Manassa bigi malik fi Yahuuza
21
1 Wa Manassa indah 12 sana wakit bigi malik wa hakam 55 sana fi Madiinat al‑Khudus.
Wa ammah usumha Hafsiiba.
2 Wa Manassa sawwa al‑fasaala giddaam Allah.
Hu sawwa nafs al‑muharramaat al‑sawwoohum al‑umam al‑Allah galaʼ minhum arduhum wa antaaha le Bani Israaʼiil.
3 Wa hu bana battaan al‑bakaanaat al‑aaliyiin hana l‑ibaada al‑abuuh Hizkhiiya haddamaahum.
Wa bana madaabih le ilaah Baʼal wa khazza iidaan le ibaadat Achiira misil Akhaab malik mamlakat Israaʼiil sawwaah.
Wa Manassa sajad giddaam kulla khuwwaat al‑sama wa abadhum.
4 Wa bana leehum madaabih fi lubb beet Allah wa da l‑bakaan al‑Allah gaal foogah :
« Fi Madiinat al‑Khudus bas,
nukhutt usmi. »
5 Wa battaan kula bana madaabih le kulla khuwwaat al‑sama fi l‑fadaayaat al‑itneen hana beet Allah.
6 Wa hu harrag wileedah fi l‑naar le l‑asnaam.
Wa macha le l‑chaddaara wa l‑chawwaafiin wa le l‑naas al‑yikallumu maʼa l‑maytiin wa l‑jannaaniyiin.
Wa gaaʼid yikhaddib Allah ziyaada be l‑fasaala al‑hu sawwaaha.
7 Wa hu khatta fi beet Allah sanam Achiira al‑sanaʼah.
Wa da fi lubb al‑beet al‑hajja foogah Allah le Dawuud wa le wileedah Suleymaan wa gaal :
« Ana nukhutt usmi ila l‑abad foog al‑beet da wa fi Madiinat al‑Khudus al‑madiina al‑ana azaltaha min kulla mudun gabaayil Bani Israaʼiil.
8 Wa battaan ma natrud Bani Israaʼiil min al‑ard al‑anteetha le juduudhum kan humman yahfado wa yitabbugu kulla cheyy al‑ana amartuhum beyah hasab kulla l‑wasaaya al‑amar beehum abdi Muusa. »
9 Wa laakin Bani Israaʼiil ma simʼo kalaam Allah.
Wa Manassa lazzaahum le yisawwu al‑fasaala ziyaada min al‑umam al‑dammaraahum Allah giddaam Bani Israaʼiil.
10 Wa be sabab da,
Allah kallam leehum be waasitat abiidah al‑anbiya wa gaal :
11 « Manassa malik mamlakat Yahuuza sawwa al‑muharramaat wa l‑fasaala ziyaada min kulla cheyy al‑sawwooh al‑Amuuriyiin gablah.
Wa be ibaadat asnaamah,
hu lazza naas mamlakat Yahuuza kula fi l‑zunuub. »
12 Wa fi chaan da,
daahu Allah Ilaah Bani Israaʼiil gaal :
« Ana ninazzil fi Madiinat al‑Khudus wa fi balad Yahuuza masiibe al‑tabhat kulla l‑naas al‑yasmaʼo beeha.
13 Wa nidammir Madiinat al‑Khudus misil awwal dammart madiinat al‑Saamira wa aayilat Akhaab.
Wa ana nuguchch Madiinat al‑Khudus wa sukkaanha misil al‑maaʼuun al‑yikhassuluuh wa baʼad da,
yakfooh.
14 Wa naabaahum le l‑faddalo min chaʼabi al‑misil warasati wa nisallimhum fi iid udwaanhum.
Wa humman yabgo khaniime wa kasiibe le kulla udwaanhum
15 achaan chaʼabi gaaʼidiin yisawwu daayman al‑fasaala giddaami.
Wa humman gaaʼidiin daayman yikhaddubuuni min yoom al‑juduudhum marago min Masir lahaddi l‑yoom. »
16 Wa Manassa kula daffag damm hana naas bariyiin lahaddi dammuhum mala kulla Madiinat al‑Khudus min tarafha le tarafha.
Wa da bala l‑zanib al‑hu lazza foogah naas mamlakat Yahuuza wa humman sawwo al‑fasaala giddaam Allah.
17 Wa l‑baagi min amal Manassa wa kulla cheyy al‑sawwaah wa kulla zunuubah al‑sawwaahum maktuubiin fi kitaab taariikh muluuk Bani Yahuuza.
18 Wa Manassa maat wa lihig abbahaatah wa dafanooh fi jineenit gasrah al‑binaaduuh jineenit Uzza.
Wa wileedah Aamuun hakam fi badalah.
Aamuun bigi malik fi Yahuuza
19 Wa Aamuun indah 22 sana wakit bigi malik wa hakam santeen fi Madiinat al‑Khudus.
Wa ammah usumha Machullama bineeyit Haarus min hillit Yatba.
20 Wa Aamuun kula sawwa al‑fasaala giddaam Allah misil abuuh Manassa.
21 Hu chaal nafs al‑derib al‑abuuh chaalah wa abad al‑asnaam al‑abuuh abadhum wa sajad giddaamhum.
22 Wa aba minnah Allah Rabb juduudah wa ma chaal al‑derib al‑Allah yidoorah.
23 Wa masaaʼiil Aamuun atmarrado diddah wa katalooh fi lubb beetah.
24 Wa laakin chaʼab al‑balad katalo kulla l‑naas al‑atmarrado didd al‑malik Aamuun.
Wa darrajo wileedah Yuuchiiya malik fi badalah.