt foogah.
34 Wa da achaan ana khuft min kalaam al‑naas
wa karaahiiyit al‑gabaayil khawwafatni
lahaddi ana sakatt
wa ma maragt min beeti.
Ayyuub yidoor al‑Rabb yurudd leyah
35 Fi naadum al‑yasmaʼni walla ?
Wa da kalaami al‑akhiir.
Khalli al‑Gaadir yurudd leyi !
Kan fi chakwa min aduuyi
maktuuba diddi,
36 khalaas ana nichiilha fi kitfi
wa nalbasha misil taaj fi raasi.
37 Kan misil da khalaas,
nigaddim le l‑Rabb kulla hisaab khatwaati
wa nigarrib leyah be farah misil malik.
38 Kan al‑ard chakat minni
wa juruufha andalamo foogi
39 achaan ana akalt intaajha
al‑ana ma chareetah,
wa kan zalamt siyaadah,
40 khalaas,
khalli ardi tigawwim haskaniit
fi badal al‑gameh al‑ahmar
wa andireesa
fi badal al‑gameh al‑abyad !
Wa da kalaam Ayyuub al‑akhiir.