Al‑malik Hizkhiiya mirid wa ligi al‑aafe
20
1 Wa fi l‑wakit da,
Hizkhiiya mirid marad chadiid lahaddi gariib yumuut.
Wa l‑nabi Ichaʼya wileed Ammuus ja leyah wa gaal :
« Daahu Allah gaal :
‹ Wassi aayiltak achaan inta tumuut.
Ma talga al‑aafe.
› »
2 Wa Hizkhiiya wajjah ale l‑durdur wa saʼal Allah wa gaal :
3 « Ya Allah,
fakkir foogi ana al‑taabaʼt derbak be sidikh wa be galib mukhlis wa sawweet kulla cheyy adiil giddaamak !
» Wa Hizkhiiya baka baki chadiid.
4 Wa wakit al‑nabi Ichaʼya lissaaʼ ma marag min al‑fadaay hana gasir al‑malik,
Allah hajja leyah wa gaal :
5 « Gabbil amchi le Hizkhiiya kabiir chaʼabi wa guul leyah :
‹ Daahu Allah Ilaah jiddak Dawuud gaal :
“Ana simiʼt suʼaalak wa chift dumuuʼak al‑daffago.
Hassaʼ da,
ana nachfiik wa fi l‑yoom al‑taalit,
inta tagdar tamchi le beet Allah.
6 Wa daahu ana niziid leek 15 sana fi umrak.
Wa ninajjiik inta wa l‑madiina di min iid malik balad Achuur.
Aywa,
nahmi al‑madiina di fi chaani ana wa fi chaan abdi Dawuud.”
› »
7 Wa baʼad da,
Ichaʼya gaal :
« Chiilu abbuud hana tiin.
» Wa humman chaalo al‑abbuud wa ajjanooh wa masahooh fi hubuun al‑malik wa hu ligi al‑aafe.
8 Wa fi l‑wakit da,
Hizkhiiya gaal le Ichaʼya :
« Chunu al‑alaama al‑tiwassif leyi kadar Allah yantiini al‑aafe wa fi l‑yoom al‑taalit,
namchi battaan le beet Allah ? »
9 Wa Ichaʼya radda leyah wa gaal :
« Di hi al‑alaama al‑beeha tagdar taʼarif kadar Allah yihaggig al‑kalaam al‑gaalah.
Inta tidoor al‑dull yiziid be achara darajaat walla yangus be achara darajaat ? »
10 Wa Hizkhiiya gaal leyah :
« Hayyin le l‑dull yiziid be achara darajaat.
Angusah be achara darajaat. »
11 Wa khalaas,
al‑nabi Ichaʼya saʼal Allah wa Allah kaskas al‑dull wara be achara darajaat min al‑bakaan al‑awwal nazal foogah fi darajaat atabat Ahaaz.
Malik Baabil rassal le Hizkhiiya
12 Wa fi l‑wakit da,
malik balad Baabil al‑usmah Maruudak Baladaan wileed Baladaan rassal jawaabaat wa hadiiye le Hizkhiiya achaan hu simiʼ kadar Hizkhiiya mirid.
13 Wa Hizkhiiya simiʼ kalaam murassaliinah.
Wa wassafaahum al‑makhaazin al‑khazano fooghum al‑achya al‑khaaliyiin misil al‑fudda wa l‑dahab wa l‑itir wa l‑dihin al‑muʼattar.
Wa wassafaahum makhaazin al‑silaah wa ayyi cheyy al‑gaaʼid fi makhaazinah.
Wa ma fi cheyy al‑Hizkhiiya ma wassafah leehum kan fi gasrah walla fi kulla mamlakatah.
14 Wa baʼad da,
al‑nabi Ichaʼya ja le l‑malik Hizkhiiya wa gaal leyah :
« Al‑naas dool jo gaalo leek chunu ?
Wa humman jaayiin min ween ?
» Wa Hizkhiiya gaal :
« Humman jaayiin min baʼiid,
min balad Baabil ! »
15 Wa Ichaʼya gaal :
« Chaafo chunu fi gasrak ?
» Wa Hizkhiiya gaal :
« Chaafo kulla cheyy fi gasri.
Ma fi cheyy fi makhaazini al‑ana ma wassaftah leehum ! »
16 Wa khalaas,
Ichaʼya gaal leyah :
« Asmaʼ kalaam Allah !
Hu gaal :
17 ‹ Daahu yaji yoom waahid,
kulla l‑khumaam al‑fi gasrak wa kulla cheyy al‑juduudak dammooh min zamaan lahaddi l‑yoom da,
yiwadduuh fi Baabil.
Wa cheyy waahid kula ma yifaddil.
Wa da,
Allah bas gaalah.
18 Wa yichiilu min iyaalak al‑marago min sulbak,
al‑inta wilidtuhum.
Wa yikhassuuhum wa yabgo abiid fi gasir malik Baabil.
› »
19 Wa Hizkhiiya radda le Ichaʼya wa gaal :
« Kalaam Allah al‑inta gultah leyi da,
adiil.
» Achaan hu gaal fi nafsah :
« Ana niʼiich be salaam wa amaan fi kulla muddit hayaati. »