Gawaaniin al‑chariiʼa
23
1 « Ma tangul al‑guwaale been al‑naas.
Ma tachhad be kidib achaan tansur al‑khaati.
2 Ma tiʼaawin al‑katiiriin kan humman yidooru yisawwu cheyy fasil.
Wa fi l‑chariiʼa,
ma titallif chahaadtak le tistafig maʼa l‑katiiriin.
3 Wa ma tiʼaawin al‑miskiin kula fi l‑chariiʼa achaan hu miskiin bas.
4 « Wa kan ligiit toor hana aduuk aw humaarah muwaddir,
waddiih leyah.
5 Wa kan chift humaar hana naadum al‑yakrahak waagiʼ tihit himlah,
ma tikhalliih wa tamchi.
Wa laakin arfaʼah maʼaayah.
6 « Ma tazlum al‑miskiin wa tidangis al‑chariiʼa.
7 Ma tatham insaan be kidib.
Wa ma tahkim be l‑moot le l‑insaan al‑bari aw al‑saalih.
Al‑naadum al‑fasil al‑sawwa misil da,
ana Allah ma najʼalah saalih.
8 Ma takhbal rachwa achaan hi taʼami uyuun al‑masaaʼiil wa tiʼawwij kalaam al‑saalihiin.
9 « Ma tazlum al‑khariib.
Intu taʼarfu iichit al‑khariib achaan intu kula awwal ichtu khariibiin fi Masir.
Al‑sana al‑saabʼe wa l‑yoom al‑saabiʼ
10 « Fi sitte sana,
ahrit zerʼak wa agtaʼ intaajah.
11 Wa fi l‑sana al‑saabʼe,
khalli yubuur wa yugumm bandar.
Wa min al‑bandar da,
yaakulu masaakiin chaʼabak.
Wa l‑faddal kamaan,
yaakuluuh haywaanaat al‑kadaade.
Wa tisawwi nafs al‑cheyy fi zerʼak hana l‑inab wa l‑zaytuun.
12 « Akhdim muddit sitte yoom.
Wa fi l‑yoom al‑saabiʼ kamaan,
anjamma achaan toorak wa humaarak kula yinjammo wa l‑khariib al‑gaaʼid maʼaak wa abdak kula yinjammo.
13 « Sawwu kulla cheyy al‑gultah leeku.
Wa ma tihajju be usum ilaah aakhar wa la yinsamiʼ fi khuchuumku.
Talaata iid fi l‑sana
14 « Ayyudu leyi talaata marraat fi l‑sana.
15 Ayyudu iid al‑Khubza bala Tawwaara.
Fi sabʼa yoom,
taakulu khubza bala tawwaara misil ana amartuku.
Wa da fi wakit al‑muhaddad fi chahar al‑Ganaadiil al‑chahar al‑intu maragtu beyah min balad Masir.
Ma taju giddaami iideeku yaabsiin.
16 « Wa baʼad da,
ayyudu iid al‑Gatiʼ wa gaddumu leyi awwal intaaj al‑gataʼtuuh min ziraaʼitku al‑teerabtuuhum.
Wa baʼad da,
ayyudu iid al‑Lammiin fi kumaalit al‑sana wakit intu tilimmu foogah intaaj ziraaʼitku.
17 Wa talaata marraat fi l‑sana,
ayyi dakar minku yaji giddaami ana Allah al‑Rabb le yaʼabudni.
18 « Ma tigaddumu leyi damm al‑dahiiye maʼa ayyi cheyy al‑indah tawwaara.
Wa ma tikhallu chaham dahiiyat al‑iid yargud lahaddi fajur.
19 Wa gaddumu awwal intaaj ziraaʼitku le beet Allah Ilaahku.
« Wa ma tirakkubu laham al‑sakhal fi laban ammah.
Allah anta waʼad le chaʼabah
20 « Chiifu,
ana nirassil malak yamchi giddaamku fi l‑derib wa yahfadku.
Wa yiwaddiiku fi l‑bakaan al‑ana jahhaztah leeku.
21 Fakkuru foogah wa taabuʼu kalaamah wa ma taʼasooh achaan hu ma yisaamih isyaanku achaan hu yimassilni.
22 Wa laakin kan titiiʼuuh wa tisawwu kulla cheyy hasab kalaami,
ana nabga adu le udwaanku wa nidaayig al‑yidaayuguuku.
23 Wa malaki yamchi giddaamku wa yiwaddiiku fi balad al‑Amuuriyiin wa l‑Hittiyiin wa l‑Firizziyiin wa l‑Kanʼaaniyiin wa l‑Hiwwiyiin wa l‑Yabuusiyiin wa nidammirhum.
24 Ma tasjudu le ilaahaathum wa la taʼabuduuhum wa la tisawwu al‑cheyy al‑humman gaaʼidiin yisawwuuh.
Laakin armu wa dammuru al‑hujaar al‑khazzoohum le l‑ibaada.
25 Aʼabuduuni ana Allah Ilaahku wa nibaarik akilku wa charaabku wa namrug al‑marad min usutku.
26 Wa fi baladku,
ma fi ayyi mara al‑tabga aagre wa la tarmi sakhiirha.
Wa nantiiku umur tawiil.
27 « Wa nirassil al‑khoof le kulli umma al‑tagiif giddaamku achaan tibarjil wa tajri minku.
28 Wa nirassil al‑nahale giddaamku le tatrudhum le l‑Hiwwiyiin wa l‑Kanʼaaniyiin wa l‑Hittiyiin.
29 Laakin ana ma natrudhum marra waahid fi sana waahide achaan al‑balad ma tabga kharaab wa haywaanaat al‑kadaade yabgo katiiriin wa yugummu didduku.
30 Ana natrudhum chiyya chiyya lahaddi intu tabgo katiiriin wa tawrusu al‑balad.
31 Wa nisawwi huduudku min al‑bahar al‑Ahmar lahaddi l‑bahar al‑Abyad wa min al‑sahara lahaddi bahar al‑Furaat.
Nidiss fi iideeku sukkaan al‑balad wa taturduuhum giddaamku.
32 Ma tisawwu alaakha maʼaahum wa la maʼa ilaahaathum.
33 Ma tikhalluuhum yaskunu fi baladku maʼaaku achaan yilizzuuku tisawwu zanib giddaami.
Achaan kan intu abadtu ilaahaathum,
da yabga leeku charak. »