Ahaaz bigi malik fi Yahuuza
28
1 Wa Ahaaz indah 20 sana wakit bigi malik wa hakam 16 sana fi Madiinat al‑Khudus.
Wa hu ma sawwa al‑adiil giddaam Allah misil jiddah Dawuud.
2 Wa laakin hu taabaʼ derib muluuk mamlakat Israaʼiil wa hu kula sawwa asnaam le ibaadat al‑ilaah Baʼal.
3 Wa hu gaddam bakhuur fi waadi Bani Hinnuum wa gaddam iyaalah wa harragaahum fi l‑naar.
Wa da nafs al‑muharramaat al‑sawwoohum al‑umam al‑Allah galaʼ minhum arduhum wa antaaha le Bani Israaʼiil.
4 Wa Ahaaz gaddam dahaaya wa harrag bakhuur fi l‑bakaanaat al‑aaliyiin hana ibaadat al‑asnaam wa fi ruuse al‑jibaal wa tihit ayyi chadara khadra.
5 Wa khalaas,
Allah Ilaahah sallamah fi iid malik balad Araam.
Hu haarabah wa karab minnah naas katiiriin wa sawwaahum masaajiin wa waddaahum madiinat Dimachkh.
Wa battaan,
Allah sallamah fi iid Fagah wileed Ramalya malik mamlakat Israaʼiil wa hu kula annasar foogah nasur kabiir.
6 Wa fi yoom waahid,
Fagah katal 120 000 raajil min mamlakat Yahuuza kulluhum rujaal fahaliin.
Wa da achaan humman abo Allah Rabb juduudhum.
7 Wa Zikri raajil faaris hana gabiilat Afraayim katal Maʼasiiya wileed al‑malik wa Azrikhaam muraakhib gasir al‑malik wa Alikhaana naayib al‑malik.
8 Wa askar mamlakat Israaʼiil karabo min akhwaanhum Bani Yahuuza 200 000 awiin wa awlaad wa banaat.
Wa nahabo khaniime katiire wa waddooha fi madiinithum al‑Saamira.
9 Wa hinaak fi l‑Saamira,
fiyah nabi Allah usmah Udeed.
Hu marag laagaahum le l‑askar al‑gabbalo al‑Saamira wa gaal leehum :
« Daahu khadab Allah Rabb juduudku nazal fi Bani Yahuuza wa hu sallamaahum leeku.
Wa intu kamaan kataltuuhum bala mahanna lahaddi khabar moothum da talaʼ fi l‑sama.
10 Wa hassaʼ,
intu tidooru tisawwuuhum le naas balad Yahuuza wa sukkaan Madiinat al‑Khudus dool abiid wa khadiim.
Wa be misil da,
tabga khaatiyiin giddaam Allah Ilaahku.
11 Hassaʼ da,
asmaʼo kalaami.
Atulgu al‑masaajiin al‑karabtuuhum min akhwaanku achaan khadab Allah al‑muhrig jaayi foogku. »
12 Wa kubaaraat waahidiin min gabiilat Afraayim kula gammo didd al‑rujaal al‑gabbalo min al‑harib.
Wa l‑kubaaraat dool humman Azarya wileed Yuuhanaan wa Barakya wileed Machillimuut wa Yahizkhiiya wileed Challuum wa Amaasa wileed Hadlaay.
13 Wa gaalo leehum :
« Ma waajib tijiibu al‑masaajiin dool hini.
Aniina hassaʼ kula khaatiyiin giddaam Allah wa tidooru tiziidu fi zunuubna wa khataayaana walla ?
Khataayaana katiiriin wa daahu khadab Allah jaayi foogna,
ya Bani Israaʼiil ! »
14 Wa khalaas,
al‑askar talago al‑masaajiin wa l‑khaniime giddaam al‑kubaaraat wa kulla l‑chaʼab.
15 Wa naas al‑kallafoohum gammo wa chajjaʼo al‑masaajiin wa chaalo min al‑khaniime wa labbasoohum le kulla l‑aryaaniin.
Wa antoohum khulgaan wa niʼle wa akil wa charaab wa sabbo leehum dihin fi awaawiirhum.
Wa rakkabo fi hamiir al‑naas al‑ma yagdaro yuruukhu wa waddoohum le akhwaanhum fi Ariiha al‑binaaduuha madiinat al‑nakhal.
Wa baʼad da,
gabbalo al‑Saamira.
Ahaaz dawwar fazaʼ min malik Achuur
16 Wa fi l‑wakit da,
Ahaaz malik mamlakat Yahuuza rassal le malik balad Achuur achaan yaji yafzaʼah.
17 Wa da,
achaan al‑Adoomiyiin battaan jo wa haarabo mamlakat Yahuuza wa karabo naashum wa waddoohum masaajiin.
18 Wa fi nafs al‑wakit,
al‑Filistiyiin kula jo hajamo sahalat Chafiila wa mantagat al‑junuub hana balad Yahuuza.
Wa humman chaalo hillaal Beet Chams wa Ayyaluun wa Gadiiruut.
Wa battaan chaalo hillaal Suuku wa Timna wa Gimzu wa l‑hillaal al‑taabʼiin leehum.
Wa sakano fi kulla l‑hillaal dool.
19 Allah gaaʼid yimaskin mamlakat Yahuuza be sabab Ahaaz malikhum,
hu al‑lazza Bani Yahuuza yisawwu al‑zanib wa be nafsah kula isi Allah.
20 Wa Takhlat Falaasar malik balad Achuur ja le Ahaaz laakin ma fazaʼah,
ja daayagah.
21 Wa Ahaaz chaal al‑kanz al‑fi beet Allah wa fi gasir al‑malik wa fi buyuut al‑masaaʼiil wa antaah le malik balad Achuur misil hadiiye.
Wa laakin be da kula,
ma ligi minnah ayyi fazaʼ.
22 Wa wakit hu gaaʼid fi l‑diige kula,
al‑malik Ahaaz gaaʼid yaʼasa Allah.
23 Hu gaaʼid yigaddim dahaaya le ilaahaat madiinat Dimachkh al‑hazamooh wa gaal fi nafsah :
« Ilaahaat malik balad Araam fazaʼo naashum.
Kan misil da,
ana kula nigaddim leehum dahaaya achaan yafzaʼooni.
» Wa laakin da sabbab damaar leyah hu wa le kulla Bani Israaʼiil.
24 Wa Ahaaz lamma kulla l‑muʼiddaat hana beet Allah wa kassaraahum wa baʼad da,
gaffal biibaan beet Allah.
Wa sawwa le nafsah madaabih fi ayyi bakaan fi Madiinat al‑Khudus.
25 Wa bana bakaanaat aaliyiin fi kulla hillaal balad Yahuuza le yiharrugu fooghum al‑bakhuur le ilaahaat aakhariin.
Wa be misil da,
hu khaddab Allah Rabb juduudah.
26 Wa l‑baagi min amal Ahaaz wa kulla cheyy al‑sawwaah min al‑bidaaya le l‑nihaaya maktuubiin fi kitaab muluuk Bani Yahuuza wa Bani Israaʼiil.
27 Wa Ahaaz maat wa lihig abbahaatah wa dafanooh fi Madiinat al‑Khudus wa laakin ma satarooh fi khubuur muluuk Bani Israaʼiil.
Wa wileedah Hizkhiiya hakam fi badalah.