Ayyuub yidoor al‑aasiyiin yilʼaakhabo
24
1 Maala al‑Gaadir ma gataʼ wakit
le l‑ikhaab ?
Wa maala al‑yaʼarfuuh
ma chaafo ayyaamah ?
2 Al‑aasiyiin yihawwulu alaamaat al‑huduud
wa yasurgu al‑bagar
wa yasraho beehum.
3 Humman yichiilu humaar al‑ataama
wa yakurbu fi l‑damaan toor al‑armala.
4 Yaturdu al‑masaakiin min al‑derib
wa fagraaniin al‑balad yillabbado minhum.
5 Aywa !
Al‑masaakiin yamchu le khidmithum
misil hamiir al‑kadaade yifattuchu akil fi l‑sahara.
Humman yiʼakkulu iyaalhum
fi ard jafaaf.
6 Fi l‑ziraaʼa,
al‑masaakiin yilimmu alfa
wa fi jineenit al‑aasi,
yilimmu inab.
7 Tuul al‑leel,
humman aryaaniin bala khulgaan
wa ma induhum khita min al‑bardaay.
8 Matar al‑yanzil fi l‑jibaal yibilluhum
wa min gillit al‑maskan,
yittaako fi l‑hajar.
9 Wa l‑aasiyiin yaglaʼo al‑atiim
be gu min ammah
wa yakurbu damaan
min al‑fagraaniin.
10 Al‑masaakiin maachiin aryaaniin
ma induhum khulgaan
wa be juuʼhum,
yangulu al‑gechch.
11 Fi lubb al‑zaraayib,
yaʼasuru dihin
wa yaʼasuru al‑inab
wa laakin ma induhum hagg yuduukhuuh.
12 Wa fi daakhal al‑madiina,
al‑taʼbaaniin yaguntu
wa l‑majruuhiin yikooruku le l‑fazaʼ
wa laakin al‑Rabb ma yasmaʼhum.
Amal al‑aasiyiin
13 Wa l‑aasiyiin muʼaaridiin le nuur al‑nahaar
wa ma yaʼarfu turugah
wa ma yamchu fi duruubah.
14 Wa l‑kaatil yugumm fi wakt al‑chagaag
yaktul al‑miskiin wa l‑fagraan
wa yasrig be l‑leel.
15 Al‑zaani yarja al‑leel wa yuguul :
« Ma fi naadum yichiifni. »
Hu yikhatti wijhah
achaan ma yaʼarfuuh.
16 Fi l‑dalaam,
yasrig al‑buyuut
wa be l‑nahaar,
yinsadda daakhal ma yidoor al‑nuur.
17 Aywa,
leehum humman kulluhum
al‑dalaam al‑haalik misil al‑sabaah
achaan humman waalafo
be ruʼub al‑leel.
Kalaam Suufar fi l‑aasiyiin
18 Wa intu tuguulu :
« Humman misil al‑tibin
al‑chaaylah almi.
Naas al‑balad yalʼano turaabhum
wa ma fi al‑yakhdim fi jineenaat inabhum. »
19 Wa tuguulu :
« Misil al‑jafaaf wa l‑hamu
yimawwuʼu al‑talaj
misil da,
al‑moot yichiil al‑muznib.
20 Wa ammah al‑wildatah kula tansaah
wa janaaztah tiʼaffin
wa tabga laziize le l‑duud.
Naas abadan ma yizzakkarooh
wa zulmah yiddammar
misil chadara al‑wagaʼat. »
21 Laakin hu yisawwi al‑fasaala
le l‑mara al‑aagre al‑ma indaha iyaal
wa ma yarham al‑armala.
22 Laakin al‑Rabb be gudurtah,
hu bas al‑yamrug siyaad al‑unuf.
Wakit yugumm,
humman dool ma yalgo al‑haya.
23 Al‑Rabb yikhalliihum fi l‑amaan
wa laakin hu yiraakhib duruubhum.
24 Wa l‑aasiyiin bigo aaliyiin
wa baʼad chiyya,
yabgo ma fiihum.
Humman yidaffugu misil al‑nuwwaar
wa yagtaʼoohum misil yagtaʼo al‑ganaadiil.
25 Wa kan misil da,
yaatu yikaddibni ?
Wa yaatu yuguul kalaami da ma sahiih ?