32
1 Ya sama,
asmaʼe
wa ana nihajji.
Ya ard,
khutti baalki
le kalaam khachmi.
2 Wa khalli taʼliimi yisiil
misil almi al‑matar
wa kalaami yanzil
misil karany
wa misil hadab almi fi l‑khadaar
wa misil matar fi l‑gechch.
3 Ana naʼlin usum Allah.
Ya l‑naas !
Arrufu kadar Ilaahna aziim.
4 Hu al‑maljaʼ
wa aʼmaalah tamaamiin
achaan duruubah kulluhum adaala.
Hu Ilaah amiin
wa ma indah ayyi zulum
wa saadikh wa aadil.
5 Wa giddaamah,
humman tallafo
be sabab eebhum.
Humman battaan ma iyaalah
achaan humman zurriiye ooja
wa munlawiye.
6 Wa misil da bas,
tisawwu maʼa Allah walla ?
Ya l‑matmuusiin !
Intu ma induku hikma.
Ma hu bas abuuku
al‑antaaku al‑haya walla ?
Wa hu bas al‑khalagaaku
wa sabbataaku.
7 Wa fakkuru fi l‑zamaan,
fi l‑ayyaam wa l‑siniin
min zurriiye le zurriiye
wa asʼalo abbahaatku wa yiʼooruuku
wa chiyyaabku yikallumuuku.
8 Wa wakit Allah al‑Aali
anta le l‑umam warasathum
wa wakit farrag Bani Adam,
hu khatta huduud le l‑chaʼab
hasab adad al‑ilaahaat.
9 Achaan gisim Allah,
hu chaʼabah Bani Israaʼiil
wa zurriiyit Yaakhuub kamaan,
humman warasatah.
10 Wa hu ligiihum fi ard sahara,
fi ard jafaaf
al‑foogha illa harakat al‑riih.
Hu hafadaahum wa allamaahum
wa fakkar fooghum
misil naadum yifakkir fi wald eenah.
11 Allah hu misil sagur
al‑yilizz iyaalah min al‑uchch
wa yuhuum min foog leehum
wa yimattit janaaheeh
wa yichiilhum fooghum.
12 Wa Allah wiheedah gaad chaʼabah
bala ilaah aakhar ajnabi maʼaayah.
13 Wa waddaahum
fi l‑bakaanaat al‑aaliyiin fi l‑balad
wa akkalaahum
min maʼaach al‑kadaade
wa akkalaahum asal
al‑saayil min al‑jibaal
wa antaahum dihin al‑zaytuun
min al‑hajar al‑gawi.
14 Wa akkalaahum raayib min laban al‑bagar
wa haliib min al‑khanam
wa antaahum laham samiin min humlaan
wa kubchaan hana Baachaan
wa tuyuus
wa akkalaahum dagiig al‑gameh
wa charrabaahum min asiir al‑inab al‑hu khamar.
15 Wa Bani Israaʼiil simno wa iso.
Aywa,
humman simno
wa gargato wa tikhno.
Wa khalaas abo Allah al‑khalagaahum
wa hagaro maljaʼhum wa munajjiihum.
16 Wa gawwamo khiirtah
be l‑ilaahaat al‑ajnabiyiin
wa khaddabooh be l‑haraam.
17 Wa l‑chaʼab dabaho le l‑chawaatiin
al‑humman ma al‑Rabb.
Aywa,
dabaho le l‑ilaahaat
al‑humman ma irfoohum.
Wa l‑ilaahaat dool jo dahaabhum
wa abbahaathum ma irfoohum.
18 Wa intu ma fakkartu fi Allah
al‑hu maljaʼku al‑antaaku al‑haya.
Aywa,
nisiitu Ilaahku
al‑jaabaaku fi l‑dunya.
19 Wa Allah chaafaahum wa rafadaahum
achaan iyaalah khaddabooh.
20 Wa gaal :
« Battaan ma niwajjih aleehum
wa nichiif chunu yukuun leehum fi l‑akhiir
achaan humman zurriiye mufside
wa iyaal al‑ma induhum amaan.
21 Wa ana bas Allah
wa humman gawwamo khiirti be ilaahhum
wa khaddabooni be asnaamhum al‑zaayliin.
Wa laakin ana kamaan nigawwim khiirithum
be l‑chaʼab al‑ma tammo umma
wa nizaʼʼilhum be umma matmuusa.
22 Achaan naar khadabi oogadat
wa akalat lahaddi l‑makhaabir
wa akalat al‑ard wa nabaatha
lahaddi asaas al‑jibaal.
23 Wa ninazzil fooghum kulla l‑masaayib
wa nikammil fooghum kulla nachaachiibi.
24 Wa juuʼ yibattilhum
wa wirde wa waba chadiid yagaʼo fooghum
wa nirassil didduhum haywaanaat fasliin
wa dabiib al‑indah samm al‑yaktul.
25 Barra,
al‑seef yaktul iyaalhum
wa daakhal,
al‑khoof yakrubhum.
Wa kulluhum yumuutu,
al‑subyaan wa l‑banaat
wa l‑atfaal wa l‑chiyyaab.
26 Wa ana nuguchchuhum be nafkha waahide
wa niwaddir zikirhum min ust al‑naas.
27 Wa ana gult udwaanhum
yichchammato wa yuguulu :
‹ Al‑cheyy da,
Allah ma sawwaah
laakin aniina bas gidirna fooghum.
› »
28 Achaan dool al‑umam al‑khittithum addammarat
wa ma induhum ayyi fihim.
29 Wa kan humman hakiimiin,
yafhamo al‑cheyy da
wa yaʼarfu mustakhbalhum.
30 Kikkeef raajil waahid yatrud alif naas
wa rujaal itneen yaturdu achara alif
kan Allah bas ma sallamaahum
wa maljaʼhum ma baaʼaahum ?
31 Achaan maljaʼhum ma misil maljaʼna
wa udwaanna yaʼarfuuh.
32 Humman misil chadar al‑inab
hana Saduum wa Amuura
al‑yalda inab murr wa musammam.
33 Wa khamarah misil samm abundarag
wa misil al‑samm al‑khatiir hana amchideegaat.
34 Wa Allah gaal :
« Da kulla mulabbad fi bakaani
wa makhtuum wa gaaʼid fi makhazani.
35 Wa ana bas al‑nichiil al‑taar
wa nanti al‑ajur wakit rijleehum yittartaʼo
achaan yoom kharaabhum garrab
wa yajiihum be surʼa. »
36 Aywa,
Allah yihaakim chaʼabah be l‑adil
wa yihinn fi abiidah
wakit yichiif ma induhum gudra
wa ma faddal waahid kula,
wa la abid wa la hurr.
37 Wa Allah yuguul :
« Ween ilaahaathum
wa ween maljaʼhum al‑yaljaʼo leyah ?
38 Wa ween ilaahaathum
al‑akalo chaham dahaayaahum
wa chirbo hadaaya charaabhum ?
Khalli yugummu yafzaʼoohum
wa yahmuuhum.
39 Wa hassaʼ,
aʼarfu ana bas al‑Rabb.
La Ilaah illa ana !
Ana bas al‑nahayi wa naktul
wa najrah wa nachfi
wa ma fi al‑yagdar yikhallis min iidi.
40 Wa nahlif be nafsi wa nuguul :
‹ Ana hayy ila l‑abad. ›
41 Wa wakit nitarrig seefi
wa nugumm be l‑adaala,
nichiil al‑taar fi udwaani
wa nilkaffa fi l‑yakrahooni.
42 Wa seefi yaakul laham
wa nachaachiibi yarwo be l‑damm
wa da,
damm al‑maytiin
wa masaajiin al‑harib
wa nagtaʼ ruuse al‑adu
be chaʼarhum al‑tuwaal. »
43 Ya l‑umam,
afraho maʼa chaʼabah
achaan Allah yilkaffa damm abiidah
wa yichiil al‑taar fi udwaanah
wa yikaffir le chaʼabah fi ardah.
44 Wa Muusa ja maʼa Yachuuʼ wileed Nuun wa raddad kulla kalaam al‑khine da giddaam al‑chaʼab.
45 Wa wakit Muusa kammal al‑kalaam da giddaam kulla Bani Israaʼiil,
46 hu gaal leehum :
Fakkuru fi kulla l‑kalaam al‑ana hazzartuku beyah al‑yoom.
Wa allumuuh le awlaadku achaan yahfado wa yitabbugu kulla kalaam al‑wasaaya dool.
47 Achaan al‑kalaam da,
muhimm leeku.
Wa l‑kalaam da,
hu hayaatku wa yiziid umurku fi l‑balad al‑tamchu leeha wa tichiiluuha warasa baʼad tagtaʼo bahar al‑Urdun.
Muusa ma yadkhul fi l‑balad
48 Wa fi nafs al‑yoom da,
Allah hajja le Muusa wa gaal :
49 « Atlaʼ fi ruuse jibaal Abaariim wa lahaddi jabal Nabu al‑fi ard Muwaab mugaabil Ariiha.
Wa chiif ard Kanʼaan al‑ana nantiiha warasa le Bani Israaʼiil.
50 Wa inta tumuut fi raas al‑jabal al‑tatlaʼ foogah wa talhag abbahaatak misil Haaruun akhuuk maat fi jabal Hoor wa lihig abbahaatah.
51 Achaan intu bigiitu khaayniin leyi ana fi lubb Bani Israaʼiil fi een almi Mariiba* gariib le hillit Khaadich fi saharat Siin wakit intu ma khaddastuuni fi lubb Bani Israaʼiil.
52 Wa khalaas inta tichiif al‑balad min baʼiid giddaamak wa laakin ma tadkhul fi l‑balad al‑nantiiha le Bani Israaʼiil di. »