Al‑wasaaya al‑achara
5
1 Wa Muusa naada kulla Bani Israaʼiil wa gaal leehum :
Asmaʼo,
ya Bani Israaʼiil,
al‑churuut wa l‑gawaaniin al‑niʼooruuku beehum al‑yoom.
Allumuuhum wa ahfadoohum wa tabbuguuhum.
2 Allah Ilaahna sawwa maʼaana muʼaahada fi Huuriib.*
3 Wa l‑muʼaahada di,
Allah ma sawwaaha maʼa abbahaatna bas wa laakin sawwaaha maʼaana aniina kula al‑gaaʼidiin hayyiin al‑yoom.
4 Wa Allah gaabalaaku wa hajja maʼaaku fi l‑jabal,
min ust al‑naar.
5 Wa fi l‑wakit daak,
ana bigiit wasiit ambeenku intu wa Allah le niʼooriiku be kalaamah.
Achaan intu khuftu min al‑naar wa ma talaʼtu fi l‑jabal.
7 « Ma taʼabud ilaahaat aakhariin illa ana.
8 « Ma tasnaʼ sanam fi ayyi hajim min al‑achya al‑gaaʼidiin foog fi l‑sama aw tihit fi l‑ard aw fi lubb al‑almi al‑fi l‑ard.
9 Wa ma tasjud giddaam al‑asnaam dool wa la taʼabudhum achaan ana bas Allah Ilaahak.
Ana Allah khayyuur yaʼni ma nidoor taʼabud ilaah aakhar.
Wa ana niʼaakhib al‑iyaal wa iyaal al‑iyaal be zunuub abbahaathum lahaddi l‑zurriiye al‑taalta wa l‑raabʼe kan humman yakrahooni.
10 Wa laakin ana nisawwi al‑kheer le aalaaf al‑zurriiyaat al‑yihibbuuni wa yitabbugu wasiiyaati.
11 « Ma tahlif be usmi ana Allah Ilaahak be kidib achaan al‑yahlif be usmi be kidib,
ana Allah ma najʼalah bari.
12 « Ahfad yoom al‑sabt wa ajʼalah yoom mukhaddas misil ana Allah Ilaahak amarak beyah.
13 Inta takhdim le muddit sitte yoom wa tikammil kulla khidimtak.
14 Wa laakin al‑yoom al‑saabiʼ,
hu sabt leyi ana Allah Ilaahak.
Fi l‑yoom da,
ma takhdim ayyi cheyy,
wa la inta wa la awlaadak wa la banaatak wa la abiidak wa la khadiimak wa la tiiraanak wa la hamiirak wa la kulla bahaaymak wa la l‑ajaanib al‑gaaʼidiin maʼaak fi hillitak.
Wa da yikhalli abdak wa khaadmak kula yinjammo mislak.
15 Wa azzakkar kadar inta bigiit abid fi balad Masir wa ana Allah Ilaahak maragaak be iid chadiide wa be duraaʼ gawi wa fi chaan da,
ana Allah Ilaahak amarak tikarrim yoom al‑sabt.
16 « Karrim ammak wa abuuk misil ana Allah Ilaahak amarak beyah achaan umrak yabga tawiil wa talga al‑kheer fi l‑ard al‑nantiiha leek ana Allah Ilaahak.
17 « Ma taktul dimme.
18 « Ma tazna.
19 « Ma tasrig.
20 « Ma tachhad be kidib fi ayyi waahid min jiiraanak.
21 « Ma titmanna marit jaarak.
Wa la tatmaʼ fi beet jaarak wa la zerʼah wa la abdah wa la khaadmah wa la toorah wa la humaarah wa la ayyi cheyy hanaayah. »
22 Wa l‑kalaam da,
Allah gaalah le kulla l‑chaʼab fi l‑jabal,
min ust al‑naar wa l‑sahaab wa khamaam azrag kurum.
Wa kallamaahum be soot aali wa ma zaad foogah cheyy.
Wa l‑kalaam da,
hu katabah fi liihaan itneen hana hajar wa antaahum leyi ana Muusa.
Bani Israaʼiil simʼo kalaam Allah
23 Wa wakit simiʼtu al‑hiss min ust al‑dalaam wa l‑jabal gaaʼid yahrag,
intu garrabtu leyi maʼa kulla chuyuukh gabaayilku wa kubaaraatku.
24 Wa intu gultu :
« Daahu Allah Ilaahna bayyan leena majdah wa azamatah wa simiʼna hissah min ust al‑naar.
Wa l‑yoom,
aniina chifna wa irifna kadar mumkin Allah yihajji le l‑insaan wa l‑insaan da ma yumuut.
25 Wa hassaʼ maala numuutu be l‑naar al‑kabiire al‑taakulna ?
Achaan kan battaan gaaʼidiin nasmaʼo hiss Allah Ilaahna,
numuutu.
26 Hal fi insaan misilna simiʼ hiss Allah al‑Hayy min ust al‑naar wa gaʼad hayy walla ?
27 Wa khalaas hassaʼ da,
inta ya Muusa,
garrib le Allah Ilaahna wa asmaʼ kulla kalaamah.
Wa baʼadeen,
hajjiina be kulla l‑kalaam al‑yuguulah leek Allah Ilaahna.
Wa aniina nasmaʼo kalaamah wa nitabbuguuh. »
28 Wa Allah simiʼ kulla kalaamku al‑gultuuh leyi wa gaal :
« Ana simiʼt kulla l‑kalaam al‑gaalooh leek al‑chaʼab wa kalaamhum da kulla ke adiil.
29 Wa nitmanna kulla yoom humman yakhaafo minni wa yitabbugu kulla wasiiyaati.
Wa da le yalgo al‑kheer,
humman wa iyaalhum ila l‑abad.
30 Amchi guul leehum :
‹ Gabbulu fi khiyamku. ›
31 Wa inta kamaan,
ya Muusa,
agood giddaami hini wa ana nikallimak kulla l‑wasaaya wa l‑churuut wa l‑gawaaniin.
Wa allimhum le chaʼabi wa humman yitabbuguuhum fi l‑balad al‑ana nantiiha leehum warasa. »