Awwal kalaam Alifaaz
4
1 Wa khalaas,
Alifaaz al‑min balad Teemaan chaal al‑kalaam wa gaal :
2 Hal kan naadum haawal yikallim leek,
inta tilhammal walla ?
Wa laakin yaatu yagdar
yiwaggif kalaamah ?
3 Daahu inta addabt naas katiiriin
wa gawweet iide al‑diʼfo
4 wa kalaamak lazam al‑yittartaʼo
wa gawwa rikab al‑iyo.
5 Wa wakit al‑bala da ja leek
khalaas,
sabrak waddar.
Wa wakit lihigak,
inta barjalt.
6 Takhwaak ma damaan leek walla ?
Wa kamaalak ma yantiik acham walla ?
7 Min fadlak,
azzakkar.
Hal simiʼt yoom waahid bari hilik ?
Aw saalihiin addammaro ?
8 Ana chift al‑yiteerubu al‑charr
wa l‑yazraʼo al‑fasaala,
humman bas yalgo natiijithum.
9 Be nafkha min al‑Rabb,
yiddammaro
wa be riih khadabah,
yikammulu.
10 Al‑Rabb yisakkit gargaraan al‑duud
wa hiss al‑wuhuuch.
Wa yilkassaro
sunuun iyaal al‑duud.
11 Al‑duud yumuut min gillit al‑akil
wa iyaal al‑duudaay yichittu.
12 Wa ja leyi kalaam be achiir
wa adaani simʼat al‑mukhaala.
13 Wakit afkaar al‑bikhawwufu yaju min hilim al‑leel
wa wakit noom chadiid karab al‑naas,
14 al‑khoof wa l‑rajafaan karabooni
wa udaami rajafo ziyaada.
15 Wa riih faatat be wijhi
wa suuf jildi gamma.
16 Wa naadum ja wagaf giddaami
wa ana ma irift chaklah.
Wa suurtah gaaʼide giddaam uyuuni
wa be hudu,
simiʼt hiss al‑buguul :
17 « Bani Adam saalih ziyaada
min al‑Rabb walla ?
Wa l‑naadum taahir ziyaada
min al‑Khaalig walla ?
18 Al‑Rabb ma yiʼaamin khaddaamiinah
aywa,
yichiif malaaʼikatah khaltaaniin.
19 Kan misil da,
kikkeef yiʼaamin Bani Adam
al‑jisimhum misil buyuut al‑tiine ?
Wa kikkeef yiʼaamin al‑khalagaahum min turaab
wa l‑yinrahku ajala min al‑arda ?
20 Min al‑fajur le l‑achiiye,
yilkassaro.
Ma fi al‑yifakkir fooghum
wa yiddammaro ila l‑abad.
21 Hubaal khiyamhum yamurguuhum
wa humman yumuutu bala hikma. »