Kitaab al‑Tasniya
min Tawraat Muusa
Muusa yizakkir al‑chaʼab
1
1 Wa daahu al‑kalaam al‑Muusa gaalah le kulla Bani Israaʼiil sabaah le bahar al‑Urdun fi l‑sahale mugaabil Suuf.
Wa da ambeen Faaraan wa Tuufal wa Laabaan wa Hasiruut wa Dizahaab.
2 Wa min Huuriib le Khaadich Barniiʼa,
indah 11 yoom be l‑rijil.
Wa da be l‑derib al‑yiʼaddi be balad jibaal Saʼiir.
3 Wa fi l‑yoom al‑awwal fi chahri 11 hana sanit 40 baʼad marago min balad Masir,
Muusa kallam le Bani Israaʼiil hasab kulla l‑kalaam al‑amarah beyah Allah.
4 Wa da baʼad annasar fi Siihuun malik al‑Amuuriyiin al‑gaaʼid fi Hachbuun wa annasar fi Oog fi hillit Idraʼi.*
Wa Oog da malik Baachaan al‑saakin fi Achtaruut.
5 Wa Muusa gamma yiwaddih wasaaya Allah fi balad Muwaab sabaah le bahar al‑Urdun wa gaal :
6 Wakit aniina gaaʼidiin fi jabal Huuriib,
Allah Ilaahna kallam leena wa gaal :
« Kafaaku ma tagoodu fi l‑jabal da.
7 Gummu siiru battaan wa amchu le jibaal al‑Amuuriyiin wa le kulla l‑naas al‑hawaaleehum fi l‑Araba wa balad al‑jibaal wa l‑sahale wa saharat Nagab wa khachum al‑bahar al‑Abyad wa balad al‑Kanʼaaniyiin wa Lubnaan wa lahaddi l‑Furaat al‑bahar al‑kabiir.
8 Daahu ana anteetku kulla l‑balad di.
Amchu wa chiiluuha !
Di l‑balad al‑ana Allah halaft nantiiha le juduudku Ibraahiim wa Ishaakh wa Yaakhuub wa le zurriiyithum al‑baʼadhum. »
9 Fi l‑wakit daak,
ana Muusa gult :
« Ana wiheedi ma nagdar nichiil masʼuuliiyitku.
10 Wa Allah Ilaahku kattaraaku wa l‑yoom bigiitu katiiriin misil nujuum al‑sama.
11 Wa khalli Allah Rabb juduudku yiziid adadku alif marra wa yibaarikku misil hu gaalah.
12 Wa kikkeef ana wiheedi nagdar nichiil al‑masʼuuliiye hana machaakilku wa tagalatku ?
13 Hassaʼ da,
aʼazulu rujaal al‑induhum hikma wa faahimiin wa maʼruufiin fi gabaayilku le nukhuttuhum masʼuuliin foogku. »
14 Wa intu gultu leyi :
« Kalaamak al‑gultah da adiil.
Nisawwuuh. »
15 Wa ana chilt naas wa khatteethum kubaaraat fi gabaayilku wa l‑naas dool humman rujaal al‑induhum hikma wa maʼruufiin.
Wa ana khatteethum kubaaraat fi acharaat wa khamsiinaat wa miyaat wa aalaaf wa khatteethum misil muraakhibiin fi gabaayilku.*
16 Wa fi l‑wakit daak,
ana anteet al‑amur da le gudiyaaku wa gult :
« Asmaʼo kalaam akhwaanku wa ahkumu le ayyi waahid be adaala kan maʼa akhuuh walla maʼa ajnabi kula.
17 Ma timayyulu fi l‑chariiʼa,
asmaʼo al‑sakhayyar wa l‑kabiir.
Ma takhaafo min naadum achaan al‑chariiʼa hint al‑Rabb.
Wa kan al‑chariiʼa bigat leeku gawiiye kula,
jiibuuha leyi ana nichiifha. »
18 Wa fi l‑wakit daak,
ana anteetku amur fi kulla cheyy al‑waajib tisawwuuh.
Muusa rassal rujaal yuruukhu al‑balad
19 Wa gammeena sirna min Huuriib wa chaggeena kulla l‑sahara al‑wasiiʼe wa l‑mukhiife al‑intu chiftuuha.
Wa chilna derib jibaal al‑Amuuriyiin misil Allah Ilaahna amaraana beyah.
Wa wassalna fi Khaadich Barniiʼa.
20 Wa ana gult leeku :
« Daahu jiitu fi jibaal al‑Amuuriyiin al‑yantiihum leena Allah Ilaahna al‑yoom.
21 Chiifu !
Allah Ilaahku antaaku al‑balad.
Gummu amchu chiiluuha misil Allah Rabb juduudku gaalah leeku.
Ma takhaafo wa la tinbahtu. »
22 Wa intu kulluku garrabtu leyi wa gultu :
« Nirassulu naas giddaamna yuruukhu al‑balad wa yijiibu leena khabar al‑derib al‑nichiiluuh wa l‑mudun al‑namchu leehum. »
23 Wa ana chift al‑fikra di adiile wa chilt minku 12 raajil,
min ayyi gabiila raajil waahid.
24 Wa l‑rujaal dool macho ale balad al‑jibaal wa wassalo lahaddi waadi Achkuul wa raakhooh.*
25 Wa jaabo maʼaahum min fawaakih al‑balad di wa wassafoohum leena.
Wa kallamo leena wa gaalo :
« Al‑balad al‑yantiiha leena Allah Ilaahna di,
hi adiile. »
26 Wa laakin intu abeetu ma tamchu leeha wa isiitu amur Allah Ilaahku.
27 Wa gaawaltu fi lubb khiyamku wa gultu :
« Be sabab karaahiiytah leena,
Allah maragaana min balad Masir le yisallimna le l‑Amuuriyiin wa yidammirna.
28 Ween namchu ?
Akhwaanna waddaro chajaaʼitna wakit gaalo :
‹ Sukkaan al‑balad di tuwaal wa chudaad minnina.
Wa mudunhum mudun kubaar wa gawiyiin wa muhawwagiin be daraadir tuwaal lahaddi l‑sama.
Wa battaan,
hinaak chifna naas min Bani Anakh al‑tuwaal wa chudaad.
› »
29 Wa ana gult leeku :
« Ma tinbahtu wa la takhaafo minhum.
30 Allah Ilaahku yamchi giddaamku wa hu zaatah yihaarib leeku misil hu sawwaah awwal fi Masir wa intu chiftuuh be uyuunku.
31 Wa battaan fi l‑sahara hinaak,
chiftu Allah Ilaahku chaalku misil raajil yichiil wileedah,
fi kulla tuul al‑derib al‑intu rukhtu foogah lahaddi jiitu fi l‑bakaan da. »
32 Wa be da kula,
ma induku amaan le Allah Ilaahku.
33 Wa hu maachi giddaamku fi l‑derib le yifattich leeku bakaan al‑tanzulu foogah.
Wa maachi giddaamku be l‑leel fi amuud hana naar le yidawwi leeku fi l‑derib al‑intu maachiin foogah wa be nahaar fi amuud hana sahaab.
34 Wa Allah simiʼ be l‑kalaam al‑intu gultuuh.
Wa fi khadabah,
hu halaf wa gaal :
35 « Waahid min al‑zurriiye al‑fasle di ma yichiif al‑balad al‑adiile al‑ana waaʼadt wa gult nantiiha le juduudhum.
36 Illa Kaalib wileed Yafuuna bas yichiifha.
Hu raakh al‑balad di zamaan wa ana nantiiha leyah hu wa le zurriiytah achaan hu taabaʼ derib Allah tamaam. »
37 Wa hatta foogi ana Muusa kula,
Allah khidib wa da fi chaanku intu.
Wa gaal :
« Inta kula,
ya Muusa,
abadan ma tadkhul fi l‑balad di.
38 Wa laakin khaddaamak Yachuuʼ wileed Nuun yadkhul foogha.
Wa inta chajjiʼah achaan hu bas al‑yanti al‑balad di le Bani Israaʼiil misil warasa.
39 Wa iyaalku al‑gultu yabgo kasiibe wa iyaalku al‑ma yafsulu been al‑kheer wa l‑charr,
humman dool bas yadkhuluuha.
Wa leehum humman,
ana anteet al‑balad wa humman yichiiluuha.
40 Wa laakin intu kamaan,
gabbulu wa amchu le l‑sahara ale l‑bahar al‑Ahmar. »
41 Wa intu gultu leyi :
« Sahiih !
Aniina aznabna didd Allah.
Wa hassaʼ namchu nihaarubu hasab kulla cheyy al‑amar beyah Allah Ilaahna.
» Wa ayyi waahid minku chaal silaahah hana l‑harib wa hasabtu be suhuula bas tichiilu balad al‑jibaal.
42 Wa laakin Allah gaal leyi :
« Guul leehum :
‹ Ma tamchu wa la tihaarubu achaan ana ma gaaʼid fi usutku !
Wa be da,
udwaanku yinnasru foogku.
› »
43 Wa ana kallamt leeku wa laakin intu ma simiʼtuuni wa isiitu amur Allah wa gammeetu be istikbaar macheetu ale balad al‑jibaal.*
44 Wa khalaas,
al‑Amuuriyiin al‑saakniin fi l‑balad di marago foogku misil nahale wa taradooku wa katalooku fi balad Saʼiir lahaddi hillit Hurma.
45 Wa battaan gabbaltu jiitu bakeetu le Allah wa laakin hu ma simiʼ hissuku wa la dawwar yasmaʼku.
46 Wa fi chaan da bas,
gaʼadtu fi Khaadich wa tawwaltu fiiha ziyaada.