Sawwo al‑khulgaan al‑khaassiin
39
1 Basaliil wa l‑sinaaʼiyiin al‑aakhariin sawwo khulgaan le rujaal al‑diin le yakhdumu fi kheemat al‑ibaada min gumaach hana kattaan loonah zahri wa garadi wa ahmar.
Wa battaan sawwo khulgaan khaassiin le Haaruun misil Allah amar beyah Muusa.
Sawwo al‑farmala
2 Wa be misil da,
humman sawwo al‑farmala be gumaach hana kattaan mukhayyat adiil al‑loonah zahri wa garadi wa ahmar wa mujammala be dahab.
3 Daggo al‑dahab rigeeyig misil al‑kheet wa khayyatooh fi l‑gumaach hana kattaan al‑loonah zahri wa garadi wa ahmar be khiyaatit khayyaati maʼruuf.
4 Wa sawwo le l‑farmala hubaal al‑yisabbutuuha beehum fi l‑kataafe.
5 Wa l‑hizaam al‑yarbutuuh kula bigi min nafs al‑sunʼa min dahab wa gumaach hana kattaan mukhayyat adiil al‑loonah zahri wa garadi wa ahmar misil Allah amar beyah Muusa.
6 Wa chaalo hujaar itneen min agiig wa nagacho fooghum asaame awlaad Yaakhuub al‑atnaachar wa sabbatoohum fi halagateen min dahab fi l‑farmala.
7 Wa baʼad da,
khattoohum fi kataafe al‑farmala zikra le Bani Israaʼiil misil Allah amar beyah Muusa.
Sawwo sideeriiyit al‑kharaar
8 Wa humman sawwo sideeriiyit al‑kharaar misil sawwo al‑farmala.
Hi kula min gumaach hana kattaan mukhayyat adiil al‑loonah zahri wa garadi wa ahmar wa mujammala be dahab.
Wa da be khiyaatit khayyaati maʼruuf.
9 Wa sawwo al‑sideeriiye murabbaʼa tuulha chibir wa urdaha kula chibir.
Wa matbuuga marrateen misil jeeb.
10 Wa jammalooha be arbaʼa roog min al‑hujaar al‑khaaliyiin.
Al‑roog al‑awwal indah agiig ahmar wa yaakhuut asfar wa zumurrud akhdar.
11 Wa l‑roog al‑taani indah marajaan ahmar wa yaakhuut akhdar wa maass.
12 Wa l‑roog al‑taalit indah fayruuz wa yaakhuut ahmar wa zaytuun.
13 Wa l‑roog al‑raabiʼ indah zabarjad wa agiig wa kharaz.
Wa kulla l‑hujaar dool murassasiin fi l‑riigaan hana l‑dahab fi l‑sideeriiye.
14 Wa l‑hujaar al‑khaaliyiin dool fi adad gabaayil Bani Israaʼiil al‑atnaachar.
Ayyi usum gabiila manguuch fi hajar waahid misil nagich al‑khawaatim.
15 Wa sawwo le l‑sideeriiye silsilateen min dahab saafi maftuuliin misil al‑habil.
16 Wa sawwo battaan halagateen wa khawaatim itneen min dahab wa sabbatoohum fi koonyaat al‑sideeriiye be foog.
17 Wa dakhkhalo fi l‑khawaatim dool al‑silsilateen hana l‑dahab.
18 Wa khachum al‑aakhar hana l‑silsilateen dakhkhalooh fi l‑halagateen al‑gaaʼidiin fi kataafe al‑farmala be giddaam.
19 Wa battaan sawwo khawaatim itneen min dahab fi koonyaat al‑sideeriiye be tihit.
Wa khattoohum be daakhal ambeen al‑sideeriiye wa l‑farmala.
20 Wa battaan sawwo khawaatim itneen min dahab wa khattoohum fi kataafe al‑farmala be tihit min giddaam gariib le hizaam al‑farmala.
21 Wa humman rabato al‑khawaatim al‑itneen hana l‑sideeriiye be l‑khawaatim al‑itneen hana l‑farmala be habil zahri.
Wa be da,
al‑sideeriiye bigat foog min al‑hizaam wa gaaʼide saabte foog al‑farmala ma tilharrak.
Wa da misil Allah amar beyah Muusa.
Sawwo al‑jallaabiiye
22 Wa humman khayyato jallaabiiye le l‑farmala kullaha min gumaach zahri wa da be khiyaatit khayyaati maʼruuf.
23 Wa l‑jallaabiiye indaha gabbe makfuufa wa mudarrasa achaan al‑gabbe ma tincharit.
24 Wa khayyato fi daayir al‑jallaabiiye rummaanaat min gumaach zahri wa garadi wa ahmar wa kulla min kattaan mukhayyat.
25 Wa sawwo jursaan min dahab saafi wa khattoohum ambeen al‑rummaanaat fi kulla daayir al‑jallaabiiye.
26 Wa be da,
bigi rummaana wa jaras,
rummaana wa jaras fi kulla daayir al‑jallaabiiye al‑yalbasooha wakit yakhdumu giddaam Allah misil Allah amar beyah Muusa.
Sawwo lubaas aakhar le rujaal al‑diin
27 Wa sawwo le Haaruun wa iyaalah khulgaan min kattaan be khiyaatit khayyaati maʼruuf.
28 Wa battaan sawwo kadaamiil wa taaj wa saraawiil kula hana gumaach kattaan mukhayyat adiil.
29 Wa l‑hizaam kula min gumaach hana kattaan mukhayyat adiil al‑loonah zahri wa garadi wa ahmar.
Wa da be khiyaatit khayyaati maʼruuf misil Allah amar beyah Muusa.
30 Wa sawwo hafiide mukhassasa min dahab saafi wa nagacho foogha al‑kalaam al‑buguul Khaass le Allah.
31 Wa rabatooha be habil zahri fi raas al‑kadmuul misil Allah amar beyah Muusa.
Al‑sinaaʼiyiin kammalo khidmithum
32 Wa khalaas al‑sinaaʼiyiin kammalo al‑amal hana buna kheemat al‑ibaada wa hi kheemat al‑ijtimaaʼ.
Wa Bani Israaʼiil sawwo kulla cheyy tamaam misil Allah amar beyah Muusa.
33 Wa humman jaabo giddaam Muusa
al‑kheema wa kulla muʼiddaatha
wa fangarha wa khachabha wa maraadiisha wa amadha wa asaasha
34 wa l‑khita al‑hu min firaaw al‑kubaach al‑madbuukhiin wa mulawwaniin be loon ahmar
wa l‑khita al‑hu min firaaw ijil al‑bahar
wa l‑sitaar al‑yidaarig al‑sanduug
35 wa l‑sanduug al‑foogah liihaan al‑muʼaahada wa iidaanah wa sidaadtah
36 wa l‑tarabeeza wa kulla muʼiddaatha
wa l‑khubza al‑yigaddumuuha le Allah
37 wa l‑faanuus min dahab saafi
wa l‑tiyeesaat le l‑naar al‑murassasiin foogah wa kulla muʼiddaatah
wa dihnah
38 wa mukhbar al‑bakhuur hana l‑dahab
wa dihin al‑masahaan
wa l‑bakhuur al‑muʼattar
wa l‑sitaar le baab al‑kheema
39 wa l‑madbah wa tachaachtah al‑humman min nahaas
wa iidaanah wa kulla muʼiddaatah
wa l‑hoot le l‑wadu wa gaʼarah
40 wa l‑sataayir al‑muhawwigiin beehum al‑fadaay
wa amadhum wa asaashum
wa sitaar hana baab al‑fadaay
wa hubaalha wa wutaadha
wa kulla muʼiddaat al‑yistaʼmaloohum fi khidmit kheemat al‑ibaada wa hi kheemat al‑ijtimaaʼ
41 wa l‑khulgaan le l‑khidme fi l‑bakaan al‑mukhaddas
wa dool khulgaan al‑khaassiin le Haaruun raajil al‑diin
wa khulgaan le awlaadah wakit yakhdumu misil rujaal al‑diin.