Al‑madbah le l‑dahiiye al‑muharraga
27
1 « ‹ Wa sawwi madbah murabbaʼ min khachab al‑sunt.
Tuulah 5 duraaʼ wa urdah 5 duraaʼ wa tuulah foog kula 3 duraaʼ.
2 Wa sawwi arbaʼa guruun fi koonyaatah al‑arbaʼa.
Wa l‑madbah wa l‑guruun yukuunu sunʼa waahide bas.
Wa amsahah be nahaas.
3 Wa asnaʼ kulla muʼiddaatah min nahaas.
Humman al‑mawaaʼiin al‑yarfaʼo beehum al‑rumaad al‑mudahhan wa l‑feelaat wa l‑kiisaan al‑yuruchchu beehum al‑damm wa l‑hadiidaay al‑yisillu beeha al‑laham wa khammaamaat al‑naar.
4 « ‹ Wa asnaʼ le l‑madbah tachaacha min nahaas indaha arbaʼa khawaatim kula min nahaas fi chawaaribha al‑arbaʼa.
5 Wa khutt al‑tachaacha di fi lubb al‑madbah wa be da,
tukuun fi gismit al‑madbah.
6 Wa sawwi le l‑madbah iidaan itneen min hatab al‑sunt wa amsahhum be nahaas.
7 Wa l‑iidaan dool dissuhum fi l‑khawaatim al‑gaaʼidiin fi jawaanib al‑madbah le yichiiluuh beehum.
8 Wa l‑madbah yukuun mujawwaf yaʼni indah lubb.
Wa asnaʼah be khachab misil ana wassaftah leek fi l‑jabal da.
Al‑fadaay
9 « ‹ Wa sawwi fadaay le l‑kheema.
Wa be l‑nuss al‑junuubi,
tuulha yukuun 100 duraaʼ wa indaha sataayir min gumaach hana kattaan mukhayyat adiil.
10 Wa indaha 20 amuud wa 20 asaas min nahaas.
Wa l‑manaakhir wa l‑rubaat al‑gaaʼidiin fi l‑amad dool min fudda.
11 Wa l‑nuss al‑munchaakhi kula tuulah 100 duraaʼ wa indah sataayir wa 20 amuud wa 20 asaas min nahaas.
Wa l‑manaakhir wa l‑rubaat al‑gaaʼidiin fi l‑amad dool min fudda.
12 Laakin al‑nuss al‑kharbaani min al‑fadaay tuulah 50 duraaʼ wa indah sataayir wa 10 amuud wa 10 asaas.
13 Wa l‑nuss al‑sabhaani ale l‑bakaan al‑harraay tatlaʼ,
hu kula tuulah 50 duraaʼ.
14 « ‹ Wa fi l‑nuss al‑zeenaay hana l‑baab,
fiyah sataayir tuulhum 15 duraaʼ wa indah 3 amuud wa 3 asaas.
15 Wa fi l‑nuss al‑israay hana l‑baab,
fiyah sataayir tuulhum 15 duraaʼ wa indah 3 amuud wa 3 asaas.
16 Wa be da,
al‑baab al‑yadkhulu beyah al‑fadaay indah sitaar tuulah 20 duraaʼ min gumaach hana kattaan mukhayyat adiil al‑loonah zahri wa garadi wa ahmar.
Wa da be khiyaatit khayyaati maʼruuf.
Wa indah 4 amuud wa 4 asaas.
17 Kulla l‑amad al‑muhawwigiin al‑fadaay yukuunu fooghum rubaat wa manaakhir min fudda.
Wa induhum asaas min nahaas.
18 Wa tuul al‑fadaay yabga 100 duraaʼ wa urdaha 50 duraaʼ wa tuulha foog 5 duraaʼ.
Wa sataayirha min gumaach hana kattaan mukhayyat adiil wa asaasha min nahaas.
19 Wa kulla l‑muʼiddaat al‑yistaʼmaloohum fi l‑kheema wa kulla l‑wutaad hana l‑kheema wa l‑wutaad hana l‑fadaay yabgo min nahaas.
Dihin le l‑faanuus
20 « ‹ Wa aamur Bani Israaʼiil yijiibu leek dihin hana zaytuun maʼsuur wa musaffa le l‑faanuus achaan deyyah yukuun muwalliʼ daayman.
21 Haaruun wa iyaalah yahfadooh muwalliʼ giddaam Allah fi kheemat al‑ijtimaaʼ giddaam al‑sitaar al‑yidaarig al‑sanduug al‑foogah liihaan al‑muʼaahada.
Wa deyy al‑faanuus yukuun muwalliʼ min makhrib lahaddi fajur.
Wa da yabga chart daayim le Bani Israaʼiil min zurriiye le zurriiye.