Ayyuub yichchammat le fazaʼ Bildad
26
1 Wa Ayyuub chaal al‑kalaam wa gaal :
2 Chunu al‑fazaʼ al‑inta jibtah leyi,
ya Bildad ?
Ana al‑ma indi gudra !
Aywa,
inta tahsib tinajji
al‑duraaʼ al‑ma chadiid walla ?
3 Wa inta tagdar tanti wasiiye
le l‑ma indah hikma walla ?
Wa tiʼarrif be katarat ilmak walla ?
4 Wa laakin kalaamak da,
muwajjah le yaatu ?
Wa ligiit al‑wahi da min yaatu ?
Kalaam Bildad fi Allah al‑Gaadir
5 Al‑maytiin yarjufu tihit al‑almi
wa tihit al‑saakniin foogah.
6 Giddaam al‑Rabb,
kulla l‑khubuur makchuufiin
aywa,
bakaan al‑halaak
ma mukhatta minnah.
7 Hu yimidd al‑sama al‑munchaakhi fi l‑faadi
wa yiʼallig al‑ard fi l‑hawa.
8 Hu yakhzin al‑almi fi l‑sahaab
wa l‑sahaab ma yinfajir min tagalatah.
9 Hu yikhatti archah
wa yisiddah be sahaabah.
10 Al‑Rabb sawwa daayira fi l‑almi
lahaddi l‑huduud al‑been al‑nuur wa l‑dalaam.
11 Amad al‑sama yinhazzo
wa yinbahtu min tahdiidah.
12 Be gudurtah,
hu hayyaj al‑bahar
wa be ilmah,
dammar Rahab khuul al‑bahar.
13 Be nafkhatah,
al‑sama bigi saafi
wa iidah katal al‑daabi al‑muʼarrid.
14 Wa dool al‑askhar fi amalah
wa di bas al‑mukhaala al‑nasmaʼooha.
Kan misil da,
yaatu yafham raʼad gudurtah ?