Yaakhuub gamma maachi Beet Iil
35
1 Wa l‑Rabb gaal le Yaakhuub :
« Gumm amchi Beet Iil.
Askun hinaak wa abni madbah leyi,
ana al‑Rabb al‑bayyant nafsi leek wakit inta muʼarrid min akhuuk Isuu. »
2 Wa Yaakhuub gaal le aayiltah wa le kulla l‑naas al‑gaaʼidiin maʼaayah :
« Baʼʼudu minku al‑asnaam al‑ajnabiyiin wa tahhuru guluubku wa khayyuru khulgaanku.
3 Gummu !
Namchu Beet Iil.
Wa ana nabni madbah le l‑Rabb.
Hu hallaani wakit ana fi l‑diige wa kaan maʼaayi fi derbi al‑ana macheet foogah. »
4 Wa humman anto le Yaakhuub kulla l‑asnaam al‑ajnabiyiin al‑fi iideehum wa l‑khuruus al‑fi udneehum.
Wa Yaakhuub dafanaahum fi tihit al‑chadara al‑kabiire al‑gariibe le hillit Chakiim.
5 Wa wakit gammo maachiin,
al‑Rabb nazzal khoof chadiid fi naas al‑hillaal al‑mujaawiriinhum wa ma fi naadum gidir macha wara awlaad Yaakhuub.
6 Wa Yaakhuub maʼa l‑naas al‑maʼaayah wassalo fi hillit Luuz al‑hassaʼ usumha Beet Iil,
fi balad Kanʼaan.
7 Wa bana madbah wa samma al‑bakaan da El Beet Iil (maʼanaatah Rabb Beet Iil).
Achaan fi l‑bakaan da bas,
al‑Rabb baan leyah wakit hu muʼarrid min akhuuh Isuu.
8 Wa da l‑bakaan al‑maatat foogah Dabuura al‑rabbatha le Rifga wakit hi sakhayre.
Wa dafanooha gariib le Beet Iil tihit chadarat al‑balluut al‑sammooha Balluut al‑Baki.
9 Wa baʼad Yaakhuub gamma min balad Faddaan Araam wa wassal fi Beet Iil,
al‑Rabb baan leyah battaan wa baarakah.
10 Wa gaal leyah :
« Usmak Yaakhuub wa laakin baʼad al‑yoom ma yinaaduuk Yaakhuub.
Khalli usmak yabga Israaʼiil.
» Wa be misil da,
le Yaakhuub al‑Rabb sammaah Israaʼiil.
11 Wa l‑Rabb gaal leyah :
« Ana Allah al‑Gaadir.
Alda wa iyaalak yabgo katiiriin.
Umma wa umam katiiriin yamurgu minnak wa min sulbak yamurgu muluuk.
12 Wa l‑balad al‑ana anteetha le Ibraahiim wa Ishaakh,
nantiiha leek inta wa le zurriiytak al‑taji min baʼadak. »
13 Wa khalaas,
al‑Rabb macha min al‑bakaan al‑hajja leyah foogah.
14 Wa Yaakhuub khazza hajar fi l‑bakaan al‑Rabb hajja leyah wa sabba foogah hadiiyat charaab wa dihin le yikhassisah.
15 Wa Yaakhuub samma al‑bakaan al‑Rabb hajja leyah foogah da,
Beet Iil (maʼanaatah beet Allah).
Waaluudit Banyaamiin wa moot Raahiil
16 Wa khalaas,
Yaakhuub wa aayiltah gammo min Beet Iil.
Wa wakit humman lissaaʼhum baʼiid min hillit Afraata,
Raahiil taalagat.
Wa waaluuditha bigat gaasiye.
17 Wa wakit al‑talaga assaratha,
al‑wallaada gaalat leeha :
« Ma takhaafe,
daahu battaan wilidti wileed ! »
18 Wa laakin Raahiil garrabat tumuut.
Gabul mootha,
sammat al‑wileed da Banuuni (maʼanaatah wileed hizni).
Wa laakin abuuh sammaah Banyaamiin (maʼanaatah wileed zeenaayti).
19 Wa Raahiil maatat wa dafanooha fi derib hillit Afraata al‑maʼruufa al‑yoom be Beet Laham.
20 Wa Yaakhuub khazza hajar fi raas khaburha.
Wa l‑hajar al‑fi khabur Raahiil gaaʼid lahaddi l‑yoom.
21 Wa Yaakhuub al‑binaaduuh Israaʼiil hawwal min al‑bakaan da wa macha bana kheemtah giddaam min Migdal Idar.
22 Wa wakit Israaʼiil sakan fi l‑balad di,
wileedah al‑bikir Raʼuubiin macha ragad maʼa Bilha sirriiyit abuuh wa Israaʼiil simiʼ be l‑cheyy da.
Wa awlaad Yaakhuub humman atnaachar.
23 Leeya jaabat leyah Raʼuubiin al‑bikir wa Chimʼuun wa Laawi wa Yahuuza wa Yassaakar wa Zabuluun.
24 Wa Raahiil jaabat leyah Yuusuf wa Banyaamiin.
25 Wa Bilha khaddaamit Raahiil jaabat leyah Daan wa Naftaali.
26 Wa Zilfa khaddaamit Leeya jaabat leyah Gaad wa Achiir.
Dool awlaad Yaakhuub al‑wildoohum leyah fi Faddaan Araam.
Moot Ishaakh
27 Wa khalaas,
Yaakhuub wassal bakaan abuuh Ishaakh fi hillit Mamra,
gariib le Kharyat Arbaʼa al‑maʼruufa al‑yoom be Hibruun.
Wa da l‑bakaan al‑awwal Ibraahiim wa Ishaakh sakano foogah.
28 Wa Ishaakh aach 180 sana.
29 Wa maat wa lihig abbahaatah wa da wakit chayyab wa chibiʼ min al‑dunya.
Wa khalaas,
awlaadah Isuu wa Yaakhuub dafanooh.