Kitaab Raʼuus
min Kutub Taariikh Bani Israaʼiil
Al‑taʼab ja le Naʼiima wa aayilitha
1
1 Fi wakit al‑hukkaam gubbaal Bani Israaʼiil ma induhum malik,
juuʼ chadiid ja fi balad Yahuuza wa fi chaan da,
raajil waahid min hillit Beet Laham macha le balad Muwaab le yaskun hinaak.
Wa l‑raajil da macha maʼa martah wa awlaadah al‑itneen.
2 Wa hu usmah Aliimalik wa martah usumha Naʼiima wa awlaadah asaameehum Mahluun wa Kilyuun.
Wa humman min khachum beet Afraata min hillit Beet Laham fi turaab Yahuuza.
Wa humman macho le balad Muwaab wa sakano hinaak.
3 Wa Aliimalik maat wa martah Naʼiima gaʼadat wiheedha maʼa awlaadha al‑itneen.
4 Wa awlaadha al‑itneen akhado awiin min al‑Muwaabiyiin,
al‑waahide usumha Urfa wa l‑aakhara usumha Raʼuus.
Wa humman sakano gariib achara sana min jayyithum min Beet Laham.
5 Wa baʼad da,
Mahluun wa Kilyuun maato wa khalaas ammuhum fagadat raajilha wa iyaalha.
Raʼuus wa Naʼiima machan Beet Laham
6 Wa wakit Naʼiima gaaʼide fi balad Muwaab,
simʼat kadar Allah raham chaʼabah wa antaahum intaaj sameh min ziraaʼithum.
Wa khalaas,
gammat jahhazat hi wa awiin awlaadha al‑itneen le yamurgan min al‑balad di.
7 Wa gamman min al‑bakaan al‑hinna sakanan foogah wa chaalan derib hana turaab Yahuuza.
8 Wa wakit maachaat fi l‑derib,
Naʼiima gaalat le awiin awlaadha :
« Hassaʼ da,
khalli ayyi waahide minkan tigabbil le beet ammaha.
Wa khalli Allah yisawwi leekan al‑kheer misil intan sawweetannah le l‑maato wa leyi ana.
9 Wa khalli Allah yantiikan le ayyi waahide beet baarid bakaan raajilha !
» Wa hi habbat kulli waahide minhin.
Wa khalaas hinna bakan chadiid
10 wa gaalan le Naʼiima :
« La,
aniina namchu maʼaaki bakaan ahalki. »
11 Laakin Naʼiima gaalat :
« Gabbilan,
ya banaati !
Maala tidooran tamchan maʼaayi ?
Hal nalda awlaad al‑battaan yabgo leekan rujaal walla ?
12 Gabbilan amchan,
ya banaati,
achaan ana bigiit ajuuz wa battaan ma naakhud raajil.
Wa kan nuguul indi acham naakhud raajil fi l‑leele di wa nalda awlaad kula
13 hal tagdaran tarjanhum lahaddi yakburu ?
Taaban ma taakhudan rujaal aakhariin walla ?
La,
ya banaati !
Al‑murr al‑foogi ana da chadiid min hanaakan intan.
Wa Allah bas nazzal al‑taʼab foogi. »
14 Wa min simʼan al‑kalaam da,
gamman battaan bakan.
Wa baʼad da,
Urfa habbat nasiibitha wa faatat.
Laakin Raʼuus anrabatat maʼaaha.
15 Wa khalaas,
Naʼiima gaalat le Raʼuus :
« Chiifi,
hamaatki gabbalat le ahalha wa le ilaahaatha.
Inti kula gabbili maʼaaha. »
16 Wa Raʼuus raddat le nasiibitha wa gaalat :
« Ma tajburiini le nikhalliiki
wa nigabbil minki !
Fi ayyi bakaan al‑tamchi,
namchi maʼaaki
wa fi ayyi bakaan al‑taskuni,
naskun maʼaaki.
Ahalki yabgo ahali
wa Ilaahki yabga Ilaahi.
17 Al‑bakaan al‑tumuuti,
ana kula numuut wa yadfunuuni.
Kan cheyy aakhar bala l‑moot bas faragaani minki da,
khalli Allah yiʼaakhibni ikhaab chadiid ! »
18 Wakit Naʼiima chaafat kadar Raʼuus indaha niiye le tamchi maʼaaha,
sakatat khallatha battaan ma jabaratha le tigabbil.
19 Wa khalaas,
machan tineenithin lahaddi Beet Laham.
Wa wakit wassalan hinaak,
kulla awiin al‑hille ajjaban fooghin wa assaaʼalan ambeenaathin wa gaalan :
« Di Naʼiima walla ? »
20 Wa Naʼiima raddat leehin wa gaalat :
« Battaan ma tinaadanni Naʼiima laakin naadanni Murra achaan Allah al‑Gaadir marrar leyi hayaati.
21 Ana macheet min hini malaane wa Allah gabbalaani yaabse.
Battaan maala tinaadanni Naʼiima achaan Allah al‑Gaadir taʼʼabaani wa nazzal foogi al‑hizin. »
22 Wa be misil da,
Naʼiima wa marit waladha Raʼuus al‑Muwaabiiye gabbalan min balad Muwaab.
Wa wassalan fi Beet Laham fi bidaayit gatiʼ al‑gameh al‑abyad.