Al‑insaan wildooh le l‑taʼab
5
1 Ya Ayyuub,
naadi !
Hal fi naadum yurudd leek walla ?
Wa min al‑malaaʼika
inta tiwajjih ale yaatu ?
2 Achaan al‑zaʼal yaktul al‑munaafikh
wa l‑husud yikammil al‑mukhaffal.
3 Ana chift al‑munaafikh dassa uruugah
laakin tawwaali,
ana laʼant
naas beetah wa gult :
4 « Khalli iyaalah ma yalgo fazaʼ
fi khachum baab al‑hille.
Khalli yihaakumuuhum fi l‑chariiʼa
wa ma fi naadum al‑yinajjiihum !
5 Khalli al‑jiiʼaaniin yaakulu
intaaj al‑munaafikh da.
Aywa,
yichiilu intaajah
al‑fi lubb zaraayib al‑chook kula !
Wa khalli al‑tammaaʼiin
yichiilu khunaayah. »
6 Sahiih,
al‑charr ma yamrug
min al‑turaab
wa l‑fasaala ma tabzur
min al‑ard.
7 Laakin al‑insaan wildooh le l‑taʼab
misil charaar al‑naar al‑yugumm wa yitiir.
Al‑Rabb yinajji al‑daʼiif
8 Laakin kan leyi ana,
nifattich al‑Rabb
wa leyah hu bas narfaʼ daliimti.
9 Hu yisawwi achya kubaar al‑ma yinfahmu
wa ajaayib bala adad.
10 Hu bas al‑yinazzil matara fi wijh al‑ard
wa yazgi beeha al‑ziraaʼa.
11 Hu yarfaʼ al‑masaakiin foog,
wa l‑gaaʼidiin fi l‑dalaam yalgo al‑naja.
12 Hu yifachchil fikir al‑najiidiin
achaan ma yanjaho be khidmit iideehum.
13 Hu yarmi al‑hakiimiin fi charak muʼaamarathum
wa yifachchil choorit al‑munaafikhiin.
14 Be nahaar,
al‑naas dool yiwaajuhu dalaam
wa be gaayle,
yiddaggacho misil be l‑leel.
15 Laakin al‑Rabb yinajji al‑daʼiif
min lisaanhum al‑tariin
aywa,
yinajji al‑miskiin
min iid al‑chadiid.
16 Khalaas,
al‑daʼiifiin yalgo acham
wa l‑zaalimiin khuchuumhum yinsaddo.
17 Mabruuk le l‑insaan
al‑yiʼaddibah al‑Rabb !
Wa misil da,
inta kula,
ma taaba hidaayat al‑Gaadir !
18 Achaan al‑Rabb bas yajrah wa yidaawi
wa yikassir wa be iideenah,
yirakkib.
19 Wa sitte marraat,
hu yinajjiik
min al‑taʼab
wa fi l‑marra al‑saabʼe kula,
al‑fasaala ma talhagak.
20 Wa fi wakt al‑juuʼ,
hu yafdaak min al‑moot
wa fi l‑harib,
yafdaak min darbit al‑seef.
21 Tiddaarag min darbit al‑lisaan
wa ma takhaaf min al‑damaar wakit yaji.
22 Tichchammat le l‑damaar wa l‑juuʼ
wa ma takhaaf min haywaanaat al‑kadaade.
23 Achaan indak alaakha maʼa hujaar al‑kadaade
wa salaam maʼa haywaanaat al‑kadaade.
24 Be da,
taʼarif kadar fi kheemtak
fiyah salaam
wa tiraakhib marʼaak wa cheyy
ma yigassir leek.
25 Tichiif zurriiytak tabga katiire
wa iyaalak yabgo misil gechch al‑ard.
26 Wa be gudurtak bas,
tumuut wa tanzil fi l‑khabur
misil jurun al‑ganaadiil fi wakithum.
27 Daahu al‑cheyy da,
aniina haggagna minnah
wa be misil da,
inta asmaʼah
wa ahfadah le nafsak.