Kheemat al‑ibaada
26
1 « ‹ Wa sawwi al‑kheema be achara gitʼe min gumaach hana kattaan mukhayyat adiil al‑loonah zahri wa garadi wa ahmar.
Wa khayyit fi l‑gitaʼ dool suwar makhluugiin samaawiyiin be khiyaatit khayyaati maʼruuf.
2 Wa tuul al‑gitaʼ dool yukuun sawa sawa.
Ayyi waahide tukuun indaha 28 duraaʼ wa urdaha 4 duraaʼ.
3 Wa l‑gitaʼ dool,
khamsa yilimmuuhum sawa fi majmuuʼa waahide wa l‑khamsa al‑aakhariin kula yilimmuuhum sawa.
4 Wa kachkich taraf al‑khamsa be gumaach zahri wa taraf al‑khamsa al‑aakhariin kula kachkichah be nafs al‑gumaach.
5 Sawwi 50 manaakhir fi l‑majmuuʼa al‑awwal wa 50 manaakhir fi l‑majmuuʼa al‑taaniye.
Wa l‑manaakhir dool yukuunu mulgaabiliin.
6 Wa sawwi 50 fangar hana dahab wa achbik beyah al‑manaakhir kulli waahide maʼa l‑aakhara.
Wa be da,
al‑majmuuʼteen yabgo kheema waahide.
7 « ‹ Wa sawwi al‑khita al‑awwal min 11 gitʼe matruuriin be suuf inze.
Wa khuttah be foog le l‑kheema.
8 Wa tuul al‑gitaʼ dool yukuunu sawa sawa.
Wa tuul al‑waahide 30 duraaʼ wa urdaha 4 duraaʼ.
9 Wa l‑gitaʼ dool,
khamsa yilimmuuhum sawa wa l‑sitte al‑aakhariin kula yilimmuuhum sawa.
Wa l‑gitʼe al‑saadse di tatbugha foog khachum al‑kheema.
10 Wa sawwi 50 manaakhir fi nuss kulli waahide min al‑majmuuʼteen.
11 Wa sawwi 50 fangar min nahaas wa achbik beyah al‑manaakhir kulli waahide maʼa l‑aakhara.
Wa be da,
al‑majmuuʼteen yabgo khita waahid.
12 Wa l‑khita da,
nussah al‑faayit fi l‑tuul,
dalliih be wara le l‑kheema.
13 Wa nussah al‑faayit fi l‑urd,
dalliih fi nuss al‑kheema be duraaʼ.
Wa be l‑nuss al‑aakhar hana l‑kheema kula,
dalliih be duraaʼ.
Wa be da,
al‑khita yikhatti al‑kheema marra waahid.
14 « ‹ Wa sawwi al‑khita al‑taani be firaaw kubaach madbuukhiin wa mulawwaniin be loon ahmar.
Wa l‑khita al‑taalit da,
sawwiih be firaaw ijil al‑bahar.
Rassiin khachab kheemat al‑ibaada
15 « ‹ Khuzz khachab al‑sunt wa russah le tabni beyah kheemat al‑ibaada.
16 Ayyi waahid min al‑khachab da tuulah yukuun 10 duraaʼ wa urdah yukuun duraaʼ wa nuss.
17 Le ayyi khachaba sawwi rijle itneen al‑yagdaro yisabbutuuha maʼa l‑aakhariin.
Kulla l‑khachab da sawwiih misil da.
18 Wa addil 20 khachab fi l‑nuss al‑junuubi hana l‑kheema.
19 Wa sawwi 40 asaas hana fudda min tihit le l‑ichriin khachab.
Le kulli khachaba waahide,
sawwi asaas itneen tihit rijileenha al‑itneen.
20 Wa 20 khachab yukuunu fi l‑nuss al‑munchaakhi hana l‑kheema.
21 Wa dool kula,
sawwi leehum 40 asaas hana fudda min tihit.
Le kulli khachaba waahide sawwi asaas itneen tihit rijileenha al‑itneen.
22 Wa 6 khachab yukuunu fi l‑nuss al‑warraani hana l‑kheema al‑mugaabil al‑kharib.
23 Wa sawwi khachab itneen le l‑koonyaat al‑wara.
24 Wa l‑khachab al‑itneen dool mulassagiin min tihit lahaddi foog.
Wa be foog,
yisabbutuuhum be khaatim.
Wa da yabga fi l‑koonyaat al‑itneen al‑gaaʼidiin be wara.
25 Wa be da,
yukuun 8 khachab wa induhum 16 asaas hana fudda.
Wa tihit kulli khachaba,
fi asaas itneen.
26 « ‹ Wa sawwi 5 maraadiis min khachab al‑sunt le l‑nuss al‑junuubi.
27 Wa sawwi 5 aakhariin le l‑nuss al‑munchaakhi hana l‑kheema.
Wa battaan sawwi 5 le nussaha al‑warraani al‑mugaabil al‑kharib.
28 Wa l‑murdaas al‑ustaani al‑tawiil al‑gaaʼid fi gismit al‑khachab yamchi min tarafha le tarafha.
29 Wa amsah kulla l‑khachab da be dahab wa asnaʼ khawaatim hana dahab al‑tidiss fooghum al‑maraadiis.
Wa amsah al‑maraadiis kula be dahab.
30 « ‹ Wa sawwi al‑kheema di hasab al‑nizaam al‑ana wassaftah leek fi l‑jabal da.
Al‑sitaar al‑daakhal wa sitaar al‑baab
31 « ‹ Wa sawwi sitaar min gumaach hana kattaan mukhayyat adiil al‑loonah zahri wa garadi wa ahmar.
Wa khayyit foogah suwar makhluugiin samaawiyiin be khiyaatit khayyaati maʼruuf.
32 Wa tiʼalligah fi manaakhir hana dahab al‑gaaʼidiin fi arbaʼa amuud min hatab al‑sunt al‑mamsuuhiin be dahab.
Wa l‑amad dool musabbatiin fi arbaʼa asaas hana fudda.
33 Wa allig al‑sitaar da be fangar wa khutt al‑sanduug al‑foogah liihaan al‑muʼaahada khaadi le l‑sitaar.
Wa be da,
al‑sitaar yafsul been al‑bakaan al‑mukhaddas wa l‑bakaan al‑mukhaddas marra waahid.
34 « ‹ Wa sidd al‑sanduug da be sidaadtah wa khuttah fi l‑bakaan al‑mukhaddas marra waahid.
35 Wa barra min al‑sitaar fi l‑bakaan al‑mukhaddas,
khutt al‑tarabeeza fi l‑nuss al‑munchaakhi hana l‑kheema wa khutt al‑faanuus mugaabilha fi l‑nuss al‑junuubi.
36 « ‹ Wa sawwi sitaar le baab al‑kheema min gumaach hana kattaan mukhayyat adiil al‑loonah zahri wa garadi wa ahmar.
Wa da be khiyaatit khayyaati maʼruuf.
37 Wa le l‑sitaar sawwi leyah khamsa amuud hana hatab al‑sunt al‑mamsuuhiin be dahab.
Wa sawwi leehum manaakhir hana dahab wa le l‑amad dool sawwi leehum khamsa asaas min nahaas.