Wasiiyat Yachuuʼ al‑akhiire
23
1 Wa baʼad mudda tawiile,
Allah anta al‑raaha le Bani Israaʼiil min kulla udwaanhum al‑mujaawiriinhum.
Wa Yachuuʼ chayyab wa umrah bigi tawiil.
2 Wa hu naada kulla Bani Israaʼiil wa chuyuukhhum wa kubaaraathum wa gudiyaahum wa masaaʼiilhum wa gaal :
« Ana chayyabt wa umri bigi tawiil.
3 Wa intu zaatku chiftu kulla cheyy al‑sawwaah Allah Ilaahku didd al‑umam dool fi sababku.
Achaan Allah Ilaahku,
hu bas al‑haarab leeku.
4 Wa chiifu,
ana anteetku ard warasatku be amʼiyeedaat hasab gabaayilku.
Wa di ard al‑umam al‑ana dammartuhum wa ard al‑umam al‑lissaaʼhum gaaʼidiin.
Wa l‑ard di tamchi min bahar al‑Urdun fi l‑sabaah lahaddi l‑bahar al‑Abyad fi l‑kharib.
5 Wa Allah Ilaahku,
hu bas yatrud giddaamku al‑umam al‑lissaaʼhum gaaʼidiin achaan intu tichiilu baladhum misil hu waaʼadaaku beyah.
6 « Wa be da,
abgo chudaad wa fakkuru achaan tisawwu ayyi cheyy hasab al‑wasaaya al‑maktuubiin fi Tawraat Muusa.
Ma tibaaru minhum wa la isra wa la zeene.
7 Wa ma tilkhalbato maʼa l‑umam al‑lissaaʼhum jambuku wa la tifakkuru fi asaame ilaahaathum wa la tahalfu beehum wa la taʼabuduuhum wa la tasjudu leehum.
8 Wa waajib intu titmassako be Allah Ilaahku misil intu sawweetuuh min awwal lahaddi l‑yoom.
9 « Chiifu !
Allah galaʼ giddaamku ard al‑umam al‑kubaar wa chudaad.
Wa waahid minhum ma gidir yagiif giddaamku lahaddi l‑yoom.
10 Wa naadum waahid minku yatrud alif naadum achaan Allah Ilaahku gaaʼid yihaarib leeku misil hu gaalah leeku.
11 Wa chiilu niiye achaan tihibbu Allah Ilaahku.
12 Wa laakin kan khalleetu derib Allah wa atmassaktu be l‑umam al‑lissaaʼhum jambuku wa kan akhadtu minhum wa alkhalbattu maʼaahum,
13 khalaas,
aʼarfu kadar Allah Ilaahku battaan ma yaglaʼ ard al‑umam dool giddaamku.
Wa humman yabgo leeku misil amkajjaama wa charak wa soot al‑yafruchku wa chook fi uyuunku,
lahaddi kulluku tikammulu fi l‑ard al‑samhe di al‑antaaha leeku Allah Ilaahku.
14 « Wa daahu gariib numuut misil kulla makhluug fi l‑ard.
Wa laakin waajib taʼarfu be kulla guluubku wa be kulla fikirku kadar kulla l‑kalaam al‑kheer al‑gaalah Allah Ilaahku fi chaanku,
alhaggag.
Kulla l‑kalaam da alhaggag leeku,
ma fi kilme waahide kula al‑ma alhaggagat.
15 Wa laakin angarʼu !
Al‑kalaam al‑kheer al‑gaalah Allah Ilaahku alhaggag.
Wa misil da,
al‑kalaam al‑cheen al‑gaalah didduku kula yilhaggag lahaddi kulluku tikammulu fi l‑ard al‑samhe di,
al‑antaaha leeku Allah Ilaahku.
16 Wa kan nagadtu muʼaahadat Allah Ilaahku al‑hu amaraaku beeha wa kan abadtu ilaahaat aakhariin wa sajadtu giddaamhum,
khalaas khadab Allah yanzil foogku wa tawwaali tikammulu fi l‑balad al‑adiile al‑hu antaaha leeku. »