Yachuuʼ wa Zarubaabil bano madbah
3
1 Wa wakit al‑chahar al‑saabiʼ ja,
kulla Bani Israaʼiil jo min mudunhum wa lammo fi Madiinat al‑Khudus be galib waahid.
2 Wa Yachuuʼ wileed Yuusaadikh maʼa akhwaanah rujaal al‑diin wa Zarubaabil wileed Chaltiyiil maʼa akhwaanah,
humman bano madbah le Allah Ilaah Bani Israaʼiil achaan yigaddumu foogah dahaaya muharragiin misil maktuub fi Tawraat Muusa abd Allah.
3 Wa humman khaayfiin min al‑gabaayil al‑muhawwigiinhum wa laakin be khoofhum da kula,
bano al‑madbah fi asaasah al‑awwal.
Wa gaddamo foogah dahaaya muharragiin le Allah.
Wa dool dahaaya hana l‑fajur wa hana l‑achiiye.
4 Wa ayyado iid al‑Lagaadiib misil maktuub fi kitaab al‑Tawraat.
Wa fi tuul ayyaam al‑iid,
kulla yoom yigaddumu dahaaya adad al‑waajib hasab al‑churuut.
5 Wa baʼad al‑iid,
gaddamo dahiiye muharraga daayme wa dahiiye hana awwal yoom fi kulli chahar wa dahiiye hana kulli yoom iid mukhaddas le Allah wa dahaaya hana l‑naas al‑antoohum be niiyithum.
6 Wa gabul asaas beet Allah ma khattooh,
humman bado yigaddumu dahaaya muharragiin le Allah min al‑yoom al‑awwal hana l‑chahar al‑saabiʼ.
Bidaayit buna beet Allah
7 Wa anto fudda le l‑naas al‑gataʼo hujaar al‑buna wa le l‑khachchaabiin.
Wa rassalo maʼaach wa charaab wa dihin le naas mudun Seeda wa Suur achaan yijiibu leehum khachab hana chadar al‑arz min balad Lubnaan wa yiwadduuh be l‑bahar lahaddi hillit Yaafa.
Wa da kulla sawwooh be izin Kuurach malik balad Faaris.
8 Wa fi l‑chahar al‑taani hana l‑sana al‑taaniye baʼad gabbalo min al‑khurba,
Zarubaabil wileed Chaltiyiil wa Yachuuʼ wileed Yuusaadikh wa akhwaanhum rujaal al‑diin al‑aakhariin wa l‑Laawiyiin wa kulla l‑naas al‑gabbalo min al‑khurba,
kulluhum jo fi Madiinat al‑Khudus wa bado al‑khidme.
Wa wakkalo al‑Laawiyiin al‑umurhum min 20 sana wa foog achaan yiraakhubu buna beet Allah.
9 Wa Yachuuʼ al‑min al‑Laawiyiin maʼa iyaalah wa akhwaanah wa Khadmiyiil maʼa iyaalah al‑min gabiilat Yahuuza,
humman kulluhum yiraakhubu bannaayiin beet Allah.
Wa Hinadaad al‑min al‑Laawiyiin maʼa iyaalah wa akhwaanah kula maʼaahum.
10 Wa wakit al‑bannaayiin khatto asaas beet Allah,
rujaal al‑diin gaʼado ayyi waahid fi bakaanah be khulgaanah al‑khaassiin wa be burunji fi iidah.
Wa l‑Laawiyiin min zurriiyit Asaaf gaʼado be nagaagiir achaan yahmudu Allah misil Dawuud malik Israaʼiil zamaan amaraahum beyah.*
11 Wa majmuuʼa waahide minhum hamadat wa chakarat Allah be khine wa l‑aakhariin rafaʼo wa gaalo :
« Inta rahiim wa rahmatak daayme fi Israaʼiil ila l‑abad !
» Wa kulla l‑chaʼab gammo firho be ziyaada wa hamado Allah achaan khatto asaas beet Allah.
12 Wa laakin katiiriin min al‑chiyyaab wa rujaal al‑diin wa l‑Laawiyiin wa kubaaraat al‑aayilaat,
wakit khatto asaas beet Allah giddaamhum,
bako be hiss aali achaan humman chaafo beet Allah al‑zamaani.
Wa naas aakhariin kamaan aato be farha.
13 Wa l‑naas ma gidro mayyazo min aayit al‑farha wa min al‑baki achaan kulla l‑chaʼab gaaʼidiin yiʼiitu bilheen wa harakathum gaaʼide tinsamiʼ min baʼiid.