Moot Muusa wa darrijiin Yachuuʼ
31
1 Wa Muusa hajja battaan le kulla Bani Israaʼiil wa gaal :
2 Al‑yoom ana indi 120 sana wa be da,
ma nagdar nuguudku battaan.
Wa Allah kula gaal leyi :
« Inta ma tagtaʼ bahar al‑Urdun da. »*
3 Wa Allah Ilaahku hu yamchi giddaamku wa yidammir al‑umam wa intu tichiilu arduhum.
Wa Yachuuʼ yamchi giddaamku misil Allah gaalah.
4 Wa Allah yisawwi foog al‑umam dool misil sawwaah fi Siihuun wa Oog muluuk al‑Amuuriyiin wa baladhum wakit dammaraahum.
5 Wa Allah yisallimhum leeku fi iideeku wa tisawwu fooghum hasab al‑wasaaya al‑ana amartuku beehum.
6 Wa abgo chudaad wa fahaliin wa la takhaafo wa la tarjufu giddaamhum achaan Allah Ilaahku maachi maʼaaku wa la yaabaaku wa la yikhalliiku.
7 Wa Muusa naadaah le Yachuuʼ giddaam kulla Bani Israaʼiil wa gaal leyah :
Abga chadiid wa fahal achaan inta bas al‑tadkhul maʼa l‑chaʼab da fi l‑balad al‑fi chaanha Allah halaf le juduudhum wa gaal yantiiha leehum.
Wa inta bas al‑tantiihum al‑balad di warasa.
8 Wa Allah maachi giddaamak wa hu gaaʼid maʼaak wa la yaabaak wa la yikhalliik wa ma takhaaf wa la tinbahit.
Muusa anta al‑chariiʼa le l‑Laawiyiin
9 Wa Muusa katab al‑wasaaya dool wa antaahum le rujaal al‑diin iyaal Laawi al‑chaayliin sanduug muʼaahadat Allah wa le kulla chuyuukh Bani Israaʼiil.
10 Wa Muusa amaraahum wa gaal :
Baʼad sabʼa siniin fi sanit afu al‑deen wa fi iid al‑Lagaadiib
11 wakit kulla Bani Israaʼiil yaju giddaam Allah Ilaahku fi l‑bakaan al‑hu yaʼazilah,
agru leehum al‑wasaaya dool achaan yasmaʼoohum.
12 Wa limm kulla l‑chaʼab,
al‑rujaal wa l‑awiin wa l‑iyaal wa l‑ajaanib al‑gaaʼidiin maʼaaku fi hillaalku,
achaan yasmaʼo wa yilʼallamo al‑khoof min Allah Ilaahku wa yahfado wa yitabbugu kulla kalaam al‑wasaaya dool.
13 Wa iyaalhum al‑ma yaʼarfuuh kula yasmaʼooh wa yilʼallamo al‑khoof min Allah Ilaahku.
Wa da fi kulla muddit hayaatku fi l‑ard al‑tichiiluuha warasa baʼad tagtaʼo bahar al‑Urdun.
Bani Israaʼiil baʼad moot Muusa
14 Wa Allah gaal le Muusa :
« Daahu ayyaam mootak garrabo.
Naadi Yachuuʼ wa agiifu fi lubb kheemat al‑ijtimaaʼ wa ana nantiih awaamiri. »
Wa Muusa wa Yachuuʼ macho wagafo fi lubb kheemat al‑ijtimaaʼ.
15 Wa Allah baan fi amuud hana sahaab.
Wa amuud al‑sahaab da wagaf fi baab al‑kheema.
16 Wa Allah gaal le Muusa :
« Daahu inta tumuut wa talhag abbahaatak.
Wa l‑chaʼab dool yugummu yaʼabudu ilaahaat al‑ajaanib al‑gaaʼidiin fi l‑balad al‑yadkhulu foogha.
Wa humman yikhalluuni wa yagtaʼo muʼaahadati al‑sawweetha maʼaahum.
17 Wa fi l‑yoom da,
khadabi yabga chadiid didduhum.
Wa ana nikhalliihum wa ma niwajjih aleehum.
Wa khalaas,
yagaʼo fi l‑bala al‑katiir wa l‑taʼab yalhaghum wa fi l‑yoom da,
yuguulu :
‹ Akiid al‑bala da lihigna achaan Ilaahna ma kaan maʼaana ! ›
18 Wa laakin ana fi l‑yoom da kula battaan ma niwajjih aleehum wa da be sabab kulla l‑fasaala al‑sawwooha wakit taabaʼo ilaahaat aakhariin.
19 « Wa hassaʼ,
aktubu al‑khine da wa allumuuh le Bani Israaʼiil.
Wa ahfadooh leehum achaan al‑khine da yachhad leyi didd Bani Israaʼiil.
20 Wa be da,
ana niwaddiihum le l‑balad al‑ana halaft le juduudhum wa gult nantiiha leehum wa di l‑balad al‑malaane be l‑laban wa l‑asal.
Wa humman yaakulu wa yachbaʼo wa yasmano wa yamchu le ilaahaat aakhariin wa yaʼabuduuhum.
Wa humman yahguruuni ana wa yangudu muʼaahadati.
21 Wa wakit yagaʼ fooghum al‑bala al‑katiir wa l‑taʼab,
al‑khine da zurriiyithum ma yansooh wa hu yabga leyi chahaada fooghum.
Wa l‑yoom,
ana naʼarif tamaam al‑cheyy al‑humman yidooru yisawwuuh gabul ana ma nidakhkhilhum fi l‑balad al‑ana halaft le juduudhum wa gult nantiiha leehum. »
22 Wa fi l‑yoom da,
Muusa katab al‑khine da wa allamah le Bani Israaʼiil.
23 Wa Allah amar Yachuuʼ wileed Nuun wa gaal leyah :
« Abga chadiid wa fahal achaan inta bas al‑tidakhkhil Bani Israaʼiil fi l‑balad al‑ana halaft wa gult nantiiha leehum wa ana kula nukuun maʼaak. »
24 Wa wakit Muusa kammal min kitaabit kulla kalaam al‑wasaaya dool fi l‑kitaab,
25 anta amur le l‑Laawiyiin al‑chaayliin sanduug muʼaahadat Allah wa gaal :
26 Chiilu kitaab al‑Tawraat da wa khuttuuh jamb sanduug muʼaahadat Allah Ilaahku wa hu yagood misil chahaada didd Bani Israaʼiil.
27 Achaan ana naʼarif isyaanhum wa gu raashum.
Wa wakit ana lissaaʼ hayy fi usuthum,
humman iso Allah.
Wa chunu yukuun baʼad ana numuut ?
28 Wa hassaʼ da,
jiibu giddaami kulla chuyuukh gabaayilku wa muraakhibiinku wa nuguul leehum al‑kalaam da wa nijiib al‑sama wa l‑ard le yachhado foogku.
29 Achaan ana naʼarif baʼad mooti humman yitallufu marra waahid wa yikhallu al‑derib al‑amartuhum beyah wa fi l‑akhiir,
al‑charr yalhaghum achaan yisawwu al‑fasaala giddaam Allah wa yikhaddubuuh be khidmithum.
Al‑khine hana Muusa
30 Wa khalaas,
Muusa raddad kulla kalimaat al‑khine da giddaam kulla mujtamaʼ Bani Israaʼiil.