Hizkhiiya bigi malik fi Yahuuza
29
1 Wa Hizkhiiya indah 25 sana wakit bigi malik wa hakam 29 sana fi Madiinat al‑Khudus.
Wa ammah usumha Abiiya bineeyit Zakariiya.
2 Wa Hizkhiiya sawwa al‑adiil giddaam Allah misil jiddah Dawuud sawwaah.
3 Fi awwal sana hana hukmah fi l‑chahar al‑awwal,
hu fatah battaan biibaan beet Allah wa addalaahum.
4 Wa naadaahum le rujaal al‑diin wa l‑Laawiyiin wa lammaahum fi l‑fadaay al‑sabhaaniiye hana beet Allah.
5 Wa gaal leehum :
« Asmaʼo,
ya l‑Laawiyiin.
Hassaʼ da,
khassusu nufuusku wa tahhuru beet Allah Rabb juduudku wa amurgu al‑najaasa min al‑beet al‑mukhaddas.
6 Achaan abbahaatna iso wa sawwo al‑fasaala giddaam Allah Ilaahna.
Humman nakarooh wa abo ma yamchu fi beet Allah wa antooh daharhum.
7 Wa humman gaffalo biibaan beet Allah wa katalo al‑fawaaniis wa ma harrago bakhuur wa la gaddamo dahaaya le Allah Ilaah Bani Israaʼiil fi l‑bakaan al‑mukhaddas.
8 Wa be da,
khadab Allah nazal fi balad Yahuuza wa Madiinat al‑Khudus.
Wa hu sawwaahum masal al‑bikhawwif wa kharaab wa bahiite misil intu gaaʼidiin tichiifuuh.
9 Wa be sabab da,
abbahaatna maato fi l‑harib wa awlaadna wa banaatna wa awiinna karaboohum wa waddoohum masaajiin.
10 Wa hassaʼ da,
ana chilt niiye nisawwu muʼaahada maʼa Allah Ilaah Bani Israaʼiil achaan yarfaʼ minnina khadabah al‑muhrig.
11 Ya akhwaani !
Hassaʼ da,
khallu al‑kasal achaan Allah azalaaku le tagiifu giddaamah wa takhdumu leyah.
Wa tabgo khaddaamiinah al‑yiharrugu leyah al‑bakhuur. »
12 Wa khalaas,
al‑Laawiyiin gammo yakhdumu fi beet Allah wa humman
Mahat wileed Amaasaay wa Yuwiil wileed Azarya
min khachum beet Gahaat
wa Khiich wileed Abdi wa Azarya wileed Yahalaaliil
min khachum beet Maraari
wa Yuwaakh wileed Zimma wa Idaan wileed Yuwaakh
min khachum beet Girchuun
13 wa Chimri wa Yaʼiyiil
min khachum beet Alisaafan
wa Zakariiya wa Mattanya
min khachum beet Asaaf
14 wa Yahiyiil wa Chimʼi
min khachum beet Heemaan
wa Chamaʼya wa Uzziyiil
min khachum beet Yaduutuun.
15 Wa baʼad da,
lammo kulla akhwaanhum wa khassaso nufuushum wa macho le yitahhuru beet Allah hasab amur al‑malik wa hasab kalaam Allah.
16 Wa khalaas,
rujaal al‑diin dakhalo fi lubb beet Allah le yitahhuruuh.
Wa marago kulla l‑achya al‑nijsiin min beet Allah wa jaaboohum barra fi l‑fadaay.
Wa l‑Laawiyiin chaalo al‑achya dool wa waddoohum zagaloohum barra fi waadi Khidruun.
17 Wa humman bado yikhassusu beet Allah fi l‑yoom al‑awwal hana l‑chahar al‑awwal.
Wa fi l‑yoom al‑taamin hana l‑chahar da,
wassalo fi khurfit madkhal beet Allah.
Wa khassaso beet Allah muddit tamaane yoom battaan wa kammalo fi yoom 16 hana l‑chahar al‑awwal.
18 Wa baʼad da,
macho le l‑malik Hizkhiiya wa gaalo leyah :
« Aniina tahharna kulla beet Allah wa l‑madbah hana l‑dahaaya al‑muharragiin wa kulla muʼiddaatah wa l‑tarabeeza al‑yigaddumu foogha al‑khubza wa kulla muʼiddaatha.
19 Wa tahharna kulla l‑muʼiddaat al‑najjasaahum al‑malik Ahaaz wakit hu isi Allah fi wakit hukmah.
Wa daahu khatteenaahum giddaam madbah Allah. »
20 Wa l‑malik Hizkhiiya gamma be fajur badri wa lamma kulla hukkaam al‑madiina wa macha maʼaahum le beet Allah.
21 Wa jaabo sabʼa toor wa sabʼa kabich wa sabʼa hamal wa sabʼa tees le yigaddumuuhum dahaaya le kaffaarat al‑zanib le l‑mamlaka wa le l‑beet al‑mukhaddas wa le kulla naas balad Yahuuza.
Wa l‑malik gaal le rujaal al‑diin min zurriiyit Haaruun yigaddumu al‑dahaaya dool fi madbah Allah.
22 Wa humman dabaho al‑tiiraan wa chaalo al‑damm wa rachchooh fi l‑madbah.
Wa dabaho al‑kubchaan wa rachcho al‑damm fi l‑madbah.
Wa dabaho al‑humlaan wa rachcho al‑damm fi l‑madbah.
23 Wa baʼad da,
jaabo kulla l‑tuyuus al‑humman dahaaya le kaffaarat al‑zanib giddaam al‑malik wa l‑mujtamaʼ.
Wa kulluhum khatto iideehum fooghum.
24 Wa rujaal al‑diin dabaho al‑tuyuus dool dahaaya le kaffaarat al‑zanib wa rachcho al‑damm fi l‑madbah achaan yisawwu kaffaara le kulla Bani Israaʼiil.
Achaan al‑malik gaal yigaddumu al‑dahaaya al‑muharragiin dool le kaffaarat al‑zanib hana kulla Bani Israaʼiil.
25 Wa khalaas,
al‑malik khatta rujaal al‑diin fi beet Allah be aalaathum hana l‑musiikha misil al‑nagaagiir wa l‑jigindiiye wa amsibeybe.
Wa da hasab amur al‑malik Dawuud wa Gaad al‑nabi al‑yichiif ruʼya le l‑malik wa Naataan al‑nabi achaan al‑amur da ja min Allah be waasitat al‑anbiya dool.
26 Wa l‑Laawiyiin wagafo fi bakaanhum be aalaathum hana l‑musiikha al‑sawwaahum Dawuud wa rujaal al‑diin kamaan be burunji.
27 Wa Hizkhiiya amar yigaddumu al‑dahaaya al‑muharragiin fi l‑madbah.
Wa wakit bado yigaddumu al‑dahaaya dool,
al‑chaʼab gammo yimajjudu Allah be khine wa daribiin al‑burunji wa be aalaat al‑musiikha al‑sawwaahum Dawuud malik Bani Israaʼiil.
28 Wa kulla l‑chaʼab gaʼado saajidiin wa l‑khannaayiin gaaʼidiin yikhannu wa yadurbu al‑burunji lahaddi gaddamo kulla l‑dahaaya dool.
29 Wa wakit gaddamo kulla l‑dahaaya dool khalaas,
al‑malik wa kulla l‑naas al‑maʼaayah dangaro wa sajado.
30 Wa baʼad da,
al‑malik Hizkhiiya wa masaaʼiilah gaalo le l‑Laawiyiin waajib yachkuru Allah be kalimaat Dawuud wa Asaaf al‑nabi al‑yichiif ruʼya.
Wa humman chakaro Allah be farha wa dangaro wa sajado.
31 Wa Hizkhiiya hajja battaan wa gaal :
« Hassaʼ da,
intu al‑jibtu dahaaya le Allah,
garrubu wa jiibu dahaayaaku hana l‑chukur wa dahaayaaku al‑aakhariin wa gaddumuuhum fi beet Allah.
» Wa khalaas,
kulla l‑chaʼab jaabo dahaayaahum hana l‑chukur wa dahaayaahum al‑aakhariin.
Wa kulla l‑naas al‑guluubhum kariimiin gaddamo dahaayaahum al‑muharragiin kula.
32 Wa l‑adad hana l‑dahaaya al‑muharragiin al‑jaaboohum al‑chaʼab bigi 70 toor wa 100 kabich wa 200 hamal wa kulluhum ke gaddamoohum dahaaya muharragiin le Allah.
33 Wa kan le l‑dahaaya al‑aakhariin,
jaabo 600 bagar wa 3 000 khanam.
34 Wa laakin rujaal al‑diin humman chiyya,
ma gidro yaslakho kulla l‑dahaaya dool.
Wa akhwaanhum al‑Laawiyiin jo wa saaʼadoohum lahaddi kammalo al‑khidme di wa lahaddi rujaal al‑diin khassaso nufuushum.
Achaan al‑Laawiyiin induhum niiye mukhlisa wa khassaso nufuushum le khidmit Allah ziyaada min rujaal al‑diin.
35 Wa battaan be l‑dahaaya al‑muharragiin al‑katiiriin dool,
gaddamo chaham dahaaya al‑salaama wa hadaaya charaab.