Allah rassal nabi fi Beet Iil
13
1 Wa daahu nabi Allah waahid gamma min balad Yahuuza be amur Allah wa ja fi Beet Iil.
Wa da fi wakit al‑Yarubaʼaam gaaʼid yiharrig al‑bakhuur fi l‑madbah al‑hu banaah.
2 Wa l‑nabi da hajja be hiss aali didd al‑madbah hasab kalaam Allah wa gaal :
« Ya l‑madbah !
Ya l‑madbah !
Daahu Allah gaal :
‹ Daahu yaldo wileed le zurriiyit Dawuud wa yisammuuh Yuuchiiya.
Wa rujaal al‑diin hana l‑bakaanaat al‑aaliyiin al‑yiharrugu foogak al‑bakhuur,
hu yigaddimhum foogak dahaaya.
Wa yiharrugu foogak udaam al‑naas kula.
› »
3 Wa fi nafs al‑yoom da,
al‑nabi anta alaama wa gaal :
« Di hi al‑alaama al‑tiwassif kadar kalaam Allah yihaggig.
Al‑madbah da yinchagga wa l‑rumaad al‑fi lubbah yidaffig. »
4 Wa wakit al‑malik Yarubaʼaam simiʼ kalaam nabi Allah al‑gaalah didd al‑madbah hana Beet Iil da,
hu madda iidah min al‑madbah wa gaal be hiss aali :
« Akurbu al‑raajil da !
» Wa fi l‑bakaan da,
iidah al‑maddaaha ale l‑nabi di yibsat wa ma yagdar yijiibha aleyah.
5 Wa tawwaali,
al‑madbah anchagga wa l‑rumaad al‑fi lubbah daffag.
Wa da bigi misil al‑alaama al‑kallam beeha al‑nabi al‑tiwassif kadar kalaam Allah yihaggig.
6 Wa l‑malik gaal le l‑nabi :
« Min fadlak,
achhad Allah Ilaahak wa asʼalah leyi achaan nagdar nijiib iidi aleyi.
» Wa l‑nabi chahad Allah wa l‑malik gidir jaab iidah aleyah wa hi bigat misil awwal.
7 Wa l‑malik gaal le l‑nabi :
« Taʼaal namchu al‑beet taakul wa tachrab wa ana nantiik hadiiye. »
8 Wa l‑nabi radda le l‑malik wa gaal :
« Kan inta tantiini nuss beetak kula,
ana ma namchi maʼaak.
Wa ana wa la naakul akil wa la nachrab almi fi l‑bakaan da
9 achaan da bas Allah amaraani wa gaal :
‹ Wa la taakul akil wa la tachrab almi wa la tigabbil be nafs al‑derib al‑macheet beyah.
› »
10 Wa khalaas,
al‑nabi gabbal be derib aakhar ma be l‑derib al‑awwal macha beyah Beet Iil.
Al‑nabi isi Allah
11 Wa fiyah nabi waahid chaayib saakin fi Beet Iil.
Wa iyaalah jo wa hajjo leyah be l‑amal al‑sawwaah nabi Allah fi l‑yoom da fi Beet Iil.
Wa hajjo le abuuhum be l‑kalaam al‑gaalah le l‑malik.
12 Wa abuuhum gaal leehum :
« Be l‑derib al‑weenu al‑nabi da faat ?
» Wa iyaalah wassafooh al‑derib al‑gabbal beyah al‑nabi al‑ja min balad Yahuuza.
13 Wa khalaas,
gaal le iyaalah :
« Chiddu leyi al‑humaar.
» Wa humman chaddooh leyah wa hu rikib foogah.
14 Wa l‑chaayib chaal derib al‑nabi wa ligaah gaaʼid fi gaʼar chadara kabiire.
Wa saʼalah wa gaal :
« Inta bas al‑nabi al‑ja min balad Yahuuza walla ?
» Wa hu radda leyah wa gaal :
« Aywa,
ana bas. »
15 Wa l‑chaayib gaal leyah :
« Taʼaal maʼaayi fi l‑beet wa aakul leek akil. »
16 Wa l‑nabi radda leyah wa gaal :
« Ana wa la nagdar nigabbil wa la nagdar namchi maʼaak fi beetak wa la naakul akil wa la nachrab almi maʼaak fi l‑bakaan da.
17 Wa da achaan Allah amaraani wa gaal leyi :
‹ Wa la taakul akil wa la tachrab almi fi l‑bakaan da wa la tigabbil be nafs al‑derib al‑macheet beyah.
› »
18 Wa l‑chaayib gaal leyah :
« Ana kula nabi mislak.
Wa malak waahid kallam leyi be kalaam min Allah wa gaal :
‹ Amchi gabbil al‑nabi da fi beetak wa khalli yaakul akil wa yachrab almi.
› » Wa laakin al‑chaayib gaaʼid yakdib leyah.
19 Wa khalaas,
al‑nabi gabbal maʼaayah fi beetah wa akal akil wa chirib almi.
Moot al‑nabi al‑ja min balad Yahuuza
20 Wa wakit humman al‑itneen gaaʼidiin yaakulu,
Allah hajja le l‑nabi al‑chaayib al‑gabbal al‑nabi al‑ja min balad Yahuuza.
21 Wa l‑nabi al‑chaayib hajja be hiss foog le l‑nabi al‑ja min balad Yahuuza wa gaal leyah :
« Daahu Allah gaal :
‹ Inta isiit kalaami wa ma hafadt al‑amur al‑amartak beyah ana Allah Ilaahak.
22 Wa gabbalt akalt akil wa chiribt almi fi l‑bakaan al‑ana gult leek :
“Ma taakul akil wa ma tachrab almi.”
Wa be sabab da,
ma yadfunu janaaztak fi khabur juduudak.
› »
23 Wa baʼad akal akil wa chirib almi,
al‑nabi al‑chaayib chadda humaar al‑nabi al‑hu gabbalah.
24 Wa khalaas,
al‑nabi da rikib wa faat.
Wa wakit maachi fi l‑derib,
duud waahid marag wa katalah.
Wa janaaztah waagʼe fi l‑derib wa l‑humaar waagif jambaha be nussaha al‑waahid wa l‑duud kula waagif jambaha be nussah al‑aakhar.
25 Wa naas waahidiin faaytiin be l‑derib da chaafo janaaza waagʼe fi l‑derib wa l‑duud waagif jambaha.
Wa humman macho wa hajjo beeha fi l‑hille al‑saakin foogha al‑nabi al‑chaayib.
26 Wa wakit al‑nabi al‑chaayib al‑gabbalah simiʼ be l‑khabar da,
hu gaal :
« Da nabi Allah,
da l‑nabi al‑isi amur Allah.
Wa Allah sallamah le l‑duud darabah wa katalah wa da bigi hasab kalaam Allah al‑gaalah leyah. »
27 Wa khalaas,
al‑nabi al‑chaayib gaal le iyaalah :
« Chiddu leyi al‑humaar.
» Wa humman chaddooh leyah.
28 Wa hu macha ligi al‑janaaza waagʼe fi l‑derib wa l‑humaar wa l‑duud waagfiin jamb al‑janaaza.
Wa l‑duud ma akal al‑janaaza wa ma darab al‑humaar.
29 Wa l‑nabi al‑chaayib rafaʼ janaazit nabi Allah wa khattaaha fi l‑humaar wa gabbal beeha.
Wa l‑nabi al‑chaayib ja fi l‑hille le yadfinah wa yisawwi leyah furaach.
30 Wa hu dafan al‑janaaza fi khabur hana juduudah halaalah wa hizin leyah wa gaal :
« Ya khasaaritna !
Ya akhuuyi. »
31 Wa baʼad dafanah,
al‑chaayib gaal le iyaalah :
« Kan ana mutt,
adfunuuni fi khabur juduudi maʼa l‑nabi da.
Wa khuttu udaami jamb udaamah.
32 Achaan al‑kalaam al‑gaalah Allah didd al‑madbah hana Beet Iil wa didd kulla buyuut al‑ibaada fi l‑bakaanaat al‑aaliyiin fi hillaal al‑Saamira,
akiid yilhaggag. »
33 Wa baʼad kulla cheyy al‑kaan da,
Yarubaʼaam ma khalla derbah al‑fasil al‑maachi foogah da.
Wa min al‑chaʼab hu darraj rujaal diin le l‑bakaanaat al‑aaliyiin.
Wa ayyi naadum al‑yidoor yabga raajil diin,
hu yidarrijah raajil diin fi l‑bakaanaat al‑aaliyiin.
34 Wa da bas sabab zanib aayilat Yarubaʼaam.
Wa achaan da bas,
aayiltah addammarat wa waddarat min wijh al‑ard.