Ayyuub yihajji be l‑taʼab al‑foogah
30
1 Laakin hassaʼ,
humman al‑subyaan minni yadhako foogi.
Wa zamaan,
ana hagart abbahaathum,
chiyyaab al‑ma tammo kulaab le yahfado khanami.
2 Wa l‑chiyyaab dool,
gudrithum tanfaʼni be chunu ?
Achaan khuwwithum kammalat.
3 Min al‑juuʼ wa l‑fagur,
fattacho akil fi ard al‑jafaaf
al‑min zamaan hilkat wa addammarat.
4 Humman gataʼo al‑mikhkheet min chadara
wa akalo min taman uruug al‑ratam.
5 Taradoohum min ust al‑naas
wa aato waraahum misil wara l‑saraariig.
6 Humman sakano
fi l‑wudyaan al‑yaabsiin
wa fi nugaar al‑ard
wa karaakiir al‑jibaal.
7 Humman kawwako misil al‑hamiir fi lubb al‑khaaba
wa ragado fi l‑haskaniit.
8 Humman iyaal al‑mataamiis al‑ma induhum usum
wa matruudiin min al‑balad.
9 Wa hassaʼ,
iyaalhum al‑subyaan dool
yisawwuuni khinneeye
wa yadurbu beyi masal.
10 Achaan hasabooni misil muharram,
yibaʼʼudu minni
lahaddi yibazzukhu leyi fi wijhi
wa ma yajʼalooni.
11 Al‑Rabb rakha habil nubbaali wa ayyabaani
wa be da,
humman ma yiwaggufu fasaalithum minni.
12 Fi zeenaayti,
chariiriin katiiriin yugummu
le yicharkulu leyi wa yarmuuni
wa yugummu diddi le yiwadduruuni.
13 Humman yagtaʼo leyi al‑derib
wa bala musaaʼadat al‑aakhariin
yidooru yidammuruuni.
14 Humman yadkhulu leyi be khurma kabiire
wa yawsalooni misil mooj al‑bahar.
15 Al‑ruʼub gabbal diddi
wa charafi faat misil chaalatah riih
wa najaati faatat misil sahaab.
16 Wa hassaʼ,
nafsi antahat
wa ayyaam al‑taʼab wagaʼo foogi.
17 Be l‑leel,
udaami boojaʼooni chadiid
wa yilmaadakhooni ma yagiifu.
18 Be unuf,
al‑Rabb karabaani min khalagi
wa gabbabni min jallaabiiyti.
19 Hu ramaani fi l‑tiine
wa ana bigiit misil ajaaj wa rumaad.
20 Ya Rabb !
Ana koorakt leek
wa inta ma raddeet leyi.
Ana wagaft be tuuli
wa inta ma wajjaht aleyi.
21 Inta ma indak leyi rahma
wa iidak hajamatni be kulla gudritha.
22 Inta rakkabtini fi l‑riih wa waddeetni
wa rameetni fi amzoobaʼaane.
23 Aywa,
ana irift kadar tiwaddiini le l‑moot
al‑beyah inta waaʼadt kulli makhluug hayy.
24 Al‑yagaʼ,
ma indah hagg yimidd iidah walla ?
Wa l‑yidoor al‑fazaʼ,
ma indah hagg yikoorik walla ?
25 Aywa,
ana bakeet le l‑hayaatah fi l‑taʼab
wa wassaft mahannati le l‑miskiin.
26 Ana zaati hasabt nalga al‑kheer
laakin jaani al‑charr.
Ana narja al‑nuur
wa jaani al‑dalaam.
27 Wa butuuni hirgo ayyi wakit
wa ana waajaht ayyaam al‑taʼab.
28 Ana raayikh be taʼab wa bigiit azrag
wa laakin ma min hamu al‑harraay.
Wa gammeet fi ust al‑mujtamaʼ
wa koorakt le l‑fazaʼ.
29 Ana bigiit akhu al‑baʼaachiim
wa rafiig al‑naʼaam.
30 Farwit jildi dallamat
wa udaami yibalbulu foogi min al‑wirde.
31 Ana bigiit misil jigindiiyit khine al‑hizin
wa suffaarit hiss al‑bakkaayiin.