Zurriiyit Raʼuubiin
5
1 Wa Raʼuubiin hu bikir Israaʼiil.
Wa achaan hu dakhal fi marit abuuh,*
hagg bukuuriiytah antooh le iyaal Yuusuf al‑hu kula wileed Israaʼiil.
Wa be da,
Raʼuubiin ma ligi hagg al‑bukuuriiye.
2 Wa hatta kan Yahuuza bigi chadiid min akhwaanah wa yamrug minnah al‑malik kula,
hagg al‑bukuuriiye antooh le Yuusuf.
3 Wa awlaad Raʼuubiin bikir Israaʼiil humman
Hanuuk wa Fallu wa Hasruun wa Karmi.
4 Wa Yuwiil wilid Chamaʼya
wa Chamaʼya wilid Juuj
wa Juuj wilid Chimʼi
5 wa Chimʼi wilid Miika
wa Miika wilid Raaya
wa Raaya wilid Baʼal.
6 Wa Biira wileed Baʼal hu cheekh hana gabiilat Raʼuubiin.
Wa Takhlat Falaasar malik balad Achuur karabah wa waddaah fi l‑khurba.
7 Wa daahu sajjalo asaame akhwaan Biira al‑min khachum beetah hasab zurriiyithum.
Al‑awwalaani Yaʼiyiil
wa baʼadah Zakariiya
8 wa Baalaʼ hu wileed Azaaz wileed Chamaʼ wileed Yuwiil.
Wa daahu zurriiyit Raʼuubiin al‑saakniin fi l‑mantaga al‑gaaʼide been hillit Aruuʼir fi l‑junuub wa jabal Nabu wa hillit Baʼal Maaʼoon fi l‑munchaakh.
9 Wa fi l‑sabaah kamaan,
humman sakano fi khachum al‑sahara al‑maachi lahaddi bahar al‑Furaat achaan humman induhum bahaayim katiiriin fi balad Gilʼaad.
10 Wa fi wakit al‑malik Chaawuul,
naas zurriiyit Raʼuubiin haarabo Bani Haajar wa annasaro fooghum.
Wa sakano fi furgaanhum fi kulla l‑mantaga al‑sabaah le balad Gilʼaad.
Zurriiyit Gaad
11 Wa zurriiyit Gaad sakano mugaabiliin zurriiyit Raʼuubiin fi balad Baachaan lahaddi huduud Salka.
12 Wa l‑aayila al‑awwalaaniiye hi hint Yuwiil wa waraayah aayilat Chaafaam wa Yaʼnaay wa Chaafaat kulluhum fi Baachaan.
13 Wa maʼaahum sabʼa aayilaat aakhariin wa humman Mikaayiil wa Machullam wa Chabaʼ wa Yuraay wa Yaʼakaan wa Ziiʼ wa Ibaar.
14 Wa di l‑zurriiye al‑maragat min Abihaayil.
Wa Abihaayil hu wileed Huuri
wa Huuri wileed Yaaruuh
wa Yaaruuh wileed Gilʼaad
wa Gilʼaad wileed Mikaayiil
wa Mikaayiil wileed Yachiichaay
wa Yachiichaay wileed Yahdu
wa Yahdu wileed Buuz.
15 Wa Akhi hu wileed Abdiyiil wa wileed wileedah le Guuni.
Wa hu bas kabiir hana kulla l‑aayilaat dool.
16 Wa kulla aayilaat Gaad sakano fi Gilʼaad wa fi Baachaan wa fi l‑hillaal al‑taabʼiin leehum wa fi bakaanaat al‑marʼa hana Chaaruun lahaddi huduudhum.
17 Wa kulla l‑naas al‑gabiila di sajjalo usumhum fi wakit Yuutaam malik Bani Yahuuza wa Yarubaʼaam malik Bani Israaʼiil.
18 Wa gabiilat Raʼuubiin wa gabiilat Gaad wa nuss gabiilat Manassa,
humman kulla induhum 44 760 rujaal fahaliin al‑yaʼarfu yistaʼmalo al‑daraga wa l‑seef wa l‑nuchchaab wa jaahiziin le l‑harib.
19 Wa humman haarabo Bani Haajar wa zurriiyit Yatuur wa Nafiich wa Nudaab.
20 Wa fi wakt al‑harba di,
humman koorako le l‑Rabb le yafzaʼhum achaan humman mutawakkiliin aleyah.
Wa hu khibil suʼaalhum wa nasaraahum fi Bani Haajar wa l‑naas al‑maʼaahum.
21 Wa humman nahabo bahaayim katiiriin,
50 000 ibil wa 250 000 khanam wa 2 000 hamiir.
Wa karabo 100 000 naas masaajiin
22 wa katalo naas katiiriin achaan al‑harib da,
al‑Rabb bas amar beyah.
Wa humman sakano fi badalhum lahaddi l‑wakit al‑waddoohum fi l‑khurba.
Zurriiyit Manassa
23 Wa zurriiyit nuss gabiilat Manassa sakano fi l‑balad min Baachaan lahaddi Baʼal Harmuun wa Saniir wa jabal Harmuun.
Humman katiiriin marra waahid.
24 Wa daahu asaame kubaaraat aayilaathum.
Humman Ifir wa Yichʼi wa Aliyiil wa Azriyiil wa Irmiya wa Hudawya wa Yahdiyiil.
Humman dool rujaal furraas wa gaadriin wa kubaaraat aayilaathum.
25 Wa laakin fi l‑akhiir naas gabiilat Raʼuubiin wa gabiilat Gaad wa nuss gabiilat Manassa iso Allah Rabb juduudhum.
Wa humman achcharmato maʼa ilaahaat aakhariin wa abadoohum.
Wa dool ilaahaat al‑chuʼuub al‑dammaraahum al‑Rabb min giddaamhum.
26 Wa khalaas,
Allah Ilaah Bani Israaʼiil lazza Fuul malik balad Achuur wa hu al‑usmah Takhlat Falaasar.
Wa Takhlat Falaasar ja chaal gabiilat Raʼuubiin wa gabiilat Gaad wa nuss gabiilat Manassa.
Wa waddaahum fi l‑khurba fi balad Achuur* fi hillaal Halah wa Haabur wa Haara wa gariib le bahar Guzaan.
Wa humman saakniin hinaak lahaddi l‑yoom.