Yasruun zaar Muusa
18
1 Yasruun raajil al‑diin hana balad Midyaan wa hu nasiib Muusa.
Wa simiʼ be kulla cheyy al‑Rabb sawwaah le Muusa wa le chaʼabah Bani Israaʼiil wa kikkeef Allah maragaahum min balad Masir.
2 Awwal Muusa wadda martah Siffuura le nasiibah Yasruun wa hu khibilaaha.
3 Wa wadda maʼaaha iyaalha al‑itneen.
Al‑bikir Muusa sammaah Girchuum (maʼanaatah ajnabi) achaan Muusa ajnabi fi l‑balad.
4 Wa l‑aakhar sammaah Aliʼaazar (maʼanaatah Allah yafzaʼ) achaan Allah Rabb abuuh fazaʼah wa najjaah min seef Firʼoon malik Masir.
5 Wa Yasruun nasiib Muusa chaal al‑iyaal wa ammuhum wa maachi yiwaddiihum le Muusa fi l‑sahara gariib le jabal Allah al‑bakaan al‑Muusa nazal foogah.
6 Wa Yasruun rassal khabar le nasiibah Muusa wa gaal :
« Daahuuni ana jaayi leek wa jaayib maʼaayi martak Siffuura wa iyaalha. »
7 Wakit Yasruun wassal,
Muusa marag laagaah wa barak giddaamah wa habbaah.
Wa assaaʼalo khabar aafiyithum wa baʼad da,
dakhalo al‑kheema.
8 Wa Muusa hajja le nasiibah be kulla cheyy al‑Allah sawwa didd Firʼoon malik Masir wa l‑Masriyiin fi chaan Bani Israaʼiil.
Wa hajja leyah be kulla l‑taʼab al‑ligooh fi l‑derib wa kikkeef Allah najjaahum.
9 Wa Yasruun firih be kulla l‑kheer al‑Allah sawwaah le Bani Israaʼiil wakit najjaahum min al‑Masriyiin.
10 Wa hu gaal :
« Baarak Allah al‑najjaaku min ubuudiiyit Firʼoon wa l‑Masriyiin.
11 Wa hassaʼ ana irift kadar Allah akbar min kulla l‑ilaahaat achaan hu wassaf gudurtah le l‑naas al‑zalamo Bani Israaʼiil. »
12 Khalaas,
Yasruun nasiib Muusa gaddam dahiiye muharraga wa dahaaya aakhariin le l‑Rabb.
Wa Haaruun wa kulla chuyuukh Bani Israaʼiil jo le yaakulu maʼa nasiib Muusa giddaam al‑Rabb.
Wasiiyat Yasruun le Muusa
13 Wa fi l‑yoom al‑taani,
Muusa gaaʼid yichaariʼ al‑chaʼab wa humman waagfiin giddaamah min al‑fajur lahaddi l‑achiiye.
14 Wakit nasiibah Yasruun chaaf kulla cheyy al‑Muusa gaaʼid yisawwiih le l‑chaʼab,
gaal leyah :
« Chunu al‑gaaʼid tisawwiih le l‑chaʼab da ?
Maala inta wiheedak bas tagood tichaariʼhum ?
Wa maala humman kulluhum waagfiin giddaamak min al‑fajur lahaddi l‑achiiye ? »
15 Wa Muusa radda le nasiibah wa gaal :
« Achaan al‑chaʼab yaju leyi le nasʼal leehum al‑Rabb.
16 Wa kan induhum muchkila kula,
humman yaju leyi le nisawwi leehum chariiʼa been al‑waahid wa l‑aakhar.
Wa niʼarrifhum be gawaaniin al‑Rabb wa wasiiyaatah. »
17 Wa nasiib Muusa gaal leyah :
« Al‑cheyy al‑inta gaaʼid tisawwiih da ma adiil !
18 Inta gaaʼid titaʼʼib nafsak wa titaʼʼib al‑chaʼab kula maʼaak achaan al‑cheyy da faat gudurtak.
Wa inta wiheedak ma tagdar tisawwiih.
19 Wa hassaʼ da,
asmaʼ kalaami wa wasiiyti wa khalli al‑Rabb yukuun maʼaak !
Gaddim suʼaal al‑chaʼab le l‑Rabb achaan inta mumassil al‑chaʼab giddaam Allah.
20 Wa allimhum al‑gawaaniin wa l‑wasaaya wa arrifhum al‑derib al‑waajib yichiiluuh wa l‑cheyy al‑waajib yisawwuuh.
21 Wa baʼad da,
aʼazil min kulla l‑chaʼab rujaal gaadriin wa khaayfiin min al‑Rabb wa amiiniin wa ma yakhbalo al‑rachwa.
Wa khuttuhum masʼuuliin fi l‑chaʼab.
Waahidiin minhum yisawwu chariiʼa le alif naadum wa le miya wa le khamsiin wa la achara.
22 Wa khalliihum yichaaruʼu al‑chaʼab fi kulla wakit.
Humman yichaaruʼuuhum fi machaakilhum al‑dugaag wa laakin machaakilhum al‑kubaar kamaan yiwadduuhum leek inta.
Wa da yikhaffif leek inta achaan humman kula yichiilu al‑tagala maʼaak.
23 Wa kan tisawwi al‑cheyy al‑amarak beyah al‑Rabb,
misil da tagdar tilhammal masʼuuliiytak.
Wa kulla l‑chaʼab yigabbulu buyuuthum be l‑salaam. »
24 Wa Muusa simiʼ kalaam nasiibah wa sawwa kulla cheyy al‑hu gaalah leyah.
25 Wa azal rujaal gaadriin min kulla Bani Israaʼiil wa khattaahum masʼuuliin fi l‑chaʼab.
Wa waahidiin minhum yisawwu chariiʼa le alif naadum wa le miya wa le khamsiin wa la achara.
26 Wa gaaʼidiin yichaaruʼu al‑chaʼab fi kulla wakit.
Machaakilhum al‑kubaar yigaddumuuhum le Muusa wa l‑dugaag kamaan,
humman bas yihilluuhum.
27 Wa khalaas,
Muusa adda nasiibah Yasruun wa hu gabbal baladah.