Yachuuʼ wassa al‑gabaayil
22
1 Wa khalaas,
Yachuuʼ naada gabiilat Raʼuubiin wa gabiilat Gaad wa nuss gabiilat Manassa
2 wa gaal leehum :
« Intu tabbagtu kulla l‑kalaam al‑amaraaku beyah Muusa abd Allah wa simiʼtu kulla kalaami al‑ana amartuku beyah.
3 Wa min wakit tawiil lahaddi l‑yoom,
intu ma abeetu akhwaanku wa hafadtu wasaaya Allah Ilaahku.
4 Wa hassaʼ Allah Ilaahku anta al‑raaha le akhwaanku misil hu waaʼadaahum beeha.
Wa hassaʼ tagdaro tamchu le khiyamku fi baladku al‑antaaha leeku Muusa abd Allah sabaah khaadi le bahar al‑Urdun.
5 Wa laakin fakkuru chadiid wa tabbugu al‑wasiiye wa l‑gaanuun al‑amaraaku beyah Muusa abd Allah.
Hibbu Allah Ilaahku wa amchu adiil fi derbah wa tabbugu wasiiyaatah wa atmassako be Allah wa aʼabuduuh be kulla guluubku wa be kulla fikirku. »
6 Wa Yachuuʼ baarakaahum wa gaal leehum yamchu le khiyamhum wa humman macho.
7 Wa le nuss waahid min gabiilat Manassa,
Muusa antaahum ard fi Baachaan sabaah le bahar al‑Urdun.
Wa l‑nuss al‑aakhar,
Yachuuʼ antaahum ard maʼa akhwaanhum kharib le bahar al‑Urdun.
Wa wakit Yachuuʼ gaal leehum yamchu le khiyamhum,
hu baarakaahum
8 wa gaal leehum :
« Amchu le khiyamku be l‑khuna al‑ligiituuha hana l‑bahaayim wa l‑fudda wa l‑dahab wa l‑nahaas wa l‑hadiid wa l‑lubaas al‑katiir.
Gassumu maʼa akhwaanku al‑khaniime al‑ligiituuha min udwaanku. »
Gabaayil al‑sabaah bano madbah
9 Wa be misil da,
gabiilat Raʼuubiin wa gabiilat Gaad wa nuss gabiilat Manassa gammo min bakaan Bani Israaʼiil fi Chiilooh fi balad Kanʼaan wa macho le balad Gilʼaad ard warasathum al‑Allah antaaha leehum be waasitat Muusa.
10 Wa wakit jo fi khachum bahar al‑Urdun fi balad Kanʼaan,
gabiilat Raʼuubiin wa gabiilat Gaad wa nuss gabiilat Manassa bano madbah jamb al‑bahar.
Wa l‑madbah da binchaaf kabiir.
11 Wa Bani Israaʼiil simʼo be l‑khabar al‑buguul :
« Daahu gabiilat Raʼuubiin wa gabiilat Gaad wa nuss gabiilat Manassa bano madbah fi balad Kanʼaan fi khachum bahar al‑Urdun wa da fi ard Bani Israaʼiil. »
12 Wa wakit Bani Israaʼiil simʼo al‑khabar da,
tawwaali kulla mujtamaʼ Bani Israaʼiil lammo fi Chiilooh achaan yamchu yahjumuuhum.
13 Wa Laakin gubbaal ma yamchu,
Bani Israaʼiil rassalo Fiinhaas wileed raajil al‑diin Aliʼaazar le turaab Gilʼaad achaan yamchi yihajji le gabiilat Raʼuubiin wa gabiilat Gaad wa nuss gabiilat Manassa.
14 Wa macho maʼaayah achara rujaal min kubaaraat aayilaat Bani Israaʼiil,
ayyi waahid masʼuul fi aayiltah ambeen aayilaat Bani Israaʼiil.
15 Wa l‑naas dool jo le gabiilat Raʼuubiin wa gabiilat Gaad wa nuss gabiilat Manassa fi turaab Gilʼaad wa gaalo leehum :
16 « Daahu kulla mujtamaʼ Allah buguulu leeku :
‹ Maala sawweetu khiyaana misil di didd Allah Ilaah Bani Israaʼiil ?
Wa maala al‑yoom khalleetu derib Allah wa baneetu leeku madbah wa isiitu Allah ?
17 Wa l‑khata al‑sawweena fi Faʼuur* ma tamma leena walla ?
Lahaddi al‑yoom ma tahharna nufuusna min al‑khata da,
kan Allah nazal fi chaʼabah waba kula.
18 Wa chiifu !
Al‑yoom,
intu khalleetu derib Allah wa isiituuh.
Wa ambaakir,
hu yazʼal didd kulla mujtamaʼ Bani Israaʼiil !
19 Wa kan ard warasatku ma taahire,
taʼaalu agoodu maʼaana fi ard warasatna al‑foogha kheemat Allah wa awrusuuha maʼaana sawa.
Wa laakin ma tugummu didd Allah wa la diddina aniina wa tabnu leeku madbah aakhar bala madbah Allah Ilaahna !
20 Wakit Akaan wileed Zaarah isi wa chaal al‑khumaam al‑haraam,*
hu ma hilik wiheedah be sabab khataayah laakin khadab Allah wagaʼ fi kulla mujtamaʼ Bani Israaʼiil !
› »
21 Wa gabiilat Raʼuubiin wa gabiilat Gaad wa nuss gabiilat Manassa raddo le kubaaraat aayilaat Bani Israaʼiil wa gaalo :
22 « Allah hu bas Ilaah al‑Ilaahaat !
Allah hu al‑Rabb !
Allah yaʼarif al‑sahiih wa waajib Bani Israaʼiil kula yaʼarfuuh !
Kan aniina gammeena didd Allah wa isiinaah,
khalli ma tinajjuuna al‑yoom.
23 Wa kan baneena leena madbah le nikhallu derib Allah wa le nigaddumu foogah dahaaya muharragiin aw hadaaya hana dagiig aw dahaaya salaama,
khalli Allah yiʼaakhibna !
24 La,
aniina sawweena al‑cheyy da achaan nakhaafo yoom waahid iyaalku yuguulu le iyaalna :
‹ Chunu alaakhitku intu be Allah Ilaah Bani Israaʼiil ?
25 Allah khatta bahar al‑Urdun huduud ambeenna aniina wa intu gabaayil Raʼuubiin wa Gaad.
Wa intu ma induku ayyi hagg fi Allah.
› Wa be da,
iyaalku yilizzu iyaalna achaan ma yakhaafo Allah.
26 Wa be sabab da bas,
aniina chilna niiye nabnu madbah wa laakin wa la le dahaaya muharragiin wa la le dahaaya aakhariin.
27 Wa da yukuun chahaada ambeenna aniina wa intu wa zurriiyitna al‑yaju waraana kadar indina hagg naʼabudu Allah be gaddimiin dahaaya muharragiin wa dahaaya salaama.
Wa be da,
ambaakir iyaalku ma yuguulu le iyaalna :
‹ Intu ma induku hagg taʼabudu Allah. ›
28 Wa aniina gulna ambeenaatna :
‹ Kan ambaakir al‑kalaam da gaalooh leena walla le zurriiyitna,
aniina nuguulu :
“Chiifu hajim madbah Allah al‑banooh abbahaatna.
Hu ma hana dahaaya muharragiin wa la hana dahaaya aakhariin wa laakin le yabga chahaada beenna aniina wa intu.” ›
29 Istakhfar Allah !
Abadan ma nugummu didd Allah wa la khalleena derbah al‑yoom.
Wa ma nabnu madbah hana dahaaya muharragiin wa hadaaya hana dagiig wa dahaaya aakhariin bala madbah Allah Ilaahna al‑gaaʼid giddaam kheemtah. »
30 Wa wakit raajil al‑diin Fiinhaas wa chuyuukh al‑mujtamaʼ wa kubaaraat aayilaat Bani Israaʼiil al‑macho maʼaayah simʼo al‑kalaam al‑gaalooh gabiilat Raʼuubiin wa gabiilat Gaad wa nuss gabiilat Manassa,
humman khassado beyah.
31 Wa Fiinhaas wileed raajil al‑diin Aliʼaazar gaal leehum :
« Al‑yoom aniina naʼarfu kadar Allah gaaʼid fi usutna achaan intu ma isiitu Allah.
Wa be da,
intu najjeetu Bani Israaʼiil min khadab Allah. »
32 Wa Fiinhaas wileed raajil al‑diin Aliʼaazar wa l‑kubaaraat gammo min gabaayil Raʼuubiin wa Gaad wa jo min turaab Gilʼaad le Bani Israaʼiil fi balad Kanʼaan.
Wa kallamoohum be kulla cheyy al‑hasal.
33 Wa Bani Israaʼiil kula khassado wa chakaro al‑Rabb.
Wa khallo minhum al‑harib wa l‑kharaab al‑awwal dawwaro yijiibu didd gabaayil Raʼuubiin wa Gaad.
34 Wa gabaayil Raʼuubiin wa Gaad gaalo :
« Al‑madbah da yachhad kadar Allah hu Ilaahna kullina !
» Wa sammo al‑madbah da Chaahid.