Abigaayil najjat naas beetha
25
1 Wa Samuwiil maat wa dafanooh fi beetah fi hillit al‑Raama.
Wa kulla Bani Israaʼiil lammo wa bako leyah.
Wa baʼad da,
Dawuud macha fi kadaadit Faaraan.
2 Wa fi hillit Maaʼoon,
fiyah raajil waahid indah maal katiir wa maalah da gaaʼid fi hillit Karmal.
Hu indah 3 000 khanam dawaayin wa 1 000 inze.
Wa macha fi hillit Karmal le yagtaʼ suuf khanamah.
3 Wa l‑raajil da usmah Naabaal wa martah usumha Abigaayil.
Hi mara aagle wa samha bilheen wa laakin raajilha iideenah gawi wa hawaan.
Wa hu min khachum beet Kaalib.
4 Wa fi l‑kadaade,
Dawuud simiʼ kadar Naabaal macha yagtaʼ suuf khanamah.
5 Wa Dawuud rassal achara subyaan wa gaal leehum :
« Amchu hillit Karmal wa talgo Naabaal.
Wa waddu leyah salaami wa guulu leyah :
6 ‹ Tiʼiich daayman !
Wa l‑salaam aleek wa le ahalak wa le kulla maalak !
7 Wa hassaʼ da,
ana simiʼt kadar inta jiit maʼa naasak le tagtaʼ suuf khanamak.
Wa wakit ruʼyaanak gaʼado maʼaana,
aniina ma sawweena leehum cheyy fasil.
Wa cheyy waahid kula ma waddar leehum wakit humman gaʼado fi Karmal.
8 Asʼal naasak wa humman yiʼooruuk !
Wa khalli naasi yalgo minnak rida achaan aniina jiina fi yoom al‑iid.
Wa min fadlak,
anti al‑cheyy al‑tagdar tantiih le abiidak wa le wileedak Dawuud.
› »
9 Wa wakit subyaan Dawuud wassalo bakaan Naabaal,
hajjo leyah be kulla l‑kalaam al‑Dawuud rassalaahum beyah.
Wa gaʼado yarjo.
10 Wa Naabaal gaal le naas Dawuud :
« Dawuud da,
hu yaatu ?
Wileed Yassa da,
hu yaatu ?
Fi wakitna da,
fiyah abiid katiiriin al‑yiʼarrudu min siyaadhum !
11 Wa ana kamaan,
kikkeef nichiil khubziti wa almiiyi wa lahami al‑jahhaztah le naasi wa nantiih le naas al‑ma naʼarifhum jaayiin min ween kula ? »
12 Wa khalaas,
subyaan Dawuud gammo gabbalo.
Wa wakit wassalo,
hajjo le Dawuud be kulla l‑kalaam da.
13 Wa Dawuud gaal le naasah :
« Khalli ayyi waahid minku yichiil seefah !
» Wa khalaas,
ayyi waahid chaal seefah wa rabatah fi sulbah.
Wa Dawuud kula chaal hanaayah wa macho.
Wa l‑macho,
adadhum 400 raajil wa 200 kamaan gaʼado maʼa l‑khumaam.
14 Wa waahid min khaddaamiin Naabaal ja khabbar Abigaayil marit Naabaal be kulla cheyy al‑hasal wa gaal leeha :
« Daahu Dawuud rassal naasah jo min al‑kadaade le yisallumu siidna.
Laakin hu ma rahhab beehum.
15 Wa l‑naas dool zeeniin leena marra waahid wakit aniina gaʼadna maʼaahum fi l‑kadaade wa ma sawwo leena cheyy fasil.
Wa min maalna kula,
cheyy ma waddar.
16 Leel wa nahaar,
humman bigo leena misil al‑zariibe fi kulla l‑wakit al‑aniina gaʼadna maʼaahum wa saarhiin be l‑khanam.
17 Wa hassaʼ da,
aʼarfi wa chiifi al‑cheyy al‑tagdare tisawwiih achaan masiibe kabiire jaaye le siidna wa ahalah.
Achaan sayyidna ma naafiʼ wa naadum yahdiih kula ma fiih ! »
18 Wa tawwaali,
Abigaayil chaalat 200 khubza wa 2 girbe hana khamar wa 5 khanam munajjadiin wa 15 kooro hana gameh fariiki wa 100 dukrume hana inab yaabis muʼabbak wa 200 dukrume hana tiin yaabis muʼabbak.
Wa kulla l‑achya dool,
hi chaddathum fi hamiir.
19 Wa gaalat le khaddaamiinha :
« Intu gaddumu wa ana namchi waraaku.
» Wa laakin hi ma gaalat cheyy le raajilha Naabaal.
20 Wa hi rikbat fi humaarha wa machat ale l‑hajar.
Wa Dawuud kula be naasah jaayiin be nuss al‑hajar be hinaak.
Wa jo wa be khafla,
lammo.
21 Wa gubbaal ma yilimmu,
Dawuud gaal :
« Ana sawweet khata.
Al‑naadum da,
ana hafadt kulla maalah fi l‑kadaade achaan cheyy ma yiwaddir leyah.
Wa l‑kheer al‑sawweetah leyah da,
hu gabbalah leyi be charr !
22 Kadar le ambaakir fajur,
kan ana khalleet naadum waahid min rujaal Naabaal aach kula,
khalli al‑Rabb yiʼaakhibni ikhaab chadiid ! »
23 Wa wakit Abigaayil chaafat Dawuud,
dallat ajala min humaarha.
Wa barakat wa sajadat giddaamah,
24 wa karabat rijileenah wa gaalat :
« Ya sayyidi,
ajʼal al‑khata da minni ana !
Wa daahu ana khaadmak nihajji leek wa asmaʼ kalaami.
25 Min fadlak,
ya sayyidi,
Naabaal hu siid charr,
ma tajʼalah !
Al‑usum bitaabiʼ siidah wa usmah Naabaal maʼanaatah matmuus.
Wa ana khaadmak ma chift al‑naas al‑inta rassaltuhum,
ya sayyidi.
26 Wa hassaʼ,
ya sayyidi,
nahlif leek be Allah al‑Hayy wa be hayaatak inta kadar Allah daharak min daffigiin al‑damm wa kaffiin al‑taar.
Khalli udwaanak wa kulla l‑naas al‑yidooru leek al‑fasaala yabgo misil Naabaal,
ya sayyidi !
27 Wa khalaas,
ya sayyidi,
akhbal al‑hadaaya al‑ana khaadmak jibtuhum leek wa gassimhum le l‑subyaan al‑maʼaak.
28 Wa saamih ana khaadmak fi l‑khata al‑sawweetah,
ya sayyidi.
Akiid Allah yisabbit zurriiytak fi l‑muluk achaan inta gaaʼid tihaarib fi chaan Allah.
Wa abadan fi muddit hayaatak,
ma yalgo foogak ayyi eeb.
29 Wa kan naadum gaaʼid yitaaridak wa yidoor yaktulak,
ya sayyidi,
Allah Ilaahak yinajjiik wa yahfadak misil naadum al‑gaaʼid yahfad maalah.
Wa laakin udwaanak,
Allah yiwaddiihum baʼiid minnak misil hajar al‑zaragooh be miglaaʼ.
30 Wa wakit Allah yitimm kulla cheyy al‑waaʼadak beyah inta sayyidi,
hu yidarrijak malik fi Israaʼiil.
31 Ya sayyidi,
kan inta kaffeet al‑taar,
da yagood leek fi fikrak wa tandam le l‑cheyy al‑sawweetah achaan fi zaʼalak bas inta katalt naas.
Wa wakit Allah yisawwi leek al‑kheer,
ma tansaani. »
32 Wa Dawuud gaal le Abigaayil :
« Baarak Allah Ilaah Bani Israaʼiil al‑jaabaaki al‑yoom le tilaagiini !
33 Allah yibaarik foogki wa fi fikirki achaan inti dahartiini ma naktul naas wa ma nilkaffa al‑taar.
34 Wa nahlif be Allah al‑Hayy Ilaah Bani Israaʼiil,
hu bas daharaani ma nisawwi leeki cheyy fasil.
Wa kan inti ma jiiti ajala laageetiini,
ambaakir fajur da,
naadum waahid kula ma yifaddil fi beet Naabaal ! »
35 Wa Dawuud khibil al‑hadaaya al‑Abigaayil jaabathum wa gaal leeha :
« Amchi beetki be l‑salaama.
Ana simiʼt kalaamki wa nisawwi kulla cheyy al‑talabtiih minni. »
36 Wa Abigaayil gabbalat bakaan Naabaal raajilha wa ligatah sawwa aazuuma kabiire fi beetah misil aazuuma hana malik.
Wa hu sakraan marra waahid wa farhaan.
Wa hi ma gaalat leyah cheyy lahaddi l‑fajur.
37 Wa be fajur,
wakit sakarah chatta minnah,
Abigaayil hajjat leyah be kulla cheyy al‑hasal.
Wa wakit Naabaal simiʼ al‑kalaam da,
taggaah wajaʼ galib wa jildah maat.
38 Wa gaʼad hawaale achara yoom wa baʼad da,
Allah hakam leyah be l‑moot.
39 Wa wakit Dawuud simiʼ be moot Naabaal,
gaal :
« Al‑hamdulillah.
Allah daafaʼ leyi min muʼyaar Naabaal wa daharaani ma nisawwi cheyy fasil diddah.
Wa hu gabbal leyah fasaaltah fi raasah.
» Wa Dawuud rassal naas le Abigaayil wa dawwar yaakhudha.
40 Wa wakit naas Dawuud wassalo fi hillit Karmal bakaan Abigaayil,
gaalo leeha :
« Dawuud rassalaana leeki achaan yidoor yaakhudki. »
41 Wa tawwaali,
Abigaayil wagaʼat fi l‑ard wa barakat giddaam Dawuud wa gaalat :
« Ana khaadmah jaahize le nabga khaadim le nijiib almi le nikhassil rijileen khaddaamiin sayyidi. »
42 Wa Abigaayil gammat ajala wa rikbat fi humaarha.
Wa machan maʼaaha khamsa banaat wa taabaʼan khaddaamiin Dawuud.
Wa khalaas,
hi bigat marit Dawuud.
43 Wa gubbaal da kula,
Dawuud indah mara usumha Akhinuuʼam.
Hi min hillit Yazraʼiil.
Wa be da,
Akhinuuʼam wa Abigaayil kullihin ke awiinah le Dawuud.
44 Wa kan le Mikaal marit Dawuud al‑awwalaaniiye,
Chaawuul abuuha chaalaaha wa antaaha le raajil aakhar usmah Falti wileed Layich min hillit Galliim.