Nihaayat hukum Yarubaʼaam
14
1 Wa fi l‑wakit da,
Abiiya wileed Yarubaʼaam mirid.
2 Wa Yarubaʼaam gaal le martah :
« Gummi wa khayyiri khulgaanki achaan al‑naas ma yaʼarfuuki kadar inti marti ana Yarubaʼaam.
Wa baʼad da,
amchi hillit Chiilooh wa hinaak talge al‑nabi Akhiiya.
Wa hu bas al‑awwal khabbaraani kadar nabga malik fi Bani Israaʼiil.
3 Wa chiili maʼaaki achara khubza wa kaʼak wa girbe hana asal wa amchi algeeh.
Wa hu yikhabbirki be l‑cheyy al‑yukuun le l‑wileed. »
4 Wa marit Yarubaʼaam sawwat al‑cheyy al‑raajilha gaalah leeha wa hi gammat wa machat le hillit Chiilooh fi beet al‑nabi Akhiiya.
Wa Akhiiya da ma bichiif achaan hu chayyab marra waahid wa uyuunah faathiin wa ma bichiifu.
5 Wa Allah gaal le Akhiiya :
« Di hi marit Yarubaʼaam jaaye leek le tichawwif leeha achaan wileedha mardaan.
Wa wakit hi tawsal hini,
hi tisawwi nafisha misil mara aakhara.
Wa inta kamaan hajji leeha be misil da wa misil da. »
6 Wa tawwaali wakit Akhiiya simiʼ harakat rijileenha wakit daakhle,
hu gaal leeha :
« Alfaddale,
ya marit Yarubaʼaam !
Maala sawweeti nafiski misil mara aakhara ?
Ana indi leeki khabar cheen.
7 Gabbili le Yarubaʼaam wa guuli leyah :
‹ Daahu Allah Ilaah Bani Israaʼiil gaal :
“Min ust al‑chaʼab,
ana rafaʼtak wa sawweetak kabiir fi chaʼabi Bani Israaʼiil.
8 Wa ana galaʼt al‑muluk min zurriiyit Dawuud wa anteetah leek.
Wa laakin inta ma bigiit misil abdi Dawuud al‑hafad wasiiyaati wa taabaʼ kalaami be kulla galbah wa illa yisawwi al‑adiil bas giddaami.
9 Wa inta gaaʼid tisawwi al‑fasaala ziyaada min al‑naas al‑gablak.
Wa le tizaʼʼilni,
inta sanaʼt leek asnaam min hadiid al‑yimassulu ilaahaat aakhariin.
Wa leyi ana kamaan,
rafadtini.
10 Wa be sabab da,
ana ninazzil charr foog aayilat Yarubaʼaam.
Wa nidammir kulla l‑rujaal min aayiltah kan abiid walla hurriin kula fi lubb Bani Israaʼiil.
Wa nuguchch aayiltah misil yuguchchu al‑baʼar min wijh al‑ard.
11 Wa ayyi naadum min aayilat Yarubaʼaam al‑yumuut fi lubb al‑hille,
al‑kulaab yaakuluuh.
Wa l‑yumuut fi l‑kadaade,
tuyuur al‑sama yaakuluuh.”
› Wa da kalaam Allah al‑hu gaalah.
12 « Wa kan leeki inti,
gummi amchi beetki.
Wa laakin wakit tidissi rijilki fi l‑hille bas,
al‑wileed yumuut.
13 Wa kulla Bani Israaʼiil yahzano leyah wa yadfunuuh.
Wa min aayilat Yarubaʼaam,
hu wiheedah bas al‑yadfunuuh fi khabur achaan hu wiheedah bas min aayilat Yarubaʼaam,
Allah Ilaah Bani Israaʼiil ligi foogah cheyy adiil.
14 « Wa baʼad da,
Allah yidarrij leyah malik fi Bani Israaʼiil al‑yidammir aayilat Yarubaʼaam.
Wa da l‑cheyy al‑gaaʼid yahsal al‑yoom fi l‑wakit da bas.
15 Wa Allah yadrub Bani Israaʼiil wa yabgo misil ageeg al‑chaaylah al‑almi.
Wa hu yamrughum min al‑balad al‑samha al‑antaaha le juduudhum wa yichattithum khaadi le bahar al‑Furaat achaan humman khaddabo Allah wakit khazzo iidaan le ibaadat ilaaha Achiira.
16 Wa Allah yaabaahum le Bani Israaʼiil be sabab al‑zanib al‑Yarubaʼaam sawwaah,
hu al‑lazza naas mamlakat Israaʼiil fi l‑zunuub. »
17 Wa marit Yarubaʼaam gammat wa gabbalat hillit Tirsa.
Wa wakit wassalat khachum baab beetha,
khalaas al‑wileed maat.
18 Wa dafanooh wa kulla Bani Israaʼiil hizno leyah.
Wa da bigi hasab kalaam Allah al‑gaalah be waasitat abdah al‑nabi Akhiiya.
Moot Yarubaʼaam
19 Wa l‑baagi min amal Yarubaʼaam al‑sawwaah min al‑huruub wa l‑hukum,
kulla ke maktuub fi kitaab taariikh muluuk Bani Israaʼiil.
20 Wa muddit hukum Yarubaʼaam 22 sana wa baʼad da,
maat wa lihig abbahaatah.
Wa wileedah Nadaab hakam fi badalah.
Rahabʼaam bigi malik fi Yahuuza
21 Wa Rahabʼaam wileed Suleymaan bigi malik fi mamlakat Yahuuza.
Wa hu indah 41 sana wakit bigi malik.
Wa hakam 17 sana fi Madiinat al‑Khudus wa di l‑madiina al‑azalaaha Allah min kulla mudun gabaayil Bani Israaʼiil le yukhutt foogha usmah.
Wa amm Rahabʼaam usumha Naʼama wa hi min balad Bani Ammuun.
22 Wa naas gabiilat Yahuuza gaaʼidiin yisawwu al‑fasaala giddaam Allah.
Wa be l‑zanib da,
khaddabo Allah ziyaada min al‑khadab al‑awwal juduudhum sabbabooh be zunuubhum al‑sawwoohum.
23 Wa humman kula bano bakaanaat aaliyiin wa khazzo hujaar le l‑ibaada wa khazzo iidaan le ibaadat Achiira fi raas ayyi jabal aali wa tihit ayyi chadara khadra.
24 Wa naas waahidiin yisawwu al‑charmata fi bakaan al‑ibaada fi l‑balad.
Wa da nafs al‑muharramaat al‑sawwoohum al‑umam al‑Allah galaʼ minhum arduhum wa antaaha le Bani Israaʼiil.
Al‑harba maʼa l‑Masriyiin
25 Wa fi l‑sana al‑khaamse hana hukum Rahabʼaam,
Chiichakh malik Masir gamma ja haarab Madiinat al‑Khudus.
26 Hu chaal kulla l‑khuna al‑fi beet Allah wa gasir al‑malik.
Hu chaal kulla cheyy,
khaassatan al‑darag hana l‑dahab al‑Suleymaan sawwaahum.
27 Wa fi badal al‑darag dool,
al‑malik Rahabʼaam sawwa darag aakhariin hana nahaas wa ammanaahum le kabiir al‑hurraas al‑gaaʼid yahris khachum baab gasir al‑malik.
28 Wa kan al‑malik yamchi beet Allah,
al‑hurraas yichiilu al‑darag dool wa baʼadeen yigabbuluuhum fi beet al‑hurraas.
29 Wa l‑baagi min amal Rahabʼaam wa kulla cheyy al‑sawwaah maktuubiin fi kitaab taariikh muluuk Bani Yahuuza.
30 Wa daayman bigi harib ambeen Rahabʼaam wa Yarubaʼaam.
31 Wa Rahabʼaam maat wa lihig abbahaatah wa dafanooh fi khabur juduudah fi madiinat Dawuud.
Wa ammah usumha Naʼama wa hi min balad Bani Ammuun.
Wa wileedah Abiiya hakam fi badalah.