Ayyuub chaka
19
1 Wa Ayyuub chaal al‑kalaam wa gaal :
2 Le mata tiʼazzubuuni
wa tarhakooni be kalaamku ?
3 Daahu achara marraat hintuuni.
Wakit titaʼʼubuuni,
al‑eeb ma yisawwiiku walla ?
4 Wa kan sahiih ana sawweet khata kula,
khataayi da yagaʼ foogi ana bas.
5 Wa kan sahiih intu tugummu diddi
wa tuluumuuni fi eebi kula,
6 aʼarfu kadar al‑Rabb bas sawwa leyi al‑fasaala di
wa dassaani fi charakah.
7 Daayman nasrakh min al‑unuf al‑foogi,
wa ma ligiit radd.
Wa ninaadiih le l‑fazaʼ kula,
wa ma ligiit hagg.
8 Al‑Rabb sadda leyi al‑tariig le ma niʼaddi
wa khatta derbi be l‑dalaam.
9 Hu marag minni charafi
wa salla taaj raasi.
10 Hu haddamaani min kulli jiihe
wa ana mutt.
Wa misil yamurgu chadara,
hu marag achami.
11 Zaʼalah gamma misil naar diddi
wa hu sawwaani misil aduuh.
12 Wa hu rassal askarah be katara
wa fattacho derib le yawsalooni
wa haasaro kheemti min kulli jiihe.
Kulla l‑naas kirho Ayyuub
13 Al‑Rabb baʼʼad akhwaani minni
wa l‑yaʼarfuuni antooni duhuurhum.
14 Ahali bigo ma fiihum
wa l‑yaʼarfuuni kula nisooni.
15 Wa diifaani wa khaddaamaati
sawwooni misil ajnabi.
Wa bigiit deef giddaamhum,
ma yihtarumuuni.
16 Wa kan naadeet khaddaami kula,
ma yurudd leyi
hatta kan nachhadah kula.
17 Riihit khachmi tizaawil galib marti
wa ana bigiit afin le iyaal musraani.
18 Hatta iyaal dugaag fi l‑chaariʼ
yahguruuni
wa kan chaafooni maachi,
yichchammato foogi.
19 Wa kulla rufgaani jaʼalooni misil muharram
wa l‑niriidhum kula gabbalo diddi.
20 Wa faddal foogi illa l‑adum wa l‑farwa
wa nijiit illa be nakham sunuuni.
21 Hinnu foogi !
Hinnu foogi,
intu rufgaani !
Achaan iid al‑Rabb darabatni.
22 Maala titaʼʼubuuni
misil taʼab al‑Rabb leyi ?
Ma chibiʼtu min akil lahami walla ?
23 Yaareet kalaami da yinkatib
wa yarsumuuh fi kitaab.
24 Wa yaktubuuh be khalam hana hadiid
wa yagood manguuch daayman fi hajar.
Ayyuub indah acham fi l‑yafdaah
25 Wa laakin ana naʼarif kadar al‑yafdaani,
hu hayy
wa fi l‑akhiir,
hu yachhad leyi.
26 Wa baʼad farwiti addammarat,
ana zaati nichiif al‑Rabb.
27 Wa hu bas al‑ana nichiifah
wa uyuuni kula yichiifuuh ma khariib leyi.
Galbi fi daakhili muchtaag leyah.
28 Wa tuguulu :
« Kikkeef nitaʼʼubuuh ?
Le nalgo sabab nichaaruʼu beyah. »
29 Wa be da khalaas,
akhaafo le nufuusku min al‑seef
achaan kalaamku yijiib leeku
al‑ikhaab be l‑seef
wa be da,
taʼarfu kadar fiyah ikhaab.