Muusa amar be tabbigiin al‑churuut
4
1 Wa Muusa gaal :
Hassaʼ da,
ya Bani Israaʼiil,
asmaʼo al‑churuut wa l‑gawaaniin al‑ana zaati niʼallimhum leeku wa tabbuguuhum.
Wa be da,
talgo al‑haya wa tadkhulu fi l‑balad al‑yantiiha leeku Allah Rabb juduudku wa tichiiluuha warasa.
2 Ma tiziidu cheyy fi l‑awaamir al‑ana amartuku beehum wa la tangusu minhum cheyy.
Achaan tahfado wasaaya Allah Ilaahku al‑ana amartuku beehum.
3 Wa intu chiftu be uyuunku al‑cheyy al‑sawwaah Allah fi hillit Baʼal Faʼuur.
Wa fi usutku,
Allah Ilaahku katal kulla l‑naas al‑abado ilaah Baʼal hana jabal Faʼuur.*
4 Wa laakin intu al‑munrabitiin maʼa Allah Ilaahku,
kulluku hayyiin al‑yoom.
5 Chiifu,
ana allamtuku gawaaniin wa churuut misil Allah Ilaahi amaraani beyah achaan titabbuguuhum fi l‑balad al‑tadkhulu foogha wa tichiiluuha warasa.
6 Ahfadoohum wa tabbuguuhum wa beehum talgo al‑maʼrafa wa l‑hikma giddaam al‑chuʼuub al‑mujaawiriinku.
Wa wakit al‑chuʼuub al‑mujaawiriinku yasmaʼo al‑churuut dool,
yuguulu :
« Akiid al‑umma al‑kabiire di indaha maʼrafa wa hikma. »
7 Achaan weeni al‑umma al‑kabiire al‑indaha ilaahaat gariibiin leeha misil Allah Ilaahna wakit ninaaduuh fi ayyi wakit ?
8 Wa weeni al‑umma al‑kabiire al‑indaha gawaaniin wa churuut aadiliin min kulla l‑wasaaya al‑ana al‑yoom nantiihum leeku dool ?
9 Wa laakin angarʼu !
Ahfado adiil nufuusku achaan ma tanso al‑achya al‑chaafoohum uyuunku.
Wa fi kulla muddit hayaatku,
khalli ma yamurgu min guluubku.
Wa arrufuuhum le iyaalku wa le iyaal iyaalku.
Muusa zakkar al‑naas be l‑muʼaahada
10 Fakkuru fi l‑yoom al‑wagaftu foogah giddaam Allah Ilaahku fi jabal Huuriib wakit Allah gaal leyi :
« Limm leyi al‑chaʼab achaan yasmaʼo al‑kalaam al‑nuguulah leehum wa be da,
yilʼallamo kikkeef yakhaafo minni fi kulla muddit hayaathum.
Wa yiʼallumuuh le awlaadhum kula. »
11 Wa fi l‑yoom da,
garrabtu leyi wa wagaftu fi gaʼar al‑jabal wa l‑jabal mugabbad naar lahaddi naarah taalʼe fi l‑sama wa indah dalaam wa sahaab wa khamaam azrag kurum.*
12 Wa Allah hajja leeku min ust al‑naar wa intu simiʼtu kalaamah.
Ma chiftu ayyi hajim wa laakin simiʼtu hissah.
13 Wa hu ooraaku be muʼaahadatah wa amaraaku titabbugu al‑wasaaya al‑achara wa hu katabaahum fi liihaan itneen hana hajar.*
14 Wa fi l‑wakit da,
Allah amaraani niʼallimku al‑gawaaniin wa l‑churuut achaan titabbuguuhum fi l‑balad al‑tadkhulu foogha wa tichiiluuha warasa.
Ibaadat al‑sanam mamnuuʼa
15 Angarʼu wa ahfado nufuusku achaan intu ma chiftu ayyi hajim wakit Allah hajja leeku min ust al‑naar fi Huuriib.
16 Wa da achaan ma titallufu nufuusku wa tasnaʼo leeku sanam fi ayyi hajim wa taʼabuduuh misil fi hajim raajil aw fi hajim mara
17 aw fi hajim ayyi haywaan fi l‑ard aw fi hajim ayyi teeraay al‑titiir fi l‑sama
18 aw fi hajim ayyi haywaan al‑yazhaf fi l‑ard aw fi hajim ayyi huut fi lubb al‑almi.
19 Ma tarfaʼo uyuunku le l‑sama wa tichiifu al‑harraay wa l‑gamar wa l‑nujuum wa kulla khuwwaat al‑sama wa yaʼajubuuku wa tasjudu giddaamhum wa taʼabuduuhum.
Humman dool,
Allah Ilaahku antaahum le kulla l‑chuʼuub al‑aakhariin al‑gaaʼidiin tihit al‑sama.
20 Wa laakin intu bigiitu hineey Allah,
hu al‑chaalaaku wa maragaaku min balad Masir wa hi balad al‑misil jahannam al‑tagtaʼ al‑hadiid.
Wa da,
achaan tabgo chaʼabah wa warasatah misil intu bigiitu leyah al‑yoom.
21 Wa Allah khidib aleyi fi chaanku intu.
Wa halaf wa gaal abadan ana ma nagtaʼ bahar al‑Urdun wa ma nadkhul fi l‑balad al‑adiile al‑Allah Ilaahku yantiiha leeku warasa.
22 Wa kan leyi ana,
numuut fi l‑balad di,
ma nagtaʼ bahar al‑Urdun maʼaaku.
Wa laakin intu tagtaʼooh wa tichiilu al‑balad al‑adiile di warasa.
23 Angarʼu ma tanso al‑muʼaahada al‑sawwaaha maʼaaku Allah Ilaahku wa la tisawwu leeku sanam fi ayyi hajim.
Wa da l‑cheyy al‑hu daharaaku minnah.
24 Achaan khadab Allah Ilaahku misil naar al‑tahrig.
Wa hu Ilaah khayyuur yaʼni ma yidoor taʼabudu ilaah aakhar.
25 Wa wakit taskunu wa titawwulu fi l‑balad di,
wa taldo iyaal wa iyaalku kula yaldo iyaal,
ma tisawwu sanam fi ayyi hajim le tisawwu al‑fasaala giddaam Allah Ilaahku wa tikhaddubuuh.
26 Wa khalaas al‑yoom bas,
ana nichahhid foogku al‑samaawaat wa l‑ard.
Kan sawweetu fasaala misil di,
Allah yuguchchuku tawwaali min al‑balad al‑tichiiluuha warasa wa tagoodu foogha khaadi le bahar al‑Urdun.
Wa l‑ard di ma tagoodu foogha titawwulu achaan hu yidammirku marra waahid.
27 Wa Allah yichattitku fi lubb al‑umam wa tifaddil minku umma sakhayre bas fi lubb al‑umam al‑Allah yiwaddiiku fi bakaanhum.
28 Wa hinaak taʼabudu ilaahaat hana hatab wa hajar al‑sanaʼaahum insaan be iidah,
al‑abadan ma chaafo wa la simʼo wa la akalo wa la chammo.
29 Wa khalaas,
min hinaak tifattuchu Allah Ilaahku.
Wa kan tifattuchuuh be kulla guluubku wa kulla fikirku,
khalaas talgooh.
30 Wa kan fi diigitku tiwaajuhu kulla l‑kalaam da,
khalaas fi l‑akhiir,
tigabbulu le Allah Ilaahku wa tasmaʼo kalaamah.
31 Achaan Allah Ilaahku,
hu Ilaah rahiim.
Wa la yaabaaku wa la yidammirku wa la yansa al‑muʼaahada al‑halaf beeha le abbahaatku.
Allah azal chaʼabah
32 Fakkuru fi l‑zaman al‑faat min Allah khalag al‑insaan fi l‑ard.
Wa fakkuru fi kulla cheyy al‑bigi fi l‑dunya min tarafha le tarafha.
Cheyy kabiir misil da bigi walla ?
Wa simiʼtu cheyy mislah walla ?
33 Wa hal fi naas misilku intu al‑simʼo hiss al‑Rabb hajja leehum min ust al‑naar wa gaʼado hayyiin walla ?
34 Wa hal fi ilaah aakhar al‑jarrab yichiil le nafsah umma min usut umma aakhara be tajriba aw be alaamaat aw be ajaayib aw be harib aw be iid chadiide aw be duraaʼ gawi aw be khoof chadiid misil al‑sawwaah Allah Ilaahku fi balad Masir walla ?
Wa da intu chiftuuh be uyuunku.
35 Wa waddah leeku le taʼarfu kadar Allah hu bas al‑Ilaah wa la ilaah illa hu.
36 Wa min al‑sama,
hu khallaaku simiʼtu hissah le yantiiku adab.
Wa fi l‑ard,
hu chawwafaaku naarah al‑kabiire wa min ust al‑naar intu simiʼtu kalaamah.
37 Wa da achaan hu habba abbahaatku wa azal zurriiyithum al‑baʼadhum.
Wa maragaaku min balad Masir be gudurtah al‑kabiire
38 le yaglaʼ balad al‑umam al‑kubaar wa chudaad minku.
Wa yantiiha leeku warasa wa tadkhulu foogha.
Wa da,
misil al‑gaaʼid yabga al‑yoom.
39 Wa l‑yoom,
aʼarfu wa khuttu fi guluubku kadar Allah hu bas Rabb al‑samaawaat wa l‑ard.
Wa la ilaah illa hu.
40 Wa intu wa le iyaalku,
ahfado al‑churuut wa l‑wasaaya al‑naamurku beehum al‑yoom achaan talgo al‑kheer wa umurku kula yabga tawiil fi l‑ard al‑antaaha leeku Allah Ilaahku le l‑abad.
Mudun al‑luju al‑talaata
41 Wa khalaas,
Muusa azal talaata mudun sabaah le bahar al‑Urdun.
42 Wa l‑mudun dool yabgo hana luju le l‑naadum al‑katal naadum aakhar bala raayah,
al‑ma indah maʼaayah ayyi karaahiiye min awwal.
Wa wakit al‑kaatil yajri wa yamchi le waahide min al‑mudun dool,
hayaatah madmuuna.
43 Wa l‑mudun dool,
humman Baasar al‑fi l‑khala fi l‑sahale le gabiilat Raʼuubiin,
wa Raamuut al‑fi Gilʼaad le gabiilat Gaad,
wa Joolaan fi turaab Baachaan le gabiilat Manassa.
44 Wa dool al‑gawaaniin al‑Muusa khattaahum le Bani Israaʼiil.
Bani Israaʼiil sabaah bahar al‑Urdun
45 Wa baʼad marago min balad Masir,
Muusa anta Bani Israaʼiil faraayid wa churuut wa gawaaniin.
46 Wa da khaadi le bahar al‑Urdun fi waadi al‑mugaabil hillit Beet Faʼuur fi balad Siihuun malik al‑Amuuriyiin al‑sakan fi Hachbuun.
Wa wakit Muusa wa Bani Israaʼiil marago min balad Masir,
haarabooh le l‑malik da wa annasaro foogah.
47 Wa humman chaalo baladah wa balad Oog malik Baachaan.
Wa humman al‑itneen dool muluuk al‑Amuuriyiin al‑gaaʼidiin sabaah khaadi le bahar al‑Urdun.
48 Wa buldaanhum macho min hillit Aruuʼir al‑fi khachum waadi Arnuun lahaddi jabal Siyuun al‑binaaduuh Harmuun,
49 wa kulla l‑Araba sabaah khaadi le bahar al‑Urdun lahaddi l‑bahar al‑Mayyit fi gaʼar jabal al‑Fisga.