Madbah le l‑dahaaya
38
1 Wa Basaliil wa l‑sinaaʼiyiin al‑aakhariin sawwo al‑madbah hana l‑dahaaya al‑muharragiin.
Wa l‑madbah da murabbaʼ min khachab al‑sunt.
Tuulah 5 duraaʼ wa urdah kula 5 duraaʼ wa tuulah foog 3 duraaʼ.
2 Wa sawwo arbaʼa guruun fi koonyaatah al‑arbaʼa.
Wa l‑madbah wa l‑guruun sunʼa waahide bas.
Wa masahooh be nahaas.
3 Wa sanaʼo kulla muʼiddaatah min nahaas.
Humman al‑mawaaʼiin al‑yarfaʼo beehum al‑rumaad al‑mudahhan wa l‑feelaat wa l‑kiisaan al‑yuruchchu beehum al‑damm wa l‑hadiidaay al‑yisillu beeha al‑laham wa khammaamaat al‑naar.
4 Wa humman sanaʼo le l‑madbah tachaacha min nahaas.
Wa khatto al‑tachaacha di fi lubb al‑madbah wa be da,
bigat fi gismit al‑madbah.
5 Wa sanaʼo arbaʼa khawaatim fi l‑chawaarib al‑arbaʼa hana l‑tachaacha le yidissu fooghum al‑iidaan.
6 Wa sawwo le l‑madbah iidaan itneen min hatab al‑sunt wa masahoohum be nahaas.
7 Wa l‑iidaan dool dassoohum fi l‑khawaatim al‑gaaʼidiin fi jawaanib al‑madbah le yichiiluuh beehum.
Wa l‑madbah mujawwaf yaʼni indah lubb.
Wa l‑madbah da sanaʼooh be khachab.
Sawwo hoot le l‑wadu
8 Wa sanaʼo hoot le l‑wadu min nahaas wa gaʼarah min nahaas.
Wa l‑nahaas da hana amchawwaafaat al‑jaabanhum al‑awiin al‑gaaʼidaat yakhdiman fi madkhal kheemat al‑ijtimaaʼ.
Sawwo fadaay le kheemat al‑ibaada
9 Wa sawwo fadaay le l‑kheema.
Wa be l‑nuss al‑junuubi,
tuulha 100 duraaʼ wa indaha sataayir min gumaach hana kattaan mukhayyat adiil.
10 Wa indaha 20 amuud wa 20 asaas min nahaas.
Wa l‑manaakhir wa l‑rubaat al‑gaaʼidiin fi l‑amad dool min fudda.
11 Wa l‑nuss al‑munchaakhi kula tuulah 100 duraaʼ wa indah sataayir wa 20 amuud wa 20 asaas min nahaas.
Wa l‑manaakhir wa l‑rubaat al‑gaaʼidiin fi l‑amad dool min fudda.
12 Laakin al‑nuss al‑kharbaani min al‑fadaay tuulah 50 duraaʼ wa indah sataayir wa 10 amuud wa 10 asaas.
Wa l‑manaakhir wa l‑rubaat al‑gaaʼidiin fi l‑amad min fudda.
13 Wa l‑nuss al‑sabhaani ale l‑bakaan al‑harraay tatlaʼ,
hu kula tuulah 50 duraaʼ.
14 Wa fi l‑nuss al‑zeenaay hana l‑baab fiyah sataayir tuulhum 15 duraaʼ wa indah 3 amuud wa 3 asaas.
15 Wa fi l‑nuss al‑israay hana l‑baab al‑fadaay,
fiyah sataayir tuulhum 15 duraaʼ wa indah 3 amuud wa 3 asaas.
16 Wa kulla l‑sataayir al‑muhawwigiin al‑fadaay humman min kattaan mukhayyat adiil.
17 Wa asaas al‑amad min nahaas.
Wa manaakhir al‑amad wa l‑rubaat kula min fudda.
Wa ruuse al‑amad mamsuuhiin be fudda.
Kulla l‑amad al‑muhawwigiin al‑fadaay induhum rubaat min fudda.
18 Al‑baab al‑yadkhulu beyah al‑fadaay indah sitaar min gumaach hana kattaan mukhayyat adiil al‑loonah zahri wa garadi wa ahmar.
Wa da be khiyaatit khayyaati maʼruuf.
Wa l‑sitaar da tuulah 20 duraaʼ wa tuulah foog 5 duraaʼ yaʼni nafs al‑magaas maʼa sataayir al‑fadaay.
19 Wa baab al‑fadaay indah arbaʼa amad wa arbaʼa asaas min nahaas.
Wa l‑manaakhir wa l‑isay min fudda.
Wa ruuse al‑amad masahoohum be fudda.
20 Wa kulla l‑wutaad hana l‑kheema wa l‑fadaay min nahaas.
Wazin khumaam al‑kheema
21 Wa daahu wazin al‑khumaam al‑bano beyah kheemat al‑ibaada wa hi al‑kheema al‑baʼadeen yukhuttu foogha liihaan al‑muʼaahada.
Wa Muusa amar al‑Laawiyiin yisajjulu al‑muʼiddaat dool tihit masʼuuliiyit Itamaar wileed Haaruun raajil al‑diin.
22 Wa Basaliil wileed Uuri wileed Huur min gabiilat Yahuuza khadam kulla cheyy al‑Allah amar beyah Muusa.
23 Wa musaaʼidah Uhuliyaab wileed Akhisamaak min gabiilat Daan.
Wa hu kula khayyaati maʼruuf fi khiyaatit gumaach al‑kattaan al‑loonah zahri wa garadi wa ahmar.
24 Wa l‑dahab al‑jaabooh Bani Israaʼiil hadiiye marfuuʼa le yistaʼmalooh fi buna kheemat al‑ibaada,
waznah yisaawi 1 000 kiilo.
Wa da hasab al‑wazin al‑rasmi hana l‑bakaan al‑mukhaddas.
25 Wa wakit wazano al‑fudda al‑jaabooha naas al‑mujtamaʼ hadiiye,
wazinha tamma ziyaada min 3 400 kiilo.
Wa da hasab al‑wazin al‑rasmi hana l‑bakaan al‑mukhaddas.
26 Achaan kulla insaan min 20 sana wa foog al‑hasabooh anta nuss hajar fudda hasab al‑wazin al‑rasmi hana l‑bakaan al‑mukhaddas.
Wa jumlit al‑naas al‑hasaboohum kulluhum ke 603 550 raajil.
27 Wa wazin al‑fudda al‑astaʼmalooha fi l‑miya asaas hana l‑kheema wa l‑sataayir da 3 400 kiilo yaʼni 34 kiilo fi ayyi asaas.
28 Wa l‑faddal min al‑fudda hawaale 20 kiilo.
Wa humman sanaʼo beyah manaakhir al‑amad wa isayhum wa masaho beyah ruuse al‑amad.
29 Wa l‑nahaas al‑jaabooh hadiiye marfuuʼa,
waznah yisaawi 2 400 kiilo.
30 Wa da,
astaʼmalooh le yasnaʼo asaas madkhal kheemat al‑ijtimaaʼ wa madbah al‑nahaas wa tachaachtah wa kulla muʼiddaatah
31 wa asaas al‑fadaay al‑muhawwige al‑kheema wa asaas baab al‑fadaay wa kulla wutaad al‑kheema wa wutaad al‑fadaay.