Dawuud aba ma yaktul Chaawuul
24
1 Wa wakit Chaawuul gabbal min muhaarabat al‑Filistiyiin,
khabbarooh kadar Dawuud gaaʼid fi kadaadit Een Jidi.
2 Wa Chaawuul lamma 3 000 raajil min ahsan al‑muhaaribiin min kulla Bani Israaʼiil wa macha yifattich Dawuud wa naasah jamb al‑hajar al‑binaaduuh hajar al‑Khazaal.
3 Wa wakit wassalo fi zaraayib al‑khanam al‑gariib le l‑derib,
Chaawuul chaaf karkuur wa dakhal foogah wa gangas le yistariih.
Wa Dawuud wa naasah kamaan gaaʼidiin fi lubb al‑karkuur da.
4 Wa khalaas,
naasah le Dawuud waswaso leyah wa gaalo :
« Daahu al‑yoom al‑Allah hajja leek foogah wa gaal :
‹ Ana nisallim leek aduuk.
Wa be da,
sawwi leyah kulla cheyy al‑tidoorah.
› » Wa Dawuud gamma addabba wa gataʼ khachum khalag Chaawuul min wara.
5 Wa baʼad da,
Dawuud galbah ma bigi leyah halu achaan hu gataʼ khachum khalag Chaawuul.
6 Wa gaal le naasah :
« Allah yiʼaakhibni kan ana sawweet cheyy fasil le siidi Chaawuul al‑Allah masahah wa darrajah malik !
Ana ma nukhutt iidi foogah achaan Allah bas azalah. »
7 Wa be misil da,
Dawuud kallam le naasah wa daharaahum ma yahjumu Chaawuul.
Wa Chaawuul marag min al‑karkuur wa faat.
8 Wa baʼad da,
Dawuud kula marag waraayah min al‑karkuur wa naadaah wa gaal :
« Ya siidi al‑malik !
» Wa Chaawuul chaglab wa chaaf waraayah.
Wa Dawuud dangar fi l‑ard wa sajad.
9 Wa Dawuud gaal le Chaawuul :
« Maala tasmaʼ kalaam al‑naas al‑buguulu :
‹ Dawuud yidoor yisawwi leek cheyy fasil ? ›
10 Daahu al‑yoom inta chift be eenak Allah sallamaak leyi fi iidi fi lubb al‑karkuur !
Wa naasi gaalo leyi naktulak.
Wa laakin ana hanneet foogak wa ma maddeet iidi aleek inta,
ya siidi,
achaan inta bas al‑Allah masahak wa darrajak malik !
11 Chiif,
ya abuuyi !
Al‑fi iidi,
da ma khachum khalagak walla ?
Kan ana gidirt gataʼat khachum khalagak wa ma kataltak da,
aʼarif kadar ana ma muʼaarid wa la khaayin wa ma sawweet khata diddak inta.
Laakin inta bas gaaʼid titaaridni wa tidoor taktulni !
12 Wa khalli Allah yahkim beeni wa beenak wa yikaffiini kulla l‑fasaala al‑inta gaaʼid tisawwiiha leyi.
Laakin ana ke ma nukhutt iidi foogak !
13 Misil al‑masal al‑gadiim buguul :
‹ Min naas al‑fasliin bas taji al‑fasaala.
› Wa laakin ana ke,
ma nukhutt iidi foogak ! »
14 Wa Dawuud gaal battaan :
« Didd yaatu marag malik Israaʼiil ?
Inta maragt wara kalib mayyit walla wara gamulaay bas ?
15 Wa Allah hu al‑haakim wa yahkim beeni wa beenak wa yichiif muchkilti wa yidaafiʼ leyi wa yibarriini wa yinajjiini min iidak inta. »
16 Wa baʼad Dawuud kammal kalaamah le Chaawuul,
Chaawuul gaal :
« Ya wileedi Dawuud,
kalaamak sahiih !
» Wa Chaawuul gamma baka baki chadiid
17 wa gaal battaan le Dawuud :
« Inta saalih ziyaada minni ana achaan inta sawweet leyi al‑kheer wa laakin ana sawweet leek al‑charr.
18 Wa l‑yoom,
inta sawweet leyi al‑kheer wakit Allah sallamaani leek fi iidak wa inta ma kataltini.
19 Yaatu al‑ligi aduuh wa khallaah macha be l‑salaama ?
Allah yiʼaajirak fi l‑kheer al‑inta sawweetah leyi al‑yoom !
20 Wa hassaʼ,
ana akkadt inta tabga malik wa mamlakat Israaʼiil tagood saabte fi iideenak.
21 Wa hassaʼ da,
ahlif leyi be Allah wa akkid leyi ma taktul zurriiyti baʼad mooti wa ma tuguchch usmi min lubb ahali. »
22 Wa khalaas,
Dawuud halaf le Chaawuul.
Wa baʼad da,
Chaawuul gabbal beetah wa Dawuud maʼa naasah kamaan gabbalo fi bakaanhum al‑gawi.