Amal al‑aasi wa ikhaabah
20
1 Wa Suufar al‑min Naʼama chaal al‑kalaam wa gaal :
2 Daahu afkaari al‑bikhawwufuuni
yajburuuni le nurudd
wa da be sabab gillit sabri.
3 Ana simiʼt kalaam al‑yiʼayyibni
wa laakin nafsi bas antatni radd.
4 Inta taʼarif min zamaan,
min wakit al‑Rabb khalag al‑insaan
wa khattaah fi l‑ard,
5 farah al‑aasi ma yitawwil
wa suruur al‑kaafir kula le wakit chiyya bas.
6 Hatta kan tuulah yalhag al‑sama
wa raasah yalmas al‑sahaab kula,
7 hu yabga ma fiih marra waahid misil huraarah
wa l‑yaʼarfuuh yuguulu :
« Ween hu ? »
8 Hu yabga misil hilim,
ma yalgo minnah cheyy
wa yaturduuh misil ruʼyat al‑leel.
9 Wa een al‑awwal tichiifah
ma tichiifah battaan.
Wa l‑bakaan al‑sakan foogah
kula ma yichiifah battaan.
10 Iyaal al‑aasi yigabbulu
huguug al‑masaakiin
wa iideenah yirajjuʼu
al‑maal al‑hu nahabah.
11 Udaam al‑aasi
induhum gudra fi chabaabah
wa laakin yidissuuhum maʼaayah
fi l‑turaab.
12 Al‑fasaala fi khachum al‑aasi misil halaawa,
hu yilabbidha tihit lisaanah.
13 Hu yumussaha wa ma yagiif
wa yudummaha fi chidgah.
14 Wa laakin aklah da yatlaf fi lubb batnah
wa yabga misil samm amchideegaat.
15 Al‑maal al‑hu zaratah yigaddifah
wa l‑Rabb bas yamurgah min batnah.
16 Hu gaaʼid yumuss samm al‑daabi
wa yaktulah misil samm amchideegaat.
17 Al‑rujuul wa l‑buhuur
wa l‑wudyaan hana l‑asal wa l‑zibde,
hu abadan ma yichiifhum.
18 Hu yigabbil al‑chaalah,
ma yagdar yazurtah.
Wa l‑khuna al‑yalgaah min tijaartah,
hu ma yitmattaʼ beyah.
19 Achaan hu rihik wa aba al‑masaakiin
wa nahab buyuut badal yabniihum.
20 Achaan batnah ma taʼarif al‑chabaʼ
wa cheyy yanja minnah ke ma fiih.
21 Ma fi al‑yanja min tamaʼah
wa be da,
raahtah ma titawwil.
22 Fi wakit khunaayah bas,
al‑diige tagaʼ foogah
wa kulla tagalat al‑taʼab taji foogah.
23 Wakit hu machkhuul be batnah,
al‑Rabb yinazzil foogah khadabah al‑chadiid
Wa yinazzilah foogah misil matara
wa da bas yabga aklah.
24 Kan yajri min silaah al‑hadiid kula,
nuchchaab al‑nahaas yatʼanah.
25 Kan yamrug al‑nuchchaab min jismah
wa raas al‑nuchchaab min kibditah,
khalaas al‑khoof min al‑moot yakurbah.
26 Kulla l‑dalaam mahfuud le khunaayah
wa naar al‑ma nafakhha naadum,
taakulah
wa masiibe tagaʼ fi l‑faddal fi kheemtah.
27 Al‑sama takchif zanbah
wa l‑ard tugumm diddah.
28 Al‑seel yarmi beetah
wa yiwaddiih fi yoom khadab al‑Rabb.
29 Khalaas,
daahu al‑gisim
al‑jahhazah al‑Rabb le l‑aasi
wa di al‑warasa
al‑hu kharrarha leyah.